Жеремия 34:1—22
34 Бабыл падышасы Небухаданасар, анын бүт аскери жана жер жүзүндөгү ага баш ийген бардык падышалыктар менен бүт элдер Иерусалим менен анын тегерегиндеги бардык шаарларга чабуул жасап жатканда, Жахаба Жеремияга мындай деди:+
2 «Ысрайылдын Кудайы Жахаба мындай дейт: „Бар да, Жүйүт падышасы Ситкия+ менен сүйлөшүп, ага мындай де: “Жахаба сага: “Мен бул шаарды Бабыл падышасынын колуна салып бергени жатам, ал аны өрттөп жиберет.+
3 Сен андан качып кутула албайсың, сөзсүз колго түшөсүң, анын колуна салынып берилесиң.+ Бабыл падышасы менен көзмө-көз көрүшөсүң, оозмо-ооз сүйлөшөсүң, анан Бабылга барасың”,+— деди.
4 Бирок, Жүйүт падышасы Ситкия, Жахабанын сөзүн ук: “Жахаба сен жөнүндө мындай дейт: “Сен кылычтан өлбөйсүң.
5 Өз ажалың менен өлөсүң.+ Эл ата-бабаларың үчүн, сага чейинки падышалар үчүн жыпар жыттуу зат түтөткөндөй, сен үчүн да түтөтөт, сени “эсил кайран мырзам!” деп жоктоп ыйлайт. Анткени муну мен айттым”,— дейт Жахаба””“».
6 Жеремия пайгамбар Жүйүт падышасы Ситкияга Иерусалимде ушул сөздөрдүн баарын айтты.
7 Ошол учурда Бабыл падышасынын аскерлери Иерусалим менен, Жүйүт жериндеги калган бардык шаарлар+ менен жана Лакиш,+ Азек+ менен согушуп жаткан эле; Жүйүттөгү чептүү шаарлардын арасынан ушул экөө эле калган болчу.
8 Ситкия падыша Иерусалимдин бүт эли менен кулдарды эркиндикке чыгаруу жөнүндө келишим түзгөндөн кийин,+ Жахаба Жеремияга сүйлөдү.
9 Ал келишимде ар ким өзүнүн еврей кулун, эркек болобу же аял болобу, эркиндикке чыгарышы керектиги айтылган. Ошентип, эч ким жүйүт боордошторун кул кылбашы керек болчу.
10 Буга төрөлөр менен элдин баары баш ийди. Ар бири кулу менен күңүн эркиндикке чыгарышы, мындан ары аларды кул кылбашы керектиги айтылган ошол келишимге макул болушту. Баары баш ийип, кулдарын коё беришти.
11 Бирок кийин кайра айнып, коё берген кулдары менен күңдөрүн кайтарып келип, кайрадан кул болгонго мажбурлашты.
12 Ошондо Жахаба Жеремияга кайрылды. Жахаба ага мындай деди:
13 «Ысрайылдын Кудайы Жахаба мындай дейт: „Мен ата-бабаларыңарды Мисир жеринен, кул болуп жүргөн жеринен*, алып чыккан күнү+ алар менен келишим түзүп:+
14 “Жетинчи жылы* ар бириңер өзүңөр сатып алган, силерге алты жыл кызмат кылган еврей боордошуңарды коё беришиңер керек; аны эркиндикке чыгаргыла”,+— дегем. Бирок ата-бабаларыңар мени угушкан эмес, сөзүмө кулак түрүшкөн эмес.
15 Силер болсо жакында эле жакыныңарды эркиндикке чыгарып, көз алдымда туура иш кылып, оңолдуңар; менин ысмым менен аталган үйдө көз алдымда келишим түздүңөр.
16 Бирок кайра айнып, ар бириңер каалаган жагына коё берген кулдарыңар менен күңдөрүңөрдү кайтарып келип, кул болгонго мажбур кылдыңар, ошентип, ысмымды булгадыңар“.+
17 Ошондуктан Жахаба мындай дейт: „Силер боордошуңарды, жакыныңарды эркиндикке чыгаргыла деген буйругума баш ийген жоксуңар.+ Ошон үчүн силерди мындай эркиндикке чыгарам: кылычтан, жугуштуу оорудан*, ачарчылыктан+ өлөсүңөр. Силерди жер жүзүндөгү бардык падышалыктардын үрөйү уча тургандай абалда калтырам,+— дейт Жахаба.—
18 Менин алдымда өздөрү түзгөн келишимдин — музоону экиге бөлүп, ортосунан өтүп*+ түзгөн келишимдин — сөздөрүн аткарбай, аны бузгандарды душмандын колуна салып берем.
19 Тактап айтканда, экиге бөлүнгөн музоонун ортосунан өткөн Жүйүттүн төрөлөрүн, Иерусалимдин төрөлөрүн, ак сарай кызматчыларын, дин кызматчыларды жана бүт элди
20 душмандарынын колуна, алардын жанын алгысы келгендердин колуна салып берем; алардын өлүгү асмандагы куштарга, жердеги айбанаттарга жем болот.+
21 Жүйүт падышасы Ситкия менен анын төрөлөрүн душмандарынын колуна, алардын жанын алгысы келгендердин колуна, азыр артка чегинип жаткан+ Бабыл падышасынын аскерлеринин колуна салып берем“.+
22 „Мен буйрук берип,— дейт Жахаба,— аларды бул шаарга кайра алып келем. Алар салгылашып, шаарды басып алышат да, өрттөп жиберишет.+ Мен Жүйүттүн шаарларын эч ким жашабаган ээн жерге айлантам“».+
Шилтемелер
^ Сөзмө-сөз: «кулдардын үйүнөн».
^ Сөзмө-сөз: «Жети жылдын аягында».
^ Же: «кылычтан, оорудан».
^ Байыркы убакта келишим түзгөндө ушундай каада кылынчу.
