Жылнаама 2-китеп 3:1—17
3 Сулайман Мориа+ тоосундагы Иерусалимге, Жахаба Дөөтүгө көрүнгөн жерге,+ Жахабага арнап ибадаткана* кура баштады.+ Аны атасы Дөөтү даярдап койгон жебустук Орнандын+ кырманына кура баштады.
2 Ал курулушту өзүнүн башкаруусунун төртүнчү жылында экинчи айдын экинчи күнү баштады.
3 Сулайман куруп жаткан чыныгы Кудайдын ибадатканасынын пайдубалынын узундугу, мурунку чен-өлчөм боюнча, 27 метр, туурасы+ 9 метр* болду.
4 Ибадаткананын алдындагы бөлмөнүн узундугу 9 метр болду, ал ибадаткананын туурасы менен бирдей эле. Бийиктиги болсо 9 метр* болду. Ал анын ичин таза алтын менен каптады.+
5 Чоң бөлмөнүн дубалдарын адегенде арча тактай менен, анан анын үстүнөн жогорку сапаттагы алтын менен каптап,+ курма дарагынын сүрөттөрү,+ чынжырчалар+ менен кооздоп койду.
6 Андан сырткары, ибадаткананы кымбат баалуу таштар+ менен кооздоду. Алтынды+ болсо Парваимден алып келген эле.
7 Ибадаткананы, анын төрт кырдуу устундарын, эшиктери менен алардын босоголорун, дубалдарын алтын менен каптап,+ керуптардын сүрөтүн түшүрдү.+
8 Андан кийин Ыйыктын ыйыгы делген бөлмөнү жасады.+ Анын узундугу 9 метр болду, ал ибадаткананын туурасы менен бирдей эле. Туурасы да 9 метр болду. Анан аны жогорку сапаттагы алтын менен каптады. Аны каптаганга 20 тонна 500 килограммдай* алтын кетти.+
9 Мыктарына 570 грамм* алтын кетти. Ал үстүнкү бөлмөлөрдү да алтын менен каптады.
10 Ыйыктын ыйыгына коюш үчүн эки керуп жасап, аларды алтын менен каптады.+
11 Керуптардын канаттарынын+ жалпы узундугу 9 метр болду. Бир керуптун бир канаты 2 метр 25 сантиметр* болду, экинчи канаты да ошончо болду. Анын бир канаты үйдүн дубалына, экинчиси экинчи керуптун канатына тийип турду.
12 Экинчи керуптун да эки канаты тең 2 метр 25 сантиметрден болду. Анын да бир канаты үйдүн дубалына, экинчиси берки керуптун канатына тийип турду.
13 Керуптардын жайылган канаттарынын жалпы узундугу 9 метр болду. Алар Ыйык жай тарапты карап турчу.
14 Андан сырткары, ал көк жиптен, кызгылт көк жиптен, кочкул кызыл түстөгү жүндөн жана өзгөчө чебердик менен токулган кездемеден көшөгө+ жасап, ага керуптардын сүрөтүн саймалап түшүрдү.+
15 Анан ибадаткананын алдына орнотконго узундугу 16 метрдей* болгон эки жез мамы,+ ал эми алардын ар биринин үстүнө бийиктиги 2 метр 25 сантиметр болгон 2 таажы жасады.+
16 Ошондой эле чынжырчаларды жасап, мамылардын жогору жагына шурудай кылып такты. Анан 100 анар жасап, аларды ошол чынжырчаларга бекитти.
17 Мамыларды ибадаткананын алдына: бирин оң жагына*, экинчисин сол жагына* орнотуп, оң жагындагысын Жахин* деп, сол жагындагысын Бууз* деп атады.
Шилтемелер
^ Сөзмө-сөз: «үй».
^ Сөзмө-сөз: «узундугу 60, туурасы 20 чыканак». Б14 тиркемесин кара.
^ Же: «20 чыканак». Байыркы кол жазмалардын айрымдарында «120» деп жазылган, ал эми башка кол жазмалар менен айрым котормолордо «20 чыканак» деп жазылган.
^ Сөзмө-сөз: «600 талант». Б14 тиркемесин кара.
^ Сөзмө-сөз: «50 шекел». Б14 тиркемесин кара.
^ Сөзмө-сөз: «5 чыканак».
^ Сөзмө-сөз: «35 чыканак».
^ Же: «түштүк тарабына».
^ Же: «түндүк тарабына».
^ Мааниси: «ал [башкача айтканда, Жахаба] бекемдесин».
^ Сыягы, «күчү менен» дегенди билдирген жана Жахин деген мамынын аталышы окулгандан кийин окулган.
