Лебилер 20:1—27
20 Жахаба Мусага дагы мындай деди:
2 «Ысрайыл элине мындай деп айт: „Ысрайыл элинин, Ысрайылда жашаган бөтөн жерликтердин ичинен ким балдарынын бирин Молекке берсе*, өлүм жазасына тартылсын.+ Эл аны таш бараңга алып өлтүрсүн.
3 Баласын Молекке берип, ыйык жеримди арамдап,+ ыйык ысмыма сөз тийгизгени үчүн, ага каарданып, эл арасынан жок кылам.
4 Эгерде эл анын баласын Молекке бергенине көз жумуп койсо, аны өлүм жазасына тартпаса,+
5 анда өзүм ага да, үй-бүлөсүнө да каарымды төгөм.+ Аны да, ага кошулуп Молекке сыйынгандарды да жок кылам.
6 Эгерде кимдир бирөө өлгөндөрдү чакыргандарга,+ келечекти алдын ала айткандарга кайрылып,+ мага болгон берилгендигин сактабаса*, ага каарымды төгүп, эл арасынан жок кылам.+
7 Өзүңөрдү таза сактап, ыйык болгула,+ анткени мен Жахабамын, силердин Кудайыңармын.
8 Менин осуяттарымды аткаргыла.+ Мен силерди ыйыктаган Жахабамын.+
9 Эгер кимдир бирөө атасын же энесин каргаса, өлүм жазасына тартылсын.+ Ал атасын же энесин каргагандыктан өз каны өз мойнунда болот.
10 Башка бирөөнүн аялы менен ойноштук кылган эркек өлүм жазасына тартылсын. Ойноштук кылган эркек да, аял да өлүм жазасына тартылсын.+
11 Атасынын аялы менен жаткан киши атасын шерменде кылган болот.+ Ал да, аял да өлүм жазасына тартылсын. Алардын каны өз мойнунда болот.
12 Эгер кимдир бирөө келини менен жатса, экөө тең өлүм жазасына тартылсын. Алар табияттан тыш иш кылган болот. Алардын каны өз мойнунда болот.+
13 Эгерде эркек башка бир эркек менен аял менен жаткандай жатса, экөө тең жийиркеничтүү иш кылган болот.+ Алар өлүм жазасына тартылсын. Алардын каны өз мойнунда болот.
14 Эгер кимдир бирөө аял алып, аялы менен да, кайненеси менен да жатса, бул — уятсыздык*.+ Араңарда ушундай уятсыз иш жасалбашы үчүн, ал кишини тиги экөө менен бирге өлтүрүп, өрттөп ташташ керек.+
15 Эркек киши жаныбар менен жатса, өлүм жазасына тартылсын. Жаныбарды да өлтүрүшүңөр керек.+
16 Эгер аял жаныбар менен жатса,+ аны да, жаныбарды да өлтүрүп таштагыла; аларды өлтүрүш керек. Андай эркектин да, аялдын да каны өз мойнунда болот.
17 Эгерде кимдир бирөө атасынын же энесинин кызы менен жатса, бул — маскаралык.+ Аларды элдин көзүнчө өлтүрүш керек. Ал өз эжесин же карындашын шерменде кылган болот. Ал күнөөсү үчүн жоопко тартылышы керек.
18 Эгерде эркек аялдын айызы келип жатканда аны менен жатса, экөө тең канды ыйык деп эсептебей турганын көрсөтүшөт.+ Алар элинин арасынан жок кылынсын.
19 Апаңдын эжеси же сиңдиси менен, атаңдын эжеси же карындашы менен жатпа, анткени андай иш кылган киши жакын тууганын шерменде кылат.+ Алар күнөөсү үчүн жоопко тартылышы керек.
20 Атасынын бир тууганынын аялы менен жаткан киши атасынын бир тууганын шерменде кылат.+ Ал да, аял да күнөөсү үчүн жоопко тартылат. Алар бала көрбөй өлүшү керек.
21 Эгерде кимдир бирөө бир тууганынын аялын алса, жийиркеничтүү иш кылган болот.+ Ал бир тууганын шерменде кылат. Алар бала көрбөй өлүшү керек.
22 Мен силерди жашасын деп алып бараткан жер силерди силкип салбашы үчүн,+ бардык осуяттарым менен мыйзамдарымды+ аткаргыла.+
23 Мен ал жерден кууп чыгара турган элдердин каада-салттарына карманбагыла.+ Алар ушундай иштердин баарын жасашкандыктан, алардан жийиркенем.+
24 Ошондуктан силерге: “Алардын жерин ээлейсиңер. Сүт менен бал аккан ошол жерге ээлик кылышыңар үчүн, мен аны силерге берем.+ Мен Жахабамын, силерди башка элдерден бөлүп алган Кудайыңармын”,+— деп айткам.
25 Адал жаныбарды адал эместен, адал канаттууну адал эместен айырмалап билгиле+ жана силер үчүн арам деп жарыялап, бөлүп койгон жаныбардын, канаттуунун же башка майда жан-жаныбарлардын айынан арамдалып калбагыла.+
26 Менин алдымда ыйык болгула, анткени мен, Жахаба, ыйыкмын.+ Менин элим болушуңар үчүн, силерди башка элдерден бөлүп алдым.+
27 Эгерде эркек же аял өлгөндөрдү чакырса же келечекти алдын ала айтса, өлүм жазасына тартылсын.+ Эл аларды таш бараңга алышы керек. Алардын каны өз мойнунда болот“».
Шилтемелер
^ Бул баланы курмандыкка чалганды да камтышы мүмкүн.
^ Сөзмө-сөз: «сойкулардай болуп, алар менен ыпылас иш кылса». Бул алардын каймана мааниде сойкулук кылганын билдирет.
^ Же: «уятсыз иш; бузулгандык».
