Жеремия 52:1—34
52 Ситкия+ 21 жашында такка отуруп, Иерусалимде 11 жыл падышалык кылды. Энесинин аты Хамутал+ эле, ал либналык Жеремиянын кызы болчу.
2 Жаякиндей болуп, Ситкия Жахабанын көз алдында жаман иштерди кыла берди.+
3 Жахабанын каары кайнагандыктан, Иерусалим менен Жүйүт жери мына ушундай балээлерге кабылды. Ал акыры алардын тургундарын көз алдынан кууп жиберди.+ Ситкия болсо Бабылдын падышасына каршы чыкты.+
4 Ситкиянын башкаруусунун тогузунчу жылында, онунчу айдын онунчу күнү Бабылдын падышасы Небухаданасар бүт аскери менен Иерусалимге келди. Алар анын тушуна жайгашып, аны курчоого алыш үчүн тегерегине дубал тургузушту.+
5 Шаар Ситкия падышанын башкаруусунун он биринчи жылына чейин курчоодо болду.
6 Төртүнчү айдын тогузунчу күнү+ шаарда ачарчылык катуу күч алып, эл тамак-ашсыз калган учур болчу.+
7 Акыры, каздимдиктер ошол күнү шаардын дубалынын бир жерин уратышты. Алар шаарды курчап турганда, Ситкиянын бүт жоокерлери түн ичинде падышанын багынын жанындагы эки катар дубалдын ортосундагы дарбазадан чыгып, Арабаны көздөй кеткен жол менен качып жөнөштү.+
8 Бирок каздимдиктердин аскерлери Ситкиянын артынан түшүп, Жерихонун чөлдүү түздүктөрүнөн кууп жетишти.+ Падышанын жанындагы жоокерлердин баары аны таштап, туш-тушка качып кетишти.
9 Каздимдиктер падышаны колго түшүрүп, Хамат жериндеги Рибла шаарына, Бабылдын падышасына алып барышты. Ал ошол жактан ага өкүм чыгарды.
10 Бабылдын падышасы Ситкиянын уулдарын анын көзүнчө өлтүрдү. Ал Жүйүттүн бүт төрөлөрүн да Риблада өлтүрдү.
11 Анан Ситкиянын эки көзүн тең оюп,+ жез кишен менен кишендеп, Бабылга алып кетти. Аны өлөр-өлгөнчө камактан бошоткон жок.
12 Бабылдын падышасы Небухаданасардын башкаруусунун он тогузунчу жылында, бешинчи айдын онунчу күнү анын кызматчысы, сакчылардын башчысы Небузарадан Иерусалимге келди.+
13 Ал Жахабанын ибадатканасын,+ падышанын ак сарайын, Иерусалимдеги үйлөрдүн баарын, ошондой эле бүт чоң үйлөрдү өрттөп жиберди.
14 Сакчылардын башчысы менен келген каздимдик аскерлер Иерусалимдин дубалын уратып салышты.+
15 Сакчылардын башчысы Небузарадан колунда жоктордун айрымдарын, шаарда калган элди, Бабылдын падышасы тарапка өтүп кеткендерди, усталардын калганын туткундап кетти.+
16 Ал эми колунда такыр эч нерсеси жок кедейлердин айрымдарын жүзүм өстүртүп, жер иштетип жумушка салыш үчүн калтырып койду.+
17 Каздимдиктер Жахабанын ибадатканасындагы жез мамыларды,+ Жахабанын ибадатканасындагы арабалар+ менен чоң жез казанды+ талкалап, жездин баарын Бабылга алып кетишти.+
18 Алар ибадатканадагы кызматта колдонулган күл салгычтарды, калактарды, билик өчүргүчтөрдү, табактарды,+ чөйчөктөр+ менен бүт жез буюмдарды да алып кетишти.
19 Сакчылардын башчысы таза алтын менен күмүштөн жасалган чараларды,+ чок салгычтарды, табактарды, күл салгычтарды, чыракпаяларды,+ чөйчөктөрдү жана башка табактарды алып кетти.+
20 Сулайман падыша Жахабанын ибадатканасы үчүн жасаткан эки мамыга, чоң казанга, анын астындагы 12 жез букага,+ арабаларга кеткен жез өтө көп болгондуктан таразага тартылган эмес болчу.
21 Ар бир мамынын бийиктиги 8 метр*, жип менен айланта ченегенде, жоондугу 5 метр*,+ калыңдыгы 7 сантиметрдей* болчу. Алардын ичи көңдөй эле.
22 Мамылардын ар биринин үстүндөгү таажы жезден болчу. Ар бир таажынын бийиктиги 2 жарым метр* болчу.+ Анын тегерегиндеги анарлар менен тор да жезден жасалган эле. Экинчи мамы менен андагы анарлар да ошондой болчу.
23 Мамынын капталдарында* 96 анар, торду айландыра бардыгы болуп 100 анар бар болчу.+
24 Сакчылардын башчысы жогорку дин кызматчы Сераяны,+ дин кызматчынын жардамчысы Сепанияны,+ үч дарбазачыны да алып кетти.+
25 Ошондой эле жоокерлердин үстүнөн коюлган ак сарай кызматчысын, падышанын шаардагы 7 кеңешчисин, элди аскерге каттаган аскер башчысынын катчысын жана шаарда калган карапайым элдин ичинен 60 кишини алып кетти.
26 Сакчылардын башчысы Небузарадан аларды Риблага, Бабылдын падышасына алып барды.
27 Бабылдын падышасы аларды Хамат жериндеги Риблада өлтүрдү.+ Ошентип, жүйүт эли өз жеринен туткундалып кетти.+
28 Небухаданасар башкаруусунун жетинчи жылында 3 023 жүйүттү туткундап кетти.+
29 Небухаданасардын башкаруусунун он сегизинчи жылында+ Иерусалимден 832 киши туткундалып кетти.
30 Небухаданасардын башкаруусунун жыйырма үчүнчү жылында сакчылардын башчысы Небузарадан жүйүттөрдөн 745 кишини туткундап кетти.+
Баары биригип 4 600 киши туткунга кетти.
31 Жүйүттүн падышасы Жаякиндин+ туткундалып кеткенине 37 жыл болгондо, он экинчи айдын жыйырма бешинчи күнүндө, Бабылдын падышасы Эбилмеродах өзү падыша болгон жылы Жүйүттүн падышасы Жаякинди бошотуп, камактан чыгарды.+
32 Ал Жаякинге жакшы мамиле кылып, анын зоболосун Бабылга туткундалып келген башка падышалардыкынан жогору көтөрдү.
33 Жаякин камакта кийген кийимин чечип, жаңы кийим кийди. Ал өмүрүнүн аягына чейин падышанын дасторконунан тамактанды.
34 Ошентип, көзү өткөнчө, күн сайын ага Бабылдын падышасынан белгиленген өлчөмдө азык берилип турду.
Шилтемелер
^ Сөзмө-сөз: «18 чыканак». Б14 тиркемесин кара.
^ Сөзмө-сөз: «12 чыканак».
^ Сөзмө-сөз: «4 эли». Б14 тиркемесин кара.
^ Сөзмө-сөз: «5 чыканак».
^ Же: «көзгө көрүнгөн жактарында».
