Лебилер 7:1—38
7 Айып үчүн курмандык жөнүндөгү мыйзам мындай:+ бул — абдан ыйык курмандык.
2 Айып үчүн курмандыкка алынып келген мал бүтүндөй өрттөлчү курмандык союлчу жерде союлсун. Дин кызматчы анын канын+ курмандык жайына тегерете чачыратып чыксын.+
3 Анын майынын баарын:+ куйрук майын, терисинин астындагы майын,
4 эки бөйрөгүн майы менен кошо бөлүп алсын. Бөйрөктөрү менен кошо боорундагы майын да бөлүп алсын.+
5 Дин кызматчы аларды Жахабага арналган өрттөлчү тартуу катары курмандык жайында өрттөсүн.+ Бул — айып үчүн курмандык.
6 Аны дин кызматчы болуп кызмат кылган эркектердин баары ыйык жерде жеши керек.+ Ал абдан ыйык.+
7 Күнөө үчүн курмандыкка карата берилген мыйзам айып үчүн курмандыкка да тиешелүү. Айып үчүн чалынган курмандык ал аркылуу күнөөдөн арылткан дин кызматчыныкы болот.+
8 Кимдир бирөө алып келген бүтүндөй өрттөлчү курмандыктын терисин+ аны чалган дин кызматчы алат.
9 Мешке же чуңкур көмөч казанга, же жалпак көмөч казанга+ бышырылган дан азыктарынан алынып келген тартуунун баары аны Кудайдын алдына алып келген дин кызматчыныкы болот, ал анын үлүшү болот.+
10 Ал эми дан азыктарынан алынып келген башка тартуулар: май кошулганы да,+ май кошулбаганы да+ Арундун бардык уулдарына тең бөлүштүрүлүшү керек.
11 Жахабага арналган тынчтык курмандыгы+ жөнүндөгү мыйзам мындай:
12 эгер кимдир бирөө аны ыраазычылык билдириш үчүн алып келсе,+ анда ыраазычылык билдириш үчүн алып келген ошол курмандыгы менен бирге ачыткы кошулбай, май аралаштырылып жасалган ортосу оюк токоч, үстүнө май сыйпалган калама жана эң жакшы унга май кошулуп, майы жакшылап сиңирилген камырдан жасалган ортосу оюк токоч алып келсин.
13 Ал ошол тартуусун ачыткы кошулуп жасалган ортосу оюк токоч жана ыраазычылык билдириш үчүн алып келген тынчтык курмандыгы менен чогуу алып келсин.
14 Тартууга алып келген ошол нандарынын ар бир түрүнөн ыйык үлүш катары Жахабага бирден алып келсин. Алар тынчтык курмандыгынын канын курмандык жайына чачыраткан дин кызматчыныкы болот.+
15 Ыраазычылык билдириш үчүн алынып келген тынчтык курмандыгынын этин ошол эле күнү жеш керек. Андан эртең мененкиге эч нерсе калтырбаш керек.+
16 Эгерде ал тынчтык курмандыгын ант бергени үчүн+ же өз ыктыяры менен+ алып келсе, аны алып келген күнү жеш керек. Артып калганын эртеси күнү да жесе болот.
17 Ал эми үчүнчү күнгө калган этти өрттөп салыш керек.+
18 Эгер тынчтык курмандыгынын эти үчүнчү күнү желсе, анда аны алып келген киши Кудайга жакпай калат, курмандыгы да эсепке алынбайт. Ал жийиркеничтүү болуп калат, аны жеген киши күнөөсү үчүн жоопко тартылат.+
19 Таза эмес бир нерсеге тийип калган этти жегенге болбойт, аны өрттөп салыш керек. Ал эми таза этти таза адам жей берсе болот.
20 Эгерде таза эмес киши Жахабага арналган тынчтык курмандыгынын этин жесе, ал киши элинин арасынан жок кылынат.+
21 Таза эмес адамгабы+ же адал эмес жаныбаргабы,+ же арам деп эсептелген жийиркеничтүү жандыкка же анын тарпынабы,+ кайсынысына болбосун тийген киши Жахабага арналган тынчтык курмандыгынын этин жесе, ал элинин арасынан жок кылынат“».
22 Жахаба Мусага дагы мындай деди:
23 «Ысрайыл элине мындай деп айт: „Буканын, жаш кочкордун, текенин майын жебегиле.+
24 Өлгөн же жырткыч жара тартып кеткен жаныбардын майын ар кандай нерсеге пайдаланса болот, бирок жегенге болбойт.+
25 Ким Жахабага арналган өрттөлчү тартуу катары алынып келген малдын майын жесе, ал киши элинин арасынан жок кылынат.
26 Кайсы жерде жашабагыла, канаттуунун каны болобу же жаныбардыкыбы, эч кандай кан жебегиле.+
27 Кан жеген киши өлүм жазасына тартылышы керек“».+
28 Жахаба Мусага дагы мындай деди:
29 «Ысрайыл элине мындай деп айт: „Жахабага тынчтык курмандыгын алып келген киши анын бир бөлүгүн Жахабага тартуу катары берсин.+
30 Ал курмандыктын майы менен төшүн Жахабага арналган өрттөлчү курмандык катары өз колу менен алып келсин.+ Аларды Жахабанын алдында чайпалта турган курмандык катары ары-бери чайпасын.+
31 Дин кызматчы майды курмандык жайында өрттөйт,+ ал эми төш Арун менен уулдарыныкы болот.+
32 Тынчтык курмандыгы катары алып келген малыңардын арткы оң санын ыйык үлүш катары дин кызматчыга бергиле.+
33 Арундун уулдарынын арасынан кимиси тынчтык курмандыгынын каны менен майын Кудайдын алдына алып келсе, малдын арткы оң саны ошонуку болот.+
34 Мен ысрайыл элинин тынчтык курмандыктарынын ичинен чайпалта турган курмандык катары алынып келген төштү, ыйык үлүш катары берилген санды алардан алып, дин кызматчы Арун менен уулдарына берем. Бул — ысрайыл элине түбөлүккө берилген көрсөтмө.+
35 Жахабага арналган өрттөлчү курмандыктардын ичинен дин кызматчыларга, Арун менен уулдарына, берилген үлүш — ушул. Бул үлүш аларга Жахабага дин кызматчы болуп кызмат кылганга дайындалган күнү бөлүнүп берилген.+
36 Жахаба ысрайыл элине аны Арун менен уулдарына бергиле деп аларды дайындаган* күнү буйрук кылган.+ Бул — укумдан-тукумга, түбөлүккө аткарыш керек болгон көрсөтмө“».
37 Бүтүндөй өрттөлчү курмандык,+ дан азыктарынан алынып келген тартуу,+ күнөө үчүн курмандык,+ айып үчүн курмандык,+ дин кызматчылыкка дайындаганда чалынган курмандык+ жана тынчтык курмандыгы+ жөнүндөгү мыйзам ушундай.
38 Бул мыйзамды Жахаба Мусага Синай тоосунда,+ ал Синай чөлүндө ысрайыл элине Жахабага арнаган тартууларын алып келгиле деп буйрук кылган күнү берген.+
