Жеремия 29:1—32
29 Жеремия пайгамбардын туткунда жүргөн элдин арасындагы аксакалдарга, дин кызматчыларга, пайгамбарларга жана Небухаданасар Иерусалимден Бабылга туткундап кеткен бүт элге Иерусалимден жиберген катында жазылган сөздөр.
2 Ал кат Жекония+ падышаны, анын энесин*,+ ак сарай кызматчыларын, Жүйүт жери менен Иерусалимдин төрөлөрүн, усталар менен темир усталарды* Иерусалимден алып кетишкенден кийин жазылган.+
3 Жеремия ал катты Жүйүт падышасы Ситкия+ Бабылдын падышасы Небухаданасарга жөнөткөн Шапан+ уулу Элас менен Хилкия уулу Гемариядан берип жиберген. Ал катта мындай делген:
4 «Ысрайылдын Кудайы, асман аскерлеринин Кудайы Жахаба Иерусалимден Бабылга өзү туткунга айдагандардын баарына мындай дейт:
5 „Үйлөрдү куруп, жашай бергиле. Бак-шак тигип, мөмөсүн жегиле.
6 Аял алып, уул-кыздуу болгула. Уулдарыңарга аял алып бергиле, кыздарыңарды күйөөгө бергиле, алар да уул-кыздуу болушсун. Ошол жакта укумдап-тукумдагыла, кемибегиле.
7 Мен силерди туткунга жиберген шаарга тынчтык сурагыла, ал үчүн Жахабадан тиленгиле. Себеби ал шаарда тынчтык болсо, силер да тынчтыкта жашайсыңар.+
8 Ысрайылдын Кудайы, асман аскерлеринин Кудайы Жахаба мындай дейт: “Араңардагы пайгамбарларыңар менен төлгөчүлөрүңөргө алданбагыла,+ көргөн түштөрүн айтышканда, аларды укпагыла.
9 Анткени Жахаба: “Алар менин атыман силерге жалган айтып жатышат. Аларды мен жиберген эмесмин”,+— дейт”“».
10 «Себеби Жахаба: „Бабылда жүргөнүңөргө 70 жыл болгондо, силерге назарымды салам,+ силерди бул жерге кайра алып келип, убадамды аткарам“,+— дейт.
11 „Мен силерге карата кандай ой-ниетим бар экенин жакшы билем,— дейт Жахаба.— Силерге алаамат жиберүүнү эмес, тынчтык берүүнү,+ жаркын келечек менен үмүт берүүнү ниет кылып жатам.+
12 Силер мени чакырып, менден тиленесиңер, мен болсо силерди угам“.+
13 „Мени издейсиңер, бүт жүрөгүңөр+ менен издегендиктен табасыңар.+
14 Силерге өзүмдү тапканга мүмкүнчүлүк берем“,+— дейт Жахаба. „Туткунда жүргөндөрүңөрдү чогултам, силерди кайсы элдердин арасына, кайсы жерлерге чачыратып жиберсем, ошол элдердин арасынан, ошол жерлерден чогултуп келем,+— дейт Жахаба.— Силерди кайсы жерден туткунга айдап жиберсем, ошол жерге кайра алып келем“.+
15 Бирок силер: „Жахаба бизге Бабыл жеринде пайгамбарларды дайындады“,— деп жатасыңар.
16 Дөөтүнүн тактысында отурган падышага,+ Иерусалим шаарында жашаган бүт элге, силер менен кошо туткунга кетпеген боордошторуңарга Жахаба мындай дейт:
17 „Мен аларга кылыч, ачарчылык, жугуштуу оору* жиберем,+— дейт асман аскерлеринин Кудайы Жахаба.— Аларды чирип*, жегенге жарабай калган анжирлердей кылам“.+
18 „Аларга кылыч,+ ачарчылык, жугуштуу оору жиберип, артынан сая түшөм. Аларды жер жүзүнүн бардык падышалыктарынын үрөйү уча тургандай абалда калтырам,+ каргышка айлантам, элдер таң кала ышкырышат.+ Мен аларды кайсы элдердин арасына чачыратып жиберсем, ошол элдердин арасында маскара болушат.+
19 Анткени алар кайра-кайра* жиберген кызматчыларым — пайгамбарлар — аркылуу айткан сөздөрүмө кулак салышкан эмес“,+— дейт Жахаба.
