Жеремия 42:1—22
42 Ошондо бардык аскер башчылары, Кареахтын уулу Жоханан,+ Ошаянын уулу Жезания, улук-кичик дебей бүт эл келип,
2 Жеремия пайгамбарга: «Суранабыз, өтүнүчүбүздү угуп, биз үчүн, калган ушул эл үчүн Жахаба Кудайыңан тилене көр. Себеби, өзүң көрүп тургандай, калың элден минтип бир ууч эле эл калдык.+
3 Жахаба Кудайың бизге кайсы жолдо жүрүшүбүз керектигин, эмне кылышыбыз керектигин айтсынчы»,— дешти.
4 Жеремия пайгамбар аларга: «Макул, өтүнүчүңөр боюнча Жахаба Кудайыңардан тиленейин. Жахаба силерге эмне деп жооп берсе, ошонун баарын айтып берем, бир да сөзүн жашырбайм»,— деди.
5 Алар болсо Жеремияга: «Жахаба Кудайыңдын сен аркылуу айта турган ар бир сөзүн так аткарбасак, анда Жахаба ишеничтүү, чынчыл күбө болуп, бизди жазаласын.
6 Биз сени Жахаба Кудайыбызга өзүбүз жиберип жатабыз, анын сөзү бизге жагабы-жакпайбы, баш иебиз. Анткени Жахаба Кудайыбызга баш ийсек, өзүбүзгө эле жакшы болот»,— дешти.
7 Анан 10 күндөн кийин Жахаба Жеремияга сүйлөдү.
8 Ошондо Жеремия Кареахтын уулу Жохананды, жанындагы аскер башчыларынын баарын, улук-кичик дебей бүт элди чакырып,+
9 мындай деди: «Силер мени Ысрайылдын Кудайы Жахабадан бизге ырайым кылышын сурап кел деп жибергенсиңер. Ал мындай дейт:
10 „Эгер ушул жерде калсаңар, башыңарга алаамат түшүргөнүм үчүн боорум ооруйт*; силерди гүлдөтөм, бүлүндүрбөйм, отургузам, тамырыңар менен жулбайм.+
11 Үрөйүңөрдү учурган Бабыл падышасынан коркпогула“.+
„Андан коркпогула,— дейт Жахаба,— себеби мен жаныңардамын, силерди анын колунан куткарам, сактап калам.
12 Силерге ырайым кылам,+ ошондо ал да силерге ырайым кылып, өз жериңерге кайтарат.
13 Эгер: “Жок, бул жерде калбайбыз!” — деп, Жахаба Кудайыңарды укпай койсоңор,
14 “Мисир жерине барабыз,+ ал жерде согуш дегенди көрбөйбүз, согушка чакырган сурнай үнүн укпайбыз, нанга зар болбойбуз; ошол жакта жашайбыз”,— дей турган болсоңор,
15 анда, оо, жүйүт элинин калдыгы, Жахабанын эмне дегенин уккула. Ысрайылдын Кудайы, асман аскерлеринин Кудайы Жахаба мындай дейт: “Эгер Мисирге барабыз деп бек чечип, ошол жакка жашаганы* барсаңар,
16 анда өзүңөр корккон кылыч силерди Мисир жеринде сулатат, өзүңөр корккон ачарчылык Мисирге чейин артыңардан ээрчип барат. Ошентип, ошол жерде өлөсүңөр.+
17 Мисирге барып жашайбыз деп чечип алгандардын баары кылычтан, ачарчылыктан, жугуштуу оорудан* өлөт. Мен жибере турган алааматтан эч кимиси качып кутула албайт, бири да аман калбайт”“.
18 Ысрайылдын Кудайы, асман аскерлеринин Кудайы Жахаба: „Иерусалимдин тургундарына жаалымды, каарымды төккөнүмдөй,+ эгер Мисирге барсаңар, силерге да каарымды төгөм. Силер каргышка каласыңар, башкалардын үрөйү уча тургандай абалга туш болосуңар, наалатка каласыңар, маскара болосуңар,+ бул жерди кайра эч качан көрбөйсүңөр“,— дейт.
19 Оо, жүйүт элинин аман калгандары, Жахаба силерге Мисирге барбагыла деди. Билип койгула, бүгүн силерге эскертип жатам:
20 ошол күнөөңөрдүн айынан өмүрүңөрдөн айрыласыңар. Себеби: „Биз үчүн Жахаба Кудайыбыздан тилен. Жахаба Кудайыбыз эмне десе, ошонун баарын айтып бер, айтканын аткарабыз“+ — деп, мени Жахаба Кудайыңарга өзүңөр жибергенсиңер.
21 Мына, бүгүн силерге анын айткандарын айтып жатам, бирок силер Жахаба Кудайыңарга баш ийбейсиңер, мен аркылуу айткан сөздөрүнүн бирин да аткарбайсыңар.+
22 Ошондуктан билип койгула, барып жашагыңар келип жаткан жерде кылычтан, ачарчылыктан, жугуштуу оорудан кырыласыңар».+
Шилтемелер
^ Же: «кайгырам; өкүнөм».
^ Же: «убактылуу жашап туруш үчүн».
^ Же: «кылычтан, ачарчылыктан, оорудан».
