Жеремия 33:1—26
33 Жахаба күзөтчүлөр короосунда+ камакта отурган Жеремияга экинчи ирет кайрылып:
2 «Жерди жараткан Жахаба, аны калыптап, бекем орноткон Жахаба, Жахаба деген ысымдын ээси:
3 „Мени чакыр, ошондо сага жооп берем. Сен билбеген улуу, акыл жеткис нерселер тууралуу айтып берем“,+— дейт»,— деди.
4 «Ысрайылдын Кудайы Жахаба бул шаарды курчап алыш үчүн курулган курулмалардан, кылычтан коргонуш үчүн эл бузган үйлөр менен Жүйүт падышаларынын үйлөрү* тууралуу,+
5 каздимдиктер менен салгылашыш үчүн келгендер, кыянат иштеринен улам ал өзү жүзүн тескери буруп, ачууланып, каарданып кырган адамдардын өлүгүнө бул үйлөрдү толтургандар тууралуу мындай дейт:
6 „Мен бул шаарды калыбына келтирем, айыктырам.+ Элди сакайтам, аларга мол тынчтык, бейкуттук берем*.+
7 Жүйүт менен Ысрайылдын туткундагы элин кайра алып келем,+ алар баштагыдай болушат.+
8 Аларды мага каршы кылган бардык күнөөлөрүнөн тазалайм,+ мага каршы кылган бардык кылмыштарын, күнөөлөрүн толугу менен кечирем.+
9 Бул шаардын атынан улам кубанычка бөлөнөм. Бул шаар элиме кылган жакшылыктарымдын баарын уккан бүт элдердин мени мактап-алкашына, даңазалашына себеп болот.+ Элдер ага кылган бардык жакшылыктарымды, ага тынчтык бергенимди+ угуп коркуп-сестенишет“».+
10 «Жахаба мындай дейт: „Силер: “Адам да, мал да жашабай ээн калды”,— деп айта турган бул жерде, жашаган кишиси да, малы да жок аңгырап калган Жүйүттүн шаарларында, Иерусалимдин көчөлөрүндө кайрадан
11 кубаныч менен шаттыктын,+ күйөө менен колуктунун үнү угулат. “Асман аскерлеринин Кудайы Жахабага ыраазычылык билдиргиле, анткени Жахаба мээримдүү*,+ анын сүйүүсү түбөлүктүү!”+ — дегендердин да үнү угулат“.
„Алар мага, Жахабага, арнап үйүмө ыраазычылык курмандыгын алып келишет.+ Себеби мен бул жердин туткунга кеткен элин кайра алып келем. Баары баштагыдай болот“,— дейт Жахаба».
12 «Асман аскерлеринин Кудайы Жахаба: „Адам да, мал да жашабай ээн калган бул жерде, анын бардык шаарларынын жанында кайрадан койчулар оторун жуушата турган жайыттар болот“,+— дейт.
13 „Тоолуу аймактагы шаарларда, түздүктөгү шаарларда, түштүктөгү шаарларда, Бенжемин уруусунун жеринде, Иерусалимдин айланасында,+ Жүйүттүн шаарларында+ койчулар оторлорун кайрадан санашат“,— дейт Жахаба».
14 «Мына, мен Ысрайыл менен Жүйүттүн эли жөнүндө айткан убадамды аткара турган күндөр келатат,+— дейт Жахаба.—
15 Ошол күндөрдө, ошол убакта Дөөтүнүн тукумунан адил мураскор* чыгарам.+ Ал бул жерде акыйкат, адил иш кылат.+
16 Ошол күндөрдө Жүйүттүн эли куткарылат,+ Иерусалимдин эли коопсуз жашайт.+ Ал шаарды „Биздин адилдигибиз Жахабадан“ деп аташат».+
17 «Жахаба: „Ысрайылдын тактысында ар дайым Дөөтүнүн тукуму отурат.+
18 Ал эми дин кызматчы-лебилердин арасында бүтүндөй өрттөлчү курмандыктарды жана башка курмандыктарды чалып, дан азыктарынан алынып келген тартууну өрттөп, мага кызмат кыла турган киши дайыма болот“,— дейт».
19 Жахаба Жеремияга дагы кайрылып:
20 «Жахаба мындай дейт: „Силер күн менен түн өз маалында алмашпагыдай кылып, күнгө тиешелүү келишимим менен түнгө тиешелүү келишимимди буза аласыңарбы?+
21 Жок. Ошо сыяктуу эле, кызматчым Дөөтүнүн тактысына отуруп падышалык кыла турган уулу болбой тургандай кылып,+ аны менен түзгөн келишимимди да бузуу мүмкүн эмес.+ Мага кызмат кылган дин кызматчы-лебилер менен түзгөн келишимимди да бузуу мүмкүн эмес.+
22 Асмандагы жылдыздар* менен деңиз куму сансыз көп болгондой эле, мен да кызматчым Дөөтүнүн тукуму менен мага кызмат кылган лебилерди көбөйтөм“»,— деди.
23 Жахаба Жеремияга дагы кайрылып, мындай деди:
24 «Бул элдин ичинен айрымдардын: „Жахаба өзү тандап алган эки урууну четке кагат“,— деп айтып жүргөнүн уккан жоксуңбу? Алар менин элимди баркка албай, эл катары көрбөй калышты.
25 Жахаба мындай дейт: „Күн менен түнгө+ тиешелүү келишимим, асман менен жер үчүн бекиткен мыйзамдарым* өзгөргүс болгондой эле,+
26 Жакыптын, кызматчым Дөөтүнүн тукумун эч качан четке какпайм деген убадам да өзгөргүс; анын тукумунан чыккан башкаруучулар Ыбрайымдын, Ыскактын, Жакыптын урпактарына дайыма бийлик кылат. Мен алардын туткундагы элин чогултам,+ аларга боор ооруйм“».+
Шилтемелер
^ Сыягы, ал үйлөрдү таштарын шаардын дубалын чыңдаганга же коргондорду курганга колдонуш үчүн бузушкан.
^ Же: «чындыкты ачып берем».
^ Сөзмө-сөз: «жакшы».
^ Сөзмө-сөз: «чырпык».
^ Сөзмө-сөз: «Асман кошууну».
^ Же: «эрежелерим».
