Жылнаама 1-китеп 19:1—19
19 Кийинчерээк Амондун тукумдарынын падышасы Нахаш көз жумуп, ордуна уулу падыша болду.+
2 Бул тууралуу укканда Дөөтү: «Нахаш мага дайыма жакшылык кылгандыктан*, мен да анын уулу Ханунга жакшылык кылайын»+ — деп, атасын жоктоп кайгырып жаткан Ханунга көңүл айтыш үчүн кишилерин жиберди. Бирок ал кишилер Ханунга көңүл айтканы Амондун тукумдарынын+ жерине барышканда,
3 алардын төрөлөрү өздөрүнүн мырзасы Ханунга: «Дөөтү кишилерин атаңызды сыйлагандыктан көңүл айтканы жиберди деп ойлоп жатасызбы? Алар жерибизди чалгындап, тияк-биягыбызды байкап көрүп, анан аны талкалаш үчүн келишкен жокпу?» — дешти.
4 Ошондо Ханун Дөөтүнүн кишилерин кармап алып, сакалдарын кырып,+ кийимдерин белинен ылдый кесип, жолго салды.
5 Бул жөнүндө Дөөтүгө билдиришкенде, ал ошол замат аларды тосуп чыкканы кишилерин жөнөттү, анткени алар аябай маскара болушкан эле. Падыша аларга: «Сакалыңар өскүчө, Жериходо+ тура тургула, анан келесиңер»,— деп айттырып жиберди.
6 Дөөтүгө жек көрүндү болуп калышканын билгенде Ханун жана Амондун башка тукумдары кабарчыларын Месопотамияга, Арам-Маахага, Собага+ жөнөтүп, согуш арабалары менен атчандарды жалдаш үчүн 34 тонна 200 килограмм* күмүш берип жиберишти.
7 Ошентип, алардын 32 000 согуш арабасын, Мааханын падышасы менен аскерин жалдашты. Анан баары келип, Медебанын+ тушуна жайгашышты. Амондун тукумдары да өз шаарларынан чыгып, согушканы жөнөштү.
8 Дөөтү муну укканда Жоапты+ бүт аскери, эң күчтүү жоокерлери менен жөнөттү.+
9 Амондун тукумдары өздөрүнүн шаарынын дарбазасынын алдына аскердик тартипте тизилишти. Аларга жардамга келген падышалар болсо талаага барып, өзүнчө турушту.
10 Душмандардын алды жактан да, арт жактан да келатканын көрүп, Жоап Ысрайылдын мыкты жоокерлеринин ичинен бир канчасын тандап алды да, сириялыктардын* каршысына койду.+
11 Калган кишилерин болсо, Амондун тукумдарынын каршысына коюшу үчүн, бир тууганы Абышайга+ тапшырды.
12 Жоап ага: «Эгер сириялыктар+ мени жеңип баратса, сен мага жардамга келесиң. Эгер Амондун тукумдары сени жеңип баратса, мен сага жардамга барам.
13 Кайраттуу, эр жүрөк болуп,+ элибиз үчүн, Кудайыбыздын шаарлары үчүн согушалы. Жахаба Кудайыбыз болсо өзү туура көргөндөй кылат»,— деди.
14 Анан Жоап кишилери менен сириялыктарга чабуул жасап, алар качып жөнөштү.+
15 Сириялыктардын качканын көрүп, Амондун тукумдары да Жоаптын бир тууганы Абышайдан качып, шаарга кирип кетишти. Андан кийин Жоап Иерусалимге кайтып барды.
16 Ысрайылдыктардан жеңилип калышканын көрүп, сириялыктар Эфрат дарыясы+ тараптагы сириялыктарды чогултуп келгени кишилерин жиберишти. Аларга Ададезердин аскер башчысы Шопак башчылык кылчу.+
17 Бул жөнүндө Дөөтүгө билдиришкенде, ал дароо Ысрайылдын бүт аскерин чогултту да, Иордандын аркы өйүзүнө өтүп, сириялыктардын каршысына барып аскерлерин тизди. Дөөтү аскерин тизгенде, сириялыктар алар менен согуша башташты.+
18 Бирок ысрайылдыктардан качып жөнөштү. Дөөтү алардын араба айдаган 7 000 жоокерин, 40 000 жөө аскерин, ошондой эле аскер башчысы Шопакты өлтүрдү.
19 Ададезердин кызматчылары өздөрүнүн жеңилип калышканын көргөндө+ Дөөтү менен тынчтык келишимин түзүп, ага баш ийип калышты.+ Ошондон кийин сириялыктар Амондун тукумдарына жардам бергиси келбей калды.
Шилтемелер
^ Же: «туруктуу сүйүү көрсөткөндүктөн».
^ Сөзмө-сөз: «1 000 талант». Б14 тиркемесин кара.
^ 6, 7-аяттарда айтылган аскерлер.
