Жылнаама 2-китеп 35:1—27
35 Жошия Иерусалимде Жахабага арнап Куткарылуу майрамын+ өткөрдү. Биринчи айдын он төртүнчү күнү+ ошол майрамга арнап көп мал союшту.+
2 Жошия дин кызматчыларга милдеттерин тапшырып, аларды Жахабанын ибадатканасындагы өз кызматын аткарганга үндөдү.+
3 Анан Жахабанын алдында ыйык деп эсептелген лебилерге, бүт Ысрайылдын устаттарына:+ «Ыйык сандыкты Ысрайыл падышасы Дөөтүнүн уулу Сулайман курган ибадатканага койгула.+ Мындан ары аны ийниңерге көтөрүп жүрүштүн зарылдыгы жок.+ Эми Жахаба Кудайыңар менен анын элине, ысрайылга, кызмат кылганга киришкиле.
4 Ысрайыл падышасы Дөөтү менен уулу Сулайман жазган көрсөтмөгө ылайык, уругуңар боюнча бөлүнгөн тобуңар+ менен кызмат кылганга даярдангыла.+
5 Уругуңар боюнча топторго бөлүнүп, ыйык жерде тургула. Ар бир тобуңар башка ысрайылдыктардын уругу боюнча бөлүнгөн тобуна кызмат кылсын.
6 Майрамга арналып курмандыкка чалына турган малдарды сойгула,+ анан тазалануу расмисинен өтүп, Жахабанын Муса аркылуу айткан сөзүн аткарыш үчүн, туугандарыңарга керектүү нерселерди даярдагыла»,— деди.
7 Жошия элге, ал жердегилердин баарына, Куткарылуу майрамында союлчу курмандык үчүн эркек козу менен эркек улактан 30 000ди, бодо малдан 3 000ди берди. Мунун баарын падыша өзүнүн малынан берди.+
8 Анын төрөлөрү да элге, дин кызматчылар менен лебилерге өз ыктыяры менен тартуу беришти. Чыныгы Кудайдын ибадатканасындагы башчылар Хилкия,+ Закарыя менен Жехиел ошол майрамда союлчу курмандыкка деп дин кызматчыларга 2 600 майда мал, 300 бодо мал беришти.
9 Лебилердин башчылары Канания жана анын бир тууган инилери Шемая менен Нетанел, ошондой эле Хашабия, Жиел, Жозабаттар майрамда чалына турган курмандыкка деп лебилерге 5 000 майда мал, 500 бодо мал беришти.
10 Ошентип, кызматты башташ үчүн бардыгын даярдап бүтүштү. Падышанын буйругу боюнча, дин кызматчылар ордуларына турушту, лебилер да өз тобу менен+ ордуларына турушту.
11 Анан Куткарылуу майрамындагы курмандыктар союла баштады.+ Лебилер союлган малдын терисин сыйрып жатышты.+ Дин кызматчылар болсо алар берген канды курмандык жайына чачыратып жатышты.+
12 Ошондой эле лебилер бүтүндөй өрттөлчү курмандыктарды даярдап, уругу боюнча бөлүнгөн элге таратып беришти. Эл ал курмандыктарды, Мусанын китебинде жазылгандай, Жахабага тартуу кыла алышы үчүн, ошентишти. Бодо малды да ошондой кылышты.
13 Куткарылуу майрамындагы курмандыкты адаттагыдай эле отко бышырышты*.+ Ыйык тартуулардын баарын мискейге, ар кандай казандарга салып бышырып, дароо элге таратышты.
14 Андан кийин лебилер өздөрү менен дин кызматчылар үчүн Куткарылуу майрамындагы тамакты даярдашты. Анткени Арундун урпактары болгон дин кызматчылар бүтүндөй өрттөлчү курмандыктар менен майларды өрттөп, түн киргенге чейин бошогон жок. Ошондуктан лебилер тамакты өздөрү үчүн да, Арундун урпактары болгон дин кызматчылар үчүн да даярдашты.
15 Асаптан+ тараган ырчылар, мурун Дөөтү,+ Асап,+ Хеман жана падышанын көрөгөчү Жедутун+ бекиткен тартип боюнча, өздөрүнүн ордунда турушту. Дарбазачылар болсо дарбазалардын жанында турушту.+ Алар өздөрүнүн кызматынан алаксыган жок, анткени алардын туугандары, башка лебилер, алар үчүн да Куткарылуу майрамындагы тамакты даярдашты.
16 Жошия падышанын буйругу боюнча, ошол күнү Куткарылуу майрамына+ байланыштуу Жахабанын алдында аткарылчу кызмат үчүн жана Жахабанын курмандык жайында бүтүндөй өрттөлчү курмандыктарды чалыш үчүн талап кылынган нерселердин баары даяр болду.+
17 Ошентип, ал жерге чогулган ысрайылдыктар Куткарылуу майрамын белгилешти. Андан соң 7 күн Калама майрамын өткөрүштү.+
18 Ысрайылда андай Куткарылуу майрамы Шемуел пайгамбардын күндөрүнөн бери өткөрүлө элек болчу. Жошия, дин кызматчылар, лебилер, бүт Жүйүт жери менен Ысрайылдан келгендер жана Иерусалимдин тургундары өткөргөн андай Куткарылуу майрамын Ысрайыл падышаларынын бири да өткөргөн эмес эле.+
19 Ал Куткарылуу майрамы Жошиянын башкаруусунун он сегизинчи жылында белгиленди.
20 Ушул окуялардан кийин жана Жошия ибадаткананы калыбына келтиргенден кийин, Мисир падышасы Нехо+ согушуш үчүн Эфраттын жанындагы Каркемишке келди. Жошия аны менен беттешкени чыкты.+
21 Нехо кишилерин жөнөтүп, ага: «Жүйүт падышасы, эмнеге мага каршы чыгып жатасың? Мен бүгүн сени менен эмес, башка эл менен согушканы баратам. Чамдашым керектигин мага Кудай өзү айтты. Балээге кабылбайын десең, мени колдоп жаткан Кудайга каршы чыкпа. Болбосо ал сени мерт кылат»,— деп айттырды.
22 Бирок Жошия артка кайткан жок. Ал Нехонун Кудай айттырган сөздөрүн укпай, таанылбаш үчүн башкача кийинип алып,+ аны менен согушканы жөнөдү. Ошентип, ал Мегидо+ өрөөнүнө барды.
23 Ал жактан жаачылар Жошия падышаны жарадар кылышты. Ал кызматчыларына: «Мени бул жерден алып кеткиле, катуу жарадар болдум»,— деди.
24 Кызматчылары аны согуш арабасынан түшүрүп, экинчи согуш арабасына салып, Иерусалимге алып келишти. Ошентип, Жошия каза болуп, сөөгү ата-бабалары коюлган көрүстөнгө коюлду.+ Бүт Жүйүт менен Иерусалимдин тургундары аны жоктоп ыйлашты.
25 Жеремия+ пайгамбар Жошияны жоктоп кошок кошту, ырчы эркек-аялдар+ да ушу күнгө чейин аны жоктоп кошок кошушат. Ошол кошок ырларын ырдоо Ысрайылда салтка айланды. Алар кошоктор жазылган китепте жазылган.
26 Жошиянын жашоосунда болгон башка окуялар, Жахабанын Мыйзамында жазылгандарды аткарып көрсөткөн сүйүүсү*,
27 кылган иштери башынан аягына чейин Ысрайыл менен Жүйүт падышалары жөнүндөгү китепте жазылган.+
