Забур 40:1—17
Жетекчиге. Дөөтүнүн ыры.
40 Мен бүт үмүтүмдү Жахабага арткам*,Ошондуктан ал мага кулак салып*, жардам сурап зарлаганымды укту.+
2 Мени суусу күркүрөгөн аңдан,Сормо саздан чыгарды,Асканын үстүнө тургузду,Коопсуз жерге кадам таштатты.
3 Анан оозума жаңы ыр,+Кудайыбызды даңктоо ырын салды.
Муну көрүп, көптөр кастарлоо сезимине чулганат,Жахабага таянышат.
4 Баш ийбестерге, жалганчыларга кошулбаган,Жахабага таянган киши бактылуу.
5 Оо, Жахаба Кудайым,Сен кандай көп иштерди жасадың,Биз үчүн кылган кереметтериңе сан жетпейт,Дайыма биздин пайдабызды көздөйсүң.+
Сага эч ким тең келбейт;+Ошонун баарын жар салып айткым келет,Бирок аларга эсебим жетпейт!+
6 Сен малдан чалынчу курмандыктар менен башка тартууларды каалаган жоксуң,+Мага айткандарыңды угуп, түшүнгөнгө жардам бердиң.+
Бүтүндөй өрттөлчү курмандыктарды, күнөө үчүн чалынчу курмандыктарды сураган жоксуң.+
7 Ошондуктан мындай дедим: «Мына, мен келдим.
Түрмөктө* мен жөнүндө жазылган.+
8 Оо, Кудайым, эркиңди аткаргандан рахат алам*,+Мыйзамың менин жүрөгүмдө.+
9 Чоң жыйында адилдик жөнүндө жакшы кабар айтам,+Унчукпай калбайм.+
Оо, Жахаба, муну жакшы билесиң.
10 Адилдигиңди жүрөгүмө катып албайм,Ишенимдүү экениңди, элиңди куткарарыңды жарыялайм.
Чоң жыйында туруктуу сүйүүң менен чындыгың жөнүндө жашырбай айтам».+
11 Оо, Жахаба, мага кайрымдуулук кыла бер.
Туруктуу сүйүүңдөн, берилгендигиңден улам мени дайыма коргой көр.+
12 Туш-туштан мени сансыз кырсык басты.+
Кылмыштарым башыман ашып, каякка баратканымды көрбөй калдым,+Алар башымдагы чачымдан да көп;Жүрөгүмдү кайгы басты.
13 Оо, Жахаба, ырайым кылып, мени куткара көр.+
Оо, Жахаба, мага жардам бергенге шашыла көр.+
14 Жанымды алгысы келгендердин баарыМаскара болушсун, уятка калышсын.
Кырсыкка кабылганыма сүйүнгөндөр артка чегинип, басынтылышсын.
15 Мага: «Сооп болуптур! Ушуну көрмөксүң!» — дегендерУят болуп, алдастап калышсын.
16 Ал эми сага кызмат кылгандар+Сени ойлоп кубанып-шаттанышсын.+
Сенин кантип куткарганыңды көрүп суктангандар:
«Жахаба даңазалансын!» — деп тынбай жар салышсын.+
17 Мен болсо бир байкушмун, жакырмын.
Оо, Жахаба, мага назар сала көр.
Сен менин жардамчымсың, куткаруучумсуң.+
Оо, Кудайым, жардамга кечикпей келе көр.+
Шилтемелер
^ Же: «Жахабаны чыдап күткөм».
^ Же: «эңкейип».
^ Сөзмө-сөз: «Түрмөк түрүндөгү китепте».
^ Же: «аткаргым келет».
