Жылнаама 2-китеп 36:1—23
36 Андан кийин эл Иерусалимде Жошиянын уулу Жахазды+ атасынын ордуна падыша кылды.+
2 Жахаз 23 жашында такка отуруп, Иерусалимде 3 ай башкарды.
3 Мисир падышасы аны Иерусалимдеги бийлигинен ажыратып, анын жерине 3 тонна 400 килограммдай* күмүш, 34 килограммдай* алтын салык салды.+
4 Андан сырткары, Мисир падышасы Нехо+ Жахаздын бир тууганы Элиакимди Жүйүт жери менен Иерусалимге падыша кылып, атын Жаяким деп өзгөрттү. Жахазды болсо Мисирге алып кетти.+
5 Жаяким+ 25 жашында такка отуруп, Иерусалимде 11 жыл падышалык кылды. Ал Жахаба Кудайынын көз алдында жаман иштерди кылды.+
6 Бабыл падышасы Небухаданасар+ аны 2 жез кишен менен кишендеп, Бабылга алып кетиш үчүн ага каршы согушканы келди.+
7 Ал Жахабанын ибадатканасындагы буюмдардын айрымдарын Бабылга алып барып, ак сарайына коюп койду.+
8 Жаякимдин жашоосунда болгон башка окуялар, анын кандай жийиркеничтүү иштерди кылганы жана ага байланышкан жаман нерселердин баары Ысрайыл менен Жүйүттүн падышалары жөнүндөгү китепте жазылган. Анын ордуна уулу Жаякин падыша болду.+
9 Жаякин+ 18 жашында такка отуруп, Иерусалимде 3 ай 10 күн бийлик жүргүздү. Ал Жахабанын алдында жаман иштерди көп кылды.+
10 Жылдын башында* Небухаданасар падыша ага кишилерин жиберди.+ Алар аны жана Жахабанын ибадатканасындагы баалуу буюмдарды Бабылга алып кетишти.+ Ал Жаякиндин ордуна анын атасынын иниси Ситкияны Жүйүт жери менен Иерусалимге падыша кылды.+
11 Ситкия+ 21 жашында такка отуруп, Иерусалимде 11 жыл падышалык кылды.+
12 Ал Жахаба Кудайынын көз алдында жаман иштерди кыла берди, Жахабанын буйругу менен келип, ага эскерткен Жеремия пайгамбардын алдында моюн сунган жок.+
13 Андан тышкары, Ситкия ага Кудайдын алдында ант бердирткен Небухаданасар падышага каршы чыкты.+ Ал тоң моюндук кылып, кежирленип, Ысрайылдын Кудайы Жахабага баш ийгиси келген жок.
14 Дин кызматчылардын башчылары менен эл да баш ийбестик кылып, башка элдер кылган жийиркеничтүү иштерди барган сайын көбүрөөк кыла беришти, Жахабанын Иерусалимдеги өзү ыйыктаган ибадатканасын арамдашты.+
15 Алардын ата-бабаларынын Кудайы Жахаба өз элин аягандыктан, ибадатканасынын талкаланышын каалабагандыктан аларга эскертиш үчүн кайра-кайра кабарчыларын жөнөттү.
16 Бирок алар чыныгы Кудайдын кабарчыларын мазактап,+ анын сөзүн баркка албай,+ пайгамбарларын шылдыңдай беришти.+ Акырында Жахаба элине каарданды,+ себеби алар оңолгус болуп калышкан эле.
17 Кудай аларга каздимдиктердин* падышасын жиберди.+ Ал алардын ыйык жайында+ улан-жигиттерин кылычтап өлтүрдү,+ алардын улан-жигиттерин да, кыздарын да, карыларын да, оорукчандарын да аяган жок.+ Кудай бардыгын анын колуна салып берди.+
18 Каздимдиктердин падышасы чыныгы Кудай Жахабанын ибадатканасындагы буюмдардын чоң-кичинесинин баарын, ал жактагы баалуу нерселерди, падыша менен анын төрөлөрүнүн бүт кымбат баалуу буюмдарын Бабылга алып кетти.+
19 Ошондой эле чыныгы Кудайдын ибадатканасын өрттөп,+ Иерусалимдин дубалын уратып салды.+ Ал жактагы чептүү мунараларды өрттөп, баалуу нерселердин баарын талкалады.+
20 Кылычтан аман калгандарын болсо Бабылга туткундап кетти.+ Алар Бабылдын падышасы менен анын уулдарына Персия падышалыгы бийлик кыла баштаганга чейин+ кызмат кылышты.+
21 Ошентип, Жахабанын Жеремия аркылуу айткан сөзү аткарылып,+ алардын жери эс албай калган дем алыш жылдары үчүн эс алды.+ Жер 70 жыл бою ээн калып, эс алды*.+
22 Персия падышасы Корештин*+ башкаруусунун биринчи жылында*, Жахабанын Жеремия аркылуу айткан сөздөрү+ аткарылышы үчүн, Жахаба Персия падышасы Корешке буйрук чыгарганга түрткү берди. Ошол себептен ал бүт падышалыгы боюнча оозеки жана кат жүзүндө мындай деп жарыялоону буйрук кылды:+
23 «Персия падышасы Кореш мындай дейт: „Асмандын Эгедери Жахаба Кудай мага жер жүзүндөгү бүт падышалыктарды багындырып,+ ага арнап Жүйүт жериндеги Иерусалимге ибадаткана кур деп буйрук кылды.+ Ошон үчүн араңардан ким анын элинен болсо, аны Жахаба Кудайы өзү колдосун! Ал Иерусалимге барсын!“»+
Шилтемелер
^ Сөзмө-сөз: «100 талант». Б14 тиркемесин кара.
^ Сөзмө-сөз: «1 талант».
^ Сыягы, жазында.
^ Сөзмө-сөз: «дем алыш жылдарын сактады».
^ Кир II (Улуу Кир).
^ Сыягы, бул Бабылды (Вавилонду) башкара баштаган биринчи жылын билдирет.
