Жеремия 3:1—25
3 Эл оозунда: «Эгер күйөөсү кетирген аял башка бирөөгө тийсе, биринчи күйөөсүнө кайра бармак беле»,— деген сөз бар.
Бул жер бүт бойдон арамдалып калган жокпу?+
«Сен* көптөр менен сойкулук кылдың,+Эми мага кайтып келгениң туура болобу? — дейт Жахаба.—
2 Башыңды көтөрүп, адырларды карачы.
Сени менен кайсы жерде гана жатышкан жок?
Чөлдө жер кезип жүргөн киши* кербенди күткөндөй,Сен өзүң менен жаткандарды жол боюнда күтүп отурчусуң.
Сойкулук кылып, жаман иштерди жасап,Бул жерди арамдап келатасың.+
3 Ошон үчүн нөшөр төкпөй,+Жазгы жамгыр жаабай калды.
Сен сойкулук кылган бети калың аялдайсың;Уялып да койбойсуң.+
4 Анан мага:
„Ата, сен жаш кезимден бери жакын досумсуң!+
5 Түбөлүккө каарданып,Күнөөлөрүбүздү түбөлүккө эстей бересиңби?“ — деп жатасың.
Ушундай дегениң менен,Кыла алган жаман иштериңдин баарын кылып келатасың».+
6 Жошия+ падышанын күндөрүндө Жахаба мага мындай деди: «„Бузулган Ысрайылдын эмне кылганын көрдүңбү? Ал ар бир бийик тоого чыгып, ар бир шактуу дарактын түбүнө барып, сойкулук кылды.+
7 Ушулардын баарын кылгандан кийин да, ага: “Мага кайтып кел”,— деп жаттым.+ Бирок ал кайтып келген жок. Жүйүт болсо ошол саткын эжесинин иштерин карап турду.+
8 Муну көргөндө мен бузулган Ысрайылга ойноштук кылганы үчүн+ талак кат бердим да, кетирип жибердим.+ Бирок анын саткын сиңдиси Жүйүт мындан коркуп калган жок; ал да барып, сойкулук кылды.+
9 Ал* сойкулук кылганына жеңил карап, жерди арамдай берди, таштар менен, дарактар менен ойноштук кылып келди*.+
10 Ушунун баарына карабай анын саткын сиңдиси Жүйүт мага чын жүрөктөн кайрылып келген жок, тек гана кайрылымыш болду“,— дейт Жахаба».
11 Анан Жахаба мага мындай деди: «Бузулган Ысрайыл саткын Жүйүткө караганда күнөөсү азыраак экенин көрсөттү.+
12 Барып, түндүккө жүзүңдү буруп, бул сөздөрдү айт:+
„Жахаба: ”Оо, бузулган Ысрайыл, кайрылып кел”,— деп жатат.+ ”Мен силерди ачуулана карабайм,+ анткени берилгендик сактаган Кудаймын”,— дейт Жахаба. ”Мен түбөлүккө каардана бербейм.
13 Болгону, күнөөңдү мойнуңа ал, себеби сен мага, Жахаба Кудайыңа, каршы күнөө кылып келдиң. Ар бир шактуу дарактын түбүндө чоочундар менен жатып жүрдүң*. Мени болсо укчу эмессиң”,— дейт Жахаба“».
14 «Кайрылып келгиле, саткындар*»,— дейт Жахаба. «Анткени силердин чыныгы кожоюнуңар* менмин; мен силерди чогултуп, ар бир шаардан бирден, ар бир уруудан экиден чогултуп, Сионго алып келем.+
15 Силерге жүрөгүмө жаккан койчуларды дайындайм,+ алар силерге билим менен түшүнүк берет*.
16 Ошол күндөрү силер ушул жерде укумдап-тукумдап көбөйөсүңөр,— дейт Жахаба.+— Силер Жахабанын келишим сандыгы жөнүндө сүйлөшпөй каласыңар. Ал оюңарга да келбейт, аны эстебейсиңер, сагынбайсыңар, башка сандык жасабайсыңар.
17 Ошол кезде Иерусалимди Жахабанын тактысы деп аташат.+ Жахабанын ысмын даңкташ үчүн бардык элдер Иерусалимге чогултулат.+ Алар өжөрлүгүн коюп, бузулган жүрөгүнүн каалоосу боюнча жүрбөй калышат».
18 «Ошол күндөрү Жүйүттүн эли Ысрайылдын эли менен жанаша басат.+ Алар түндүк жеринен чогуу чыгып, мен ата-бабаларыңарга мураска берген жерге барышат.+
19 Мен: „Кандай жакшы, сени уулдарымдын катарына кошом, сага жер соорусун, башка элдердикинен ашып түшкөн эң кооз мурас берем!“+ — деп ойлогом. „Мени “Ата!” дейсиңер, мени таштабайсыңар“,— деп да ойлогом.
20 „Бирок силер, ысрайыл эли, жолдошун таштап кеткен ишенимсиз аялдай болуп, мени таштап кеттиңер“,+— дейт Жахаба».
21 Дөбөлөрдө ысрайыл элинин үнү,Ыйлаган, жалбарган үнү угулуп жатат,Себеби алар туура эмес жолго түшүп,Жахаба Кудайын унутуп коюшту.+
22 «Кайрылып келгиле, саткындар*.
Мен силерди айыктырам, ошондо саткынчылык кылбай каласыңар».+
«Биз мындабыз! Биз сага келдик,Себеби, оо, Жахаба, сен биздин Кудайыбызсың.+
23 Дөбөлөрдө, тоолордо башка кудайларга арнап шаан-шөкөт өткөрүп, чындап эле өзүбүздү өзүбүз алдаптырбыз.+
Чынында, Жахаба Кудайыбыз, Ысрайылдын куткаруучусу сенсиң.+
24 Бирок уятка калтырган кудай* жаш кезибизден бери ата-бабаларыбыздын мээнетин,+Бодо малы менен майда малын,Уулдары менен кыздарын жеп-жутуп келатат.
25 Биз жаш чагыбыздан ушул күнгө чейин күнөө кылып келдик,+Өзүбүз да, ата-бабаларыбыз да сага, Жахаба Кудайыбызга, каршы күнөө кылып келдик,+Жахаба Кудайыбыз, айткандарыңа кулак салбай келдик,Ошон үчүн эми маскаралыкты төшөнүп,Шермендечиликти жамыналы».
Шилтемелер
^ Иерусалимге, башкача айтканда, Сионго карата айтылган.
^ Сөзмө-сөз: «арабиялык».
^ Сыягы, Ысрайылды билдирет.
^ Же: «таштарга, дарактарга сыйынып келди».
^ Же: «жалган кудайларга сыйынып жүрдүң».
^ Сөзмө-сөз: «саткын уулдар».
^ Же балким: «күйөөңөр».
^ Же балким: «силерди билим менен, кыраакылык менен багат».
^ Сөзмө-сөз: «саткын уулдар».
^ Баал деген жалган кудайды билдирет.
