Жылнаама 2-китеп 34:1—33
34 Жошия+ 8 жашында такка отуруп, Иерусалимде 31 жыл падышалык кылды.+
2 Ал Жахабанын көз алдында туура иштерди кылды. Ата бабаларынан болгон Дөөтүнүн жолун жолдоп, андан оңго да, солго да бурулган жок.
3 Жошия өзүнүн башкаруусунун сегизинчи жылында, өспүрүм кезинде эле, чоң аталарынан болгон Дөөтүнүн Кудайына кызмат кыла баштады,+ ал эми башкаруусунун он экинчи жылында Жүйүт жери менен Иерусалимдеги+ ыйык мамылардын, оюлуп жасалган буркандар+ менен куйма буркандардын, жалган кудайларга сыйына турган бийик жерлердин+ баарын жок кыла баштады.
4 Анын көзөмөлү астында Баалдардын курмандык жайларын талкалашты. Ал алардын үстүндөгү жыпарзат түтөткүчтөрдү талкалады. Ошондой эле ыйык мамыларды, оюлуп жасалган буркандар менен куйма буркандарды кыйратып, майдалап салды да, аларды курмандык чалгандардын мүрзөлөрүнө чачып салды.+
5 Дин кызматчылардын сөөктөрүн болсо өздөрү колдонгон курмандык жайларынын үстүндө өрттөдү.+ Ошентип, Жүйүт жери менен Иерусалимди тазалады.
6 Андан тышкары, ал Менаше, Эпрайым,+ Шымон жана Напталы урууларына таандык шаарлар менен алардын тегерегиндеги урандылардын арасындагы
7 курмандык жайларын кыйратып, ыйык мамылар менен оюлуп жасалган буркандардын+ таш-талканын чыгарып, бүт Ысрайыл жериндеги жыпарзат түтөткүчтөрдү талкалап таштады.+ Андан кийин Иерусалимге кайтып келди.
8 Жошия ал жерди жана Кудайдын ибадатканасын тазалагандан кийин өзүнүн башкаруусунун он сегизинчи жылында Азалиянын уулу Шапанды,+ шаар башчысы Маасеяны, Жоахаздын уулу жылнаамачы Жоахты Жахаба Кудайынын ибадатканасын оңдогону жиберди.+
9 Алар башкы дин кызматчы Хилкияга барып, Кудайдын ибадатканасына алынып келген акчаны тапшырышты. Ал акчаны дарбазачы лебилер Менаше менен Эпрайым уруусунан жана башка ысрайылдыктардан,+ ошондой эле Жүйүт менен Бенжемин уруусунан, Иерусалимдин тургундарынан чогултушкан болчу.
10 Анан ал акчаны Жахабанын ибадатканасында жүргүзүлүп жаткан ишке көзөмөл кылгандарга беришти. Жахабанын ибадатканасындагы иштерди аткаргандар болсо аны ибадаткананын бузулган жерлерин оңдоп, калыбына келтиргенге жумшашты.
11 Жылмаланган таш, бириктирип бекиткенге устун жана Жүйүттүн падышаларынын айынан бузулуп калган имараттардын устундарын алмаштырганга жыгач сатып алышы үчүн, акчанын бир бөлүгү усталар менен куруучуларга берилди.+
12 Алар ишти чынчылдык менен аткарып жатышты.+ Аларды көзөмөлдөп турганга лебилер — Мераринин урпактарынан+ Обадия менен Жахат, Кааттын урпактарынан+ Закарыя менен Мешулам — дайындалды. Аспаптарда жакшы ойногон лебилер+
13 кара жумуш кылгандар* менен ар кандай иштерди аткарган башка жумушчулардын баарын көзөмөлдөп турганга дайындалды. Кээ бирөөлөрү болсо катчы, башчы, дарбазачы болуп кызмат кылды.+
14 Жахабанын ибадатканасына алынып келген акчаны алып чыгып жатышканда,+ дин кызматчы Хилкия Жахабанын Муса аркылуу берген+ Мыйзам китебин+ таап алды.
15 Анан ал катчы Шапанга: «Мен Жахабанын ибадатканасынан Мыйзам китебин таап алдым» — деп, аны ага берди.
16 Шапан китепти алып, падышага барды да: «Кызматчыларыңыз тапшырылган иштин баарын аткарып жатышат.
17 Алар Жахабанын ибадатканасындагы кутуларга чогулган акчаны алып, дайындалган кишилер менен жумушчуларга беришти»,— деди.
