Жеремия 39:1—18
39 Жүйүт падышасы Ситкиянын башкаруусунун тогузунчу жылынын онунчу айында Бабыл падышасы Небухаданасар бүт аскери менен келип, Иерусалимди курчап алды.+
2 Алар Ситкиянын башкаруусунун он биринчи жылынын төртүнчү айында, тогузунчу күнү шаардын дубалын бузушту.+
3 Бабыл падышасынын бүт төрөлөрү: самгар* Нергалшарезер, башкы ак сарай кызматчысы* Небосарсехим, рабмаг* Нергалшарезер* жана башка төрөлөрдүн баары кирип келип, Ортоңку дарбазанын алдына отурушту.+
4 Муну көргөндө Жүйүт падышасы Ситкия менен жоокерлердин баары качып жөнөдү.+ Алар шаардан түн ичинде падышанын багы аркылуу эки катар дубалдын ортосундагы дарбазадан чыгышты да, Арабага кеткен жолго түшүштү.+
5 Артынан каздимдиктердин аскерлери кууп жөнөдү. Алар Ситкияны Жерихонун чөлдүү түздүгүнөн кууп жетишти.+ Аны колго түшүрүп, Хамат+ жериндеги Риблага,+ Бабыл падышасы Небухаданасарга алып барышты. Падыша ага ошол жерден өкүм чыгарды.
6 Ал Ситкиянын уулдарын Риблада анын көзүнчө өлтүрдү, Жүйүттүн бүт аттуу-баштуу кишилерин да өлтүрдү.+
7 Анан Ситкиянын эки көзүн оюп таштады да, Бабылга алып кетиш үчүн жез кишен менен кишендеди.+
8 Каздимдиктер падышанын ак сарайын да, элдин үйлөрүн да өрттөп,+ Иерусалимдин дубалдарын уратып салышты.+
9 Сакчылардын башчысы Небузарадан+ шаарда калган элди, өзү тарапка өтүп кеткендерди, шаардын сыртындагы калган элдин баарын Бабылга туткундап кетти.
10 Ал эми колунда такыр эч нерсеси жок кедейлердин айрымдарын сакчылардын башчысы Небузарадан Жүйүт жеринде калтырды. Ошол күнү аларга иштеткенге жүзүмзарлар менен жерлерди берди*.+
11 Бабыл падышасы Небухаданасар сакчылардын башчысы Небузараданга Жеремияга байланыштуу буйрук берип:
12 «Барып, аны тап да, ага көз салып жүр, эч жамандык кылба. Ал эмнени суранбасын, ошону кыл»,+— деди.
13 Ошондо сакчылардын башчысы Небузарадан, башкы ак сарай кызматчысы Небушазбан, рабмаг Нергалшарезер, Бабыл падышасынын кол алдындагы башчылардын баары киши жиберип,
14 Жеремияны күзөтчүлөр короосунан алдырышты.+ Анан үйүнө алып барышы үчүн, Шапандын+ небереси, Ахикамдын+ уулу Гедалияга+ тапшырышты. Ошентип, Жеремия элдин арасында жашап калды.
15 Жеремия күзөтчүлөр короосунда камакта отурганда,+ Жахаба ага мындай деген болчу:
16 «Бар да, эфиопиялык Эбетмелекке+ мындай де: „Ысрайылдын Кудайы, асман аскерлеринин Кудайы Жахаба: “Мен бул шаарга жакшылык эмес, жамандык* алып келем деген сөзүмдү аткарам. Муну ошол күнү өз көзүң менен көрөсүң”,— дейт“.
17 „Бирок ошол күнү мен сени куткарып калам,— дейт Жахаба.— Өзүң корккон адамдардын колуна салып бербейм“.
18 „Сени сөзсүз куткарам. Сен кылычтан өлбөйсүң, мага таянганың үчүн+ өз жаның өзүңө олжо болот“,+— дейт Жахаба».
Шилтемелер
^ Сыягы, наам. Мааниси белгисиз.
^ Еврейче рабсарис.
^ Башкы сыйкырчы (бакшы, жылдыз төлгөчү).
^ Түп нускадагы сөздөрдүн башкача бөлүнүшүнө ылайык, «Нергал-Шарезер, Самгар-Небо, Сарсехим, Рабсарис».
^ Же балким: «жүзүмзарлар менен жерлерди берип, жумушка салды».
^ Же: «алаамат».
