Жылнаама 2-китеп 17:1—19
17 Асанын ордуна уулу Жошапат+ Жүйүткө падыша болду. Ал Ысрайылга үстөмдүк кылып, бийлигин чыңдай баштады.
2 Жүйүттөгү чептүү шаарлардын баарына аскерлерин жайгаштырып, Жүйүт жерине жана Эпрайым уруусуна таандык жердеги атасы Аса басып алган шаарларга күзөтчүлөрдүн топторун койду.+
3 Ал чоң аталарынан болгон Дөөтүнүн жолун жолдогондуктан+ жана Баалдарга сыйынбагандыктан, Жахаба аны колдоп жатты.
4 Жошапат дайыма атасынын Кудайынан акыл сурап,+ анын осуяттарын аткарды, Ысрайылдын эли кылган иштерди кылган жок.+
5 Жахаба анын падышалык бийлигин бекемдей берди.+ Жүйүт жериндегилердин баары ага белек алып келип турушкандыктан, ал байлыкка тунуп, атак-даңктуу болду.+
6 Жошапат кайраттуу болуп, Жахабанын жолунда жүрдү. Атүгүл Жүйүттөгү сыйына турган бийик жерлерди* жок кылып,+ ыйык мамыларды кыйратты.+
7 Жошапат өзүнүн башкаруусунун үчүнчү жылында Бенкайыл, Обадия, Закарыя, Нетанел жана Микая деген төрөлөрүн чакырып, элди окутканы Жүйүт жериндеги шаарларга жиберди.
8 Аларга кошуп Шемая, Нетания, Зебадия, Асаел, Шемирамот, Жонатан, Адония, Тобиях жана Топадония деген лебилерди, Элишама, Жорам деген дин кызматчыларды да жиберди.+
9 Алар Жахабанын Мыйзам китебин көтөрүп алып, Жүйүт жериндегилерди окута башташты.+ Ошентип, ал жактагы бардык шаарларды кыдырып, элди окутуп жүрүштү.
10 Жахаба Жүйүттүн тегерегиндеги падышалыктардын баарына коркунуч каптаткандыктан, алар Жошапат менен согушкан жок.
11 Пелиштиликтер Жошапатка белек-бечкек жиберип, акчалай да салык төлөшчү. Арабиялыктар болсо салык катары ага 7 700 кочкор, 7 700 теке айдап келишчү.
12 Жошапат барган сайын күчтөнө берди.+ Ал Жүйүт жерине чептерди, кампалары бар шаарларды+ курду,+
13 ошондой эле Жүйүттүн шаарларында көп иштерди жасады. Анын Иерусалимде мыкты жоокерлери бар болчу.
14 Алар уругу боюнча төмөнкүдөй болуп топторго бөлүштүрүлгөн: Жүйүт уруусунан чыккан миң башылар, алардын биринчиси — Аднак башчы. Анын 300 000 мыкты жоокери болгон.+
15 Ага кол алдында 280 000 жоокери бар Жахонан башчы баш ийген.
16 Андан тышкары, ага Жахабага жан-дилинен кызмат кылган Зихри уулу Амасия да баш ийген. Анын 200 000 мыкты жоокери болгон.
17 Ал эми Бенжемин+ уруусунан Элиада деген мыкты жоокер чыккан. Анын жаа, калкан көтөргөн 200 000 жоокери болгон.+
18 Ага кол алдында курал-жаракчан 180 000 жоокери бар Жеозабат баш ийген.
19 Жошапат падышага ал өзү бүт Жүйүт жериндеги+ чептүү шаарларга жайгаштырган жоокерлерден тышкары ушулар да кызмат кылышкан.