18 Анан падышага: «Дин кызматчы Хилкия мага бул китепти берди»+ — деп, аны падышанын алдында окуй баштады.+
19 Мыйзамда жазылгандарды укканда падыша кийимин айрып жиберди.+
20 Анан Хилкияга, Шапандын уулу Ахикамга,+ Микейдин уулу Абдонго, катчы Шапанга жана өзүнүн кызматчысы Асаяга:
21 «Барып, Жахабадан мен жөнүндө, Ысрайыл менен Жүйүт жеринде калгандар жөнүндө, бул китепте жазылгандар жөнүндө сурагыла. Анткени ата-бабаларыбыз бул китепте жазылган сөздөргө кулак какпай, Жахабанын сөзүн аткарбай коюшкандыктан, Жахаба бизге каарын төккөнү жатат»,— деди.+
22 Хилкия жана падыша жиберген башка кишилер Хулда деген пайгамбар аялга+ барышты. Ал Хархастын небереси, Тикпанын уулу кийим сакталган жайга* жооптуу Шалумдун аялы эле. Хулда Иерусалим шаарынын жаңы конушунда жашачу. Падыша жиберген кишилер Хулда менен ошол жактан сүйлөшүштү.+
23 Хулда аларга мындай деди: «Ысрайылдын Кудайы Жахаба мындай дейт: „Силерди мага жиберген кишиге:
24 “Жахаба мындай дейт: “Мен бул жерге да, тургундарына да алаамат жиберип,+ аларды Жүйүттүн падышасынын алдында окулган китептеги каргыштарга калтырам.+
25 Анткени алар мени таштап,+ башка кудайларга курмандык түтүнүн түтөтүп, кылган нерселери менен мени капалантышты.+ Мына ошон үчүн бул жерге каарымды төгөм, аны эч нерсе баса албайт””,+— деп айтып баргыла“.
26 Силерди Жахабадан сураганы жиберген Жүйүттүн падышасына мындай дегиле: „Ысрайылдын Кудайы Жахаба мындай дейт: ”Сен уккан сөздөр тууралуу айта турган болсом,+
27 “Бул жерге да, тургундарына да каршы айткан сөздөрүмдү уккандан кийин тоң моюндук кылбай, менин алдымда моюн сунганың үчүн, кийимиңди айрып, ыйлаганың үчүн, үнүңдү уктум,+— дейт Жахаба.—
28 Ошондуктан мен бул жер менен анын тургундарына жибере турган алааматты көрбөйсүң, тынч мезгилде көз жумуп, мүрзөгө коюласың”“».+
Падыша жиберген кишилер мунун баарын ага айтып барышты.
29 Ошондо падыша киши жиберип, Жүйүт жери менен Иерусалимдеги аксакалдардын баарын чакыртты.+
30 Анан Жахабанын ибадатканасына барды. Жүйүт жери менен Иерусалимдин бардык тургундары, дин кызматчылар, лебилер — бүт эл, жашынан карысына чейин, аны менен кошо барды. Падыша аларга Жахабанын ибадатканасынан табылган келишим жазылган Мыйзам китебин бүт окуп берди.+
31 Анан турган жеринен Жахабанын алдында аны менен келишим түздү*.+ Ал Жахабанын жолунда жүрөрүн, китепте жазылган келишимди сактап,+ анын осуяттарына, мыйзамдары менен эскертүүлөрүнө кулак кагып, аларды бүт жүрөгү, бүт жаны менен+ аткарарын айтып келишим түздү.
32 Иерусалимде жана Бенжемин уруусунун жеринде жашагандардын баарын ошол келишимге кошулганга чакырды. Ошентип, Иерусалимдин тургундары Кудайдын, ата-бабаларынын Кудайынын, келишимине ылайык жашай башташты.+
33 Андан кийин Жошия ысрайыл эли жашаган бардык жерлердеги жийиркеничтүү нерселерди* бүт жок кылып,+ Ысрайылда жашагандардын баарына Жахаба Кудайына кызмат кылганга жардам берди. Жошиянын көзү өткүчө, алар ата-бабаларынын Кудайы Жахабанын жолунан четтешкен жок.
Шилтемелер
^ Же: «жүк көтөргөндөр».
^ Сыягы, дин кызматчылардын же падышанын кийимдери сакталган бөлмө.
^ Же: «кайра түзүп, жаңыртты».
^ Же: «буркандарды».
