Корунттуктарга 2-кат 5:1—21
5 Себеби жердеги үйүбүз* — бул чатыр — кыйратылса,+ Кудай бизге асманда адамдын колу менен курулбаган түбөлүктүү үй берерин билебиз.+
2 Чындыгында, биз азыркы үйүбүздө онтоп, асмандагы үйгө кирүүнү* эңсеп жатабыз.+
3 Анткени ага кирсек, турак-жайсыз калбайбыз*.
4 Бул чатырда жашап, кыйналып онтоп жатабыз. Бирок бул үйдү таштап кеткибиз келгендиктен онтоп жаткан жокпуз. Биз асмандагы үйүбүзгө киргибиз келет,+ себеби ошондо өлө турган денебиз түбөлүк өмүр менен алмаштырылат.+
5 Ал жашоого бизди Кудай өзү даярдап,+ келечектеги мурастын кепилдиги* катары бизге өзүнүн ыйык рухун берген.+
6 Ошондуктан биз буга бекем ишенебиз жана азыр, бул денебиз үйүбүз болуп турган убакта, Мырзабыз менен бирге эмес экенибизди билебиз.+
7 Анткени биз көргөнүбүз боюнча эмес, ишенгенибиз боюнча жашап жатабыз.
8 Биз эч шектенбейбиз жана бул денебизди калтырып, Мырзабыз менен бирге болгубуз келет.+
9 Ошондуктан кайсы жакта жашабайлы, Мырзабыз менен чогуубу же жокпу, максатыбыз — ага жагуу.
10 Себеби баарыбыз Машаяктын сот тактысынын алдына барабыз жана ар бирибиз жашообузда* кылган жакшы же жаман иштерибизге жараша тиешебизди алабыз.+
11 Ошондуктан Мырзабыздан коркуу деген эмне экенин түшүнүп, башкаларды бизге ишенгенге ынандырып келебиз. Кудай биздин кандай экенибизди жакшы билет, муну силер да билесиңер* деп үмүттөнөм.
12 Силерге кайрадан өзүбүз жөнүндө айтып, мактангыбыз келген жок. Мунун баарын силерге жүрөктөгү нерсе менен эмес, көзгө көрүнгөн нерселер менен мактангандарга жооп берип, биз менен мактана алышыңар үчүн айтып жатабыз.+
13 Эгер мактанып, акылыбыздан айныгандай көрүнүп жатсак,+ муну Кудай үчүн кылып жатабыз, ал эми акыл-эсибиз ордунда болсо, бул силерге пайда алып келет.
14 Бизге түрткү берген күч — Машаяктын сүйүүсү. Себеби биз муну түшүндүк: бир адам бардыгы үчүн өлгөн,+ анткени баары өлгөн болчу.
15 Ооба, жашап жаткандар эми өздөрү үчүн эмес,+ алар үчүн өлүп, кайра тирилген Машаяк үчүн жашасын деп, ал бардыгы үчүн өлгөн.
16 Биз мындан ары эч кимге пенделик көз караш менен карабайбыз.+ Мурун Машаякка ошондой карасак да, азыр андай карабайбыз.+
17 Ошон үчүн ким Машаяк менен биримдикте болсо, ал — Кудай жараткан жаңы адам;+ эски нерселер жок болуп, жаңы нерселер пайда болду.
18 Бирок мунун баары Кудайдан. Ал бизди Машаяк аркылуу өзү менен элдештирип,+ бизге башкаларга аны менен элдешкенге жардам берүү ишин тапшырды.+
19 Башкача айтканда, Кудай адамдардын күнөөлөрүн эсепке албай,+ аларды Машаяк аркылуу өзү менен элдештирип жатат.+ Бизге болсо адамдарды аны менен элдештире турган кабарды жарыялоону тапшырды.+
20 Ошондуктан биз Машаяктын атынан жиберилген элчилербиз.+ Анын атынан жиберилгендер катары адамдардан: «Кудай менен элдешкиле»,— деп суранабыз. Мындайча айтканда, Кудай биз аркылуу алардан ушинтип өтүнүп жатат.
21 Кудайдын алдында адил болушубуз үчүн,+ ал эч качан күнөө кетирбеген Машаякты+ биздин күнөөлөрүбүз үчүн курмандыкка чалган.
Шилтемелер
^ Бул жерде каймана мааниде колдонулган «үй», «чатыр» деген сөздөр кадимки денени же көзгө көрүнбөгөн денени билдирет.
^ Сөзмө-сөз: «асмандагыны кийүүнү».
^ Сөзмө-сөз: «аны кийсек, жылаңач калбайбыз».
^ Же: «баштапкы төлөм; күрөө».
^ Же: «денеде жашап жүргөндө».
^ Же: «силердин абийириңер да билет».
