Корунттуктарга 2-кат 11:1—33
11 Силерге анча-мынча акылсыздай көрүнсөм да, мага чыдап коюшуңарды каалаар элем. Бирок силер ансыз деле чыдап келатасыңар!
2 Мен силерди бир күйөө менен — Машаяк менен — баш коштурам деп силерге убада берип койгондуктан, ага таза бойдон, кыз бойдон тапшыргым келет.+ Ошондуктан силерди Кудай коргогондой коргогум келет*.
3 Жылан куулук кылып Обо энени азгырып кеткендей,+ Машаяк татыктуу болгон таза сүйүүңөрдү өчүрүп, аруу болбой калышыңар үчүн, кимдир бирөө силердин да оюңарды бузуп койбосо экен деп корком.+
4 Буларды айтканымдын себеби: кимдир бирөө келип, биз айткандан башка Иса жөнүндө айтса же акылыңарга мурун таасир этип келген күчтөн* башка күч таасир этип жатса, же бирөө өзүңөр кабыл алгандан башка жакшы кабарды айтса,+ ошонун баарына жол берип жатасыңар.
5 Мен болсо мыкты деп эсептелген элчилериңерден эч нерсем кем эмес деп ойлойм.+
6 Сөзгө чечен болбосом да,+ Кудай жөнүндөгү билимим тайкы эмес. Муну силерге бардык жагынан ар кандай жолдор менен айкын көрсөттүк.
7 Же силердин зоболоңор көтөрүлүшү үчүн өзүмдү басынтканым, Кудайдын жакшы кабарын силерге чын жүрөктөн акысыз эле жарыялаганым, эмне, күнөө болду беле?+
8 Силерге кызмат кылыш үчүн башка жыйналыштардан жардам алып, аларды тоногондой эле болгом.+
9 Бирок силердин араңарда жүрүп муктаж болгонумда эч кимиңерге жүк болгон эмесмин. Анткени Македониядан келген бир туугандарыбыз кем-карчымды ашыгы менен толукташкан.+ Ооба, мен силерге эч бир жагынан жүк болбогонго аракеттенгем, дагы да аракеттене берем.+
10 Машаяктын жолдоочусу болуп жүргөнүмдө ушуну айтып бүтүндөй Ахая аймагындагыларга мындан ары да мактана берем.+
11 Мен эмне үчүн силерден эч нерсе алган эмесмин? Силерди сүйбөгөндүктөнбү? Сүйөрүмдү Кудай жакшы билет.
12 Айрымдар өздөрүнүн биздей эле элчилер экенин айтып мактанып жатышат. Ошондуктан алар мактанганга себеп таба албашы үчүн, азыр кандай кылып жатсам, мындан ары да ошондой кыла берем.+
13 Алар — жалган элчилер, өздөрүн Машаяктын элчилери кылып көрсөткөн алдамчылар.+
14 Мунун таң калыштуу деле эч нерсеси жок, анткени Шайтан да өзүн жакшы периште* кылып көрсөтөт.+
15 Ошон үчүн анын кызматчылары да өздөрүн туура иш кылып жаткандай кылып көрсөтсө, бул таң калыштуу деле эмес. Бирок акырында алар иштерине жараша тиешесин алышат.+
16 Дагы айтам: эч ким мени акылсыз деп ойлобосун. Силерге ошондой көрүнгөн күндө да, мага чыдап койгула, мен да бир аз мактанайын.
17 Азыр мен Мырзабыздан үлгү алган кишидей эмес, өзүнө ишенген, мактанчаак, акылсыз кишидей айтып жатам.
18 Көптөр бул дүйнөдөгү нерселер менен мактангандыктан, мен да ошол нерселер менен мактанам.
19 Силер өзүңөрдү акылдуубуз деп эсептейт эмессиңерби, анда кантип акылсыздарга эч нерсе дебей эле чыдап жүрөсүңөр?
20 Атүгүл өзүңөрдү кул кылгандарга да, мүлкүңөрдү, колуңарда болгонду тартып алып, жеп-жуткандарга да, өздөрүн көтөрүп, силерди басынткандарга да, силерди жаакка чапкандарга да чыдап келатасыңар.
21 Муну айтып жатканыбызга уялып жатабыз, себеби айрымдарыңарга алсыздай, бийлигибизди колдоно албагандай көрүнүшүбүз мүмкүн.
Бирок башкалар уялбай эле мактанып жатса, анда мен да, акылсыздай көрүнсөм да, уялбай эле мактанам.
22 Алар еврейби? Мен да евреймин.+ Алар ысрайылдыкпы? Мен да ысрайылдыкмын. Алар Ыбрайымдын тукумубу? Мен да Ыбрайымдын тукумумун.+
23 Алар Машаяктын кызматчыларыбы? Акылсыз кишидей айтайын, мен алда канча мыкты кызматчысымын. Себеби аларга караганда көп эмгектендим,+ көп жолу түрмөдө отурдум,+ далай жолу таяк жедим, көп жолу өлүмдөн калдым.+
24 Жүйүттөр менден 5 жолу 39дан балак алышты.+
25 Үч жолу таяк менен сабашты,+ бир жолу таш бараңга алышты,+ үч жолу кеме кырсыгына учурадым,+ бир күн, бир түн деңиздин ортосунда калдым.
26 Көп жолу сапарга чыктым; мага дарыяларда да коркунуч, каракчылар тарабынан да коркунуч, өз элим тарабынан да коркунуч,+ башка элдер тарабынан да коркунуч,+ шаарда да коркунуч,+ ээн талаада да коркунуч, деңизде да коркунуч, жалган шакирттердин арасында да коркунуч туулду.
27 Кара жанымды карч уруп эмгектендим, көп жолу уйкудан калдым,+ ачка болдум, сууга жетпей чаңкадым,+ көп жолу тамак-ашсыз калдым,+ суукка тоңдум, кийимсиз калдым.
28 Мындай кыйынчылыктардан тышкары, бардык жыйналыштардагы бир туугандарыбызды ойлоп, күн сайын тынчым кетет.+
29 Бирөө жардамга муктаж болсо, кантип боорум ачыбай койсун?! Кимдир бирөөнүн ишенимине доо кетсе, кантип каарым кайнабай койсун?!
30 Эгер мактаныш керек болсо, алсыз экенимди көрсөткөн нерселер менен мактанам.
31 Мырзабыз Исанын Кудайы жана Атасы, түбөлүккө даңкталганга татыктуу Кудай, калп айтып жатпаганымды билет.
32 Бир жолу Дамаск шаарында Арета падышанын кол астындагы башкаруучу мени кармаш үчүн шаарды кайтартып койгондо,
33 боордошторум мени себетке салып, шаардын дубалындагы терезеден түшүрүшкөн.+ Ошентип, андан качып кутулгам.
Шилтемелер
^ Же: «Кудай кызгангандай кызганам».
^ Же: «Кудайдын күчүнөн».
^ Сөзмө-сөз: «жарыктын периштеси».
