Жылнаама 1-китеп 10:1—14
-
Шабул уулдары менен кошо өлөт (1—14)
10 Пелиштиликтер ысрайылдыктар менен согушуп, ысрайылдыктар алардан качып жөнөштү. Алардын көбү Гилбоя тоосунда өлдү.+
2 Пелиштиликтер Шабул менен уулдарынын артынан сая түшүп, анын уулдарын: Жонатанды, Абынадапты, Малкишуаны+ өлтүрүштү.
3 Анан Шабулду бутага алып, чабуулун ого бетер күчөтүштү. Ошентип, жаачылар аны жарадар кылышты.+
4 Шабул куралын көтөргөн жигитине: «Кылычыңды сууруп, мени сайып сал. Болбосо бул сүннөткө отургузулбагандар келип, мени мыкаачылык менен өлтүрүшөт*»,+— деди. Бирок ал коркуп, болбой койду. Ошондо Шабул кылычына сайынып өлдү.+
5 Анын өлгөнүн көрүп, курал көтөргөн жигити да кылычына сайынып өлдү.
6 Ошентип, Шабул менен анын 3 уулу, ошондой эле жанында үйүндөгүлөрүнөн кимдер болсо, ошолордун баары өлдү.+
7 Өрөөндө жашаган ысрайылдыктар бүт жоокерлеринин душмандардан качканын, Шабул менен анын уулдарынын өлгөнүн билгенде шаарларын таштап, качып жөнөштү. Пелиштиликтер келип, ал шаарларды ээлеп алышты.
8 Кийинки күнү пелиштиликтер өлгөндөрдүн буюмдарын тоногону келип, Гилбоя тоосунан+ Шабул менен уулдарынын өлүгүн табышты.
9 Алар Шабулдун бүт нерсесин, курал-жарагын чечип, башын кесип алышты да, бул тууралуу буркандарынын+ ибадатканаларында жана элге жарыялаш үчүн бүт Пелишти жерине кабар жиберишти.
10 Анан Шабулдун курал-жарагын өздөрүнүн кудайынын ибадатканасына коюп, баш сөөгүн Дагон+ деген кудайынын ибадатканасына илип коюшту.
11 Гилаттагы Жабештин+ бүт тургундары пелиштиликтердин Шабулду эмне кылышканын укканда,+
12 жоокерлеринин баары барып, Шабул менен уулдарынын сөөгүн Жабешке алып келишти.+ Анан чоң дарактын түбүнө көмүп, 7 күн орозо тутушту.
13 Ошентип, Шабул Жахабанын сөзүнө кулак салбай,+ Жахабага берилгендигин сактабаганы үчүн жана өлгөндөр менен сүйлөштүргөн+ аялга кайрылганы үчүн өлдү.
14 Ал Жахабадан акыл сурабай, ошол аялга кайрылган. Ошондуктан Кудай аны өлтүрүп, падышалык бийликти Жышайдын уулу Дөөтүгө берди.+
Шилтемелер
^ Же: «маскара кылышат».