„Силер укпай койгонсуңар“,+— дейт Жахаба.
20 Мен Иерусалимден Бабылга туткунга айдагандардын баары, эми менин, Жахабанын, сөзүн уккула.
21 Мен, Ысрайылдын Кудайы, асман аскерлеринин Кудайы Жахаба, менин атыман пайгамбарлык кылып, жалган айтып жүргөн+ Колая уулу Ахап менен Маасея уулу Ситкия жөнүндө мындай дейм: „Мен аларды Бабыл падышасы Небухаданасардын колуна салып берем, ал аларды силердин көзүңөрчө өлтүрөт.
22 Ошондон кийин Жүйүттүн Бабылда туткунда жүргөн бүт элинин арасында: “Жахаба сени Бабыл падышасы отко куйкалаган Ситкия менен Ахаптай кылсын!” — деген каргыш сөз айтылып калат.
23 Себеби алар башкалардын аялдары менен ойноштук кылып, менин атыман калп айтып, мен буйрук кылбаган сөздөрдү сүйлөп,+ Ысрайылда уятсыз иш кылып жүрүшкөн.+
“Мен муну билем, буга өзүм күбөмүн”,+— дейт Жахаба“».
24 «Ал эми нехеламдык Шемаяга+ мындай деп айт:
25 „Ысрайылдын Кудайы, асман аскерлеринин Кудайы Жахаба мындай дейт: “Сен Иерусалимдеги элдин баарына, дин кызматчы Маасея уулу Сепанияга+ жана башка дин кызматчылардын баарына өз атыңдан каттарды жиберип, мындай деп жазыптырсың:
26 “Жахабанын үйүндө көзөмөлчү болушуң үчүн, өзүн пайгамбар кылып көрсөткөн акылынан айныган немелердин баарын байкап, андайларды кишендешиң*+ үчүн, Жахаба өзү сени дин кызматчы Жояттын ордуна дин кызматчы кылып дайындаган.
27 Анда эмнеге араңарда пайгамбарсынып жүргөн анатоттук+ Жеремияны тыйып койбойсуң?+
28 Ал Бабылда жүргөн бизге: “Бул көпкө созулат. Үйлөрдү куруп, жашай бергиле. Бак-шак отургузуп, мөмөсүн жегиле...”+ — деп кат жазып жибериптир””“».
29 Дин кызматчы Сепания+ катты Жеремия пайгамбарга окуп бергенде,
30 Жахаба Жеремияга мындай деди:
31 «Туткундагы бүт элге мындай деп айттырып жибер: „Нехеламдык Шемая жөнүндө Жахаба мындай дейт: “Мен жибербесем да, Шемая пайгамбарлык кылып, силерди жалган нерсеге ишендиргенге аракет кылды.+
32 Ошон үчүн Жахаба мындай дейт: “Мен нехеламдык Шемаяны, анын урпактарын жазалайм. Бул элдин арасында Шемаянын тукумунан эч ким калбайт, ал менин элиме кыла турган жакшылыгымды көрбөйт,— дейт Жахаба,— анткени элди Жахабага каршы чыкканга үгүттөдү””“».
Шилтемелер
^ Же балким: «коргон кургандарды».
^ Же: «айымды».
^ Же балким: «жарылып».
^ Же: «кылыч, ачарчылык, оору».
^ Сөзмө-сөз: «эрте туруп».
^ Түп нускада бул жерде эки сөз колдонулган. Бири, сыягы, бутка салынган кишенди, экинчиси кол менен моюнга салынган кишенди билдирет.
