Колосалыктарга 1:1—29
1 Кудайдын эрки менен Машаяк* Исанын элчиси болгон Пабылдан жана бир тууганыбыз Тиметейден+
2 Колосада жашаган боордошторубузга*, Машаяктын жолун жолдогон* ишенимдүү шакирттерге:
Асмандагы Атабыз Кудай силерге ырайымын төгүп, тынчтык берсин.
3 Силер үчүн тиленгенибизде Кудайга, Мырзабыз Иса Машаяктын Атасына, ар дайым ыраазычылык айтабыз.
4 Себеби Машаяк Исага болгон ишенимиңер, бардык бир туугандарыбызга* болгон сүйүүңөр жөнүндө укканбыз.
5 Асманда өзүңөр үчүн сакталган нерсеге үмүттөнгөндүктөн силерде ошондой ишеним менен сүйүү бар.+ Ал үмүт жөнүндө болсо чындыкты, тактап айтканда, жакшы кабарды* укканда билгенсиңер.
6 Силерге жеткен ошол жакшы кабар жемиш берип, бүт дүйнөгө кандай тарап жатса,+ Кудайдын ырайымы тууралуу угуп, анын кандай экенин билгениңерден бери силердин араңарда да ошондой тарап жатат.
7 Силер Кудайдын ырайымы жөнүндө Машаяктын бизге окшогон эле кулу болгон сүйүктүү Эпафрастан+ уккансыңар. Машаяктын ишенимдүү кызматчысы катары ал силерге биздин ордубузга кызмат кылып жатат.
8 Ал бизге Кудайдын ыйык рухунун* жардамы менен өрчүткөн сүйүүңөр жөнүндө да айтып берди.
9 Ошондуктан биз бул жөнүндө уккан күндөн тартып Кудайдан анын эркин так таанып-билишиңерди,+ чыныгы акылмандыкка жана ыйык рух берген түшүнүккө ээ болушуңарды+ тилеп келатабыз.+
10 Ошонун аркасында Жахаба* Кудай даңкталгыдай жашап, ага бардык жагынан жагышыңарды, жакшы иштерди кылышыңарды, Кудай жөнүндөгү так билимиңерди дагы да тереңдете беришиңерди тилеп жатабыз.+
11 Акырына чейин чыдап, кубанычыңарды жоготпой, туруктуу болушуңар үчүн, кудурети улуу Кудай баарыңарга күч-кубат берсе экен.+
12 Анткени силер жарыкта жүргөн боордошторубуздун* мурасына+ татыктуу болгонго жардам бергени үчүн асмандагы Атабызга ыраазычылык билдирип келесиңер.
13 Ал бизди караңгылыктан чыгарып*,+ сүйүктүү Уулунун падышалыгына киргизди.
14 Төлөнгөн кундун негизинде Уулу аркылуу боштондукка чыктык, күнөөлөрүбүз кечирилди.+
15 Ал — көрүнбөс Кудайдын бейнеси,+ жаратылгандардын баарынын туңгучу.+
16 Анткени асмандагы жана жердеги башка нерселердин баары: көзгө көрүнгөн да, көрүнбөгөн да нерселер,+ башкаруучулар же бийлиги барлар болобу, өкмөттөр же бийликтер болобу, ал аркылуу жаратылган. Баары ал аркылуу+ жана ал үчүн жаратылган.
17 Ал баарынан мурун бар болгон+ жана калган нерсенин баары ал аркылуу жаратылган.
18 Ал — дененин башы, мындайча айтканда, жыйналыштын башчысы.+ Бардык нерседе биринчи болушу үчүн, өлгөндөрдүн арасынан биринчи болуп тирилген,+ ал — бардык нерсенин башталышы.
19 Кудай өзүнүн бардык касиет-сапаттарынын анда болушун каалаган,+
20 ошондой эле ал аркылуу, тактап айтканда, анын жаза устунунда* төгүлгөн каны аркылуу+ тынчтыкка жол ачып, жер менен асмандагылардын баарын өзү менен элдештирүүнү туура көргөн.+
21 Жалаң жаман иштерди ойлогондуктан силер бир кездерде Кудайдан алыс элеңер, ага душман болчусуңар.
22 Азыр болсо ал силерди өз өмүрүн берген Уулунун денеси аркылуу өзү менен элдештирди. Муну өзүнүн алдында ыйык, кемчиликсиз, айыпсыз болушуңар үчүн кылды.+
23 Бирок ал үчүн мындан ары да ишенимиңерге жараша жашап,+ анын пайдубалынын үстүндө козголбой бекем туруп,+ туруктуу болуп,+ өзүңөр уккан жакшы кабарга негизделген үмүтүңөрдү өчүрбөшүңөр керек. Ал кабар асман астындагы бардык адамдарга жарыяланды.+ Мен, Пабыл, ошол жакшы кабарды жарыялаганга дайындалгам.+
24 Азыр силер үчүн азап тартып жатканыма кубанып жатам,+ бирок Машаяктыкындай кыйынчылыктарды башыман дагы да өткөрүшүм керек.+ Себеби бул Машаяктын денесине — жыйналышка+ — пайда алып келет.
25 Мен ошол жыйналышка кызмат кылып жатам, анткени Кудай силердин пайдаңар үчүн мага ушул жоопкерчиликти тапшырган.+ Ошон үчүн Кудайдын сөзүн толук жарыялаганга,
26 башкача айтканда, ыйык сырды+ жарыялаганга милдеттүүмүн. Мурунку замандарда* жана мурунку муундарга жашыруун болуп келген+ ал сыр азыр анын ыйык кызматчыларына ачылып берилди.+
27 Кудай аларга башка элдердин арасында ачылып берилген ошол ыйык сырды, улуу байлыкты, ачып берүүнү ылайык көрдү.+ Ал сыр — силер менен биримдикте болгон Машаяк, аны менен чогуу даңкталууга болгон үмүтүңөр.+
28 Машаяк менен биримдикте болгондордун баарына Кудайдын алдында жетилген шакирт болгонго жардам бериш үчүн ар бирине насаат айтып, чыныгы акылмандык менен үйрөтүп, Машаяк жөнүндө жарыялап жатабыз.+
29 Ошол максатка жетиш үчүн мен колумдан келишинче аракеттенип, анын мага күчтүү таасир этип жаткан күчү менен жан үрөп эмгектенип жатам.+
Шилтемелер
^ Же: «Машаяк менен биримдикте болгон».
^ Сөзмө-сөз: «ыйыктарга».
^ Б. а. ыйык күчүнүн.
^ Сөзмө-сөз: «ыйыктардын».
^ Сөзмө-сөз: «караңгылыктын бийлигинен куткарып».
