Лебилер 3:1—17
3 Эгер кимдир бирөө Жахабанын алдына бодо малдан, эркек болобу же ургаачы болобу, тынчтык курмандыгын+ алып келе турган болсо, кемтиги жок мал алып келсин.
2 Анан курмандыкка алып келген малынын башына колун койсун; ал жолугушуу чатырынын кире беришинде союлат. Арундун уулдары, дин кызматчылар, малдын канын курмандык жайына тегерете чачыратып чыгышат.
3 Тынчтык курмандыгынын кээ бир бөлүктөрү Жахабага арналган өрттөлчү тартуу+ катары алынып келсин, атап айтканда, ич майы,+ ичиндеги бүт майы,
4 эки бөйрөгү, бөйрөк майы, карчыга майы, бөйрөктөрү менен кошо боорундагы майы бөлүнүп алынсын.+
5 Арундун уулдары анын баарын курмандык жайында күйүп жаткан отундардын үстүндөгү бүтүндөй өрттөлчү курмандыктын үстүнө коюп өрттөшөт.+ Бул — Жахабага арналган жыты жагымдуу өрттөлчү тартуу.+
6 Эгер Жахабага арнап майда малдан, эркек болобу же ургаачы болобу, тынчтык курмандыгын алып келе турган болсо, кемтиги жок мал алып келсин.+
7 Эгер курмандыкка алып келген малы жаш кочкор болсо, аны да Жахабанын алдына алып келсин.
8 Анан алып келген малынын башына колун койсун; ал жолугушуу чатырынын алдында союлат. Арундун уулдары малдын канын курмандык жайына тегерете чачыратып чыгышат.
9 Тынчтык курмандыгынын майы Жахабага арналган өрттөлчү тартуу катары алынып келсин.+ Анын омурткасына чейин кесип алынган куйрук майы, ич майы, ичиндеги бүт майы,
10 эки бөйрөгү, бөйрөк майы, карчыга майы, бөйрөктөрү менен кошо боорундагы майы бөлүнүп алынсын.+
11 Дин кызматчы анын баарын курмандык жайында Жахабанын үлүшү* катары, өрттөлчү тартуу катары, өрттөйт.+
12 Эгер курмандыкка теке алып келе турган болсо, Жахабанын алдына алып келсин.
13 Анан алып келген малынын башына колун койсун; аны жолугушуу чатырынын алдында союшат. Арундун уулдары малдын канын курмандык жайына тегерете чачыратып чыгышат.
14 Курмандыктын айрым бөлүктөрү Жахабага арналган өрттөлчү тартуу катары алынып келсин, атап айтканда, ич майы, ичиндеги бүт майы,+
15 эки бөйрөгү, бөйрөк майы, карчыга майы, бөйрөктөрү менен кошо боорундагы майы бөлүнүп алынсын.
16 Дин кызматчы анын баарын курмандык жайында Кудайдын үлүшү катары, жыты жагымдуу өрттөлчү тартуу катары, өрттөйт. Майдын баары Жахабага таандык.+
17 Эч кандай май, эч кандай кан жебегиле.+ Бул — жашаган жериңерде өзүңөр да, укум-тукумуңар да түбөлүккө сакташыңар керек болгон көрсөтмө“».
Шилтемелер
^ Сөзмө-сөз: «наны». Б. а. тынчтык курмандыгынын Кудайга тийиштүү бөлүгү.
