Лебилер 9:1—24
-
Арун курмандыктарды чалат (1—24)
9 Сегизинчи күнү+ Муса Арун менен уулдарын, Ысрайылдын аксакалдарын чакырып,
2 Арунга мындай деди: «Күнөө үчүн курмандыкка кемтиги жок бир музоо,+ бүтүндөй өрттөлчү курмандыкка кемтиги жок бир кочкор алып, Жахабанын алдына алып кел.
3 Анан ысрайыл элине: „Күнөө үчүн курмандыкка бир теке, бүтүндөй өрттөлчү курмандыкка кемтиги жок бир жашар музоо, кемтиги жок бир жашар эркек козу,
4 тынчтык курмандыгына бука менен кочкор+ алып келип, Жахабанын алдында курмандыкка чалгыла. Ошондой эле дан азыктарынан май кошулган тартуу+ алып келгиле, анткени Жахаба бүгүн силерге өзүнүн даңкын көрсөтөт*“,+— деп айт».
5 Алар Муса буйругандын баарын жолугушуу чатырынын алдына алып келишти. Анан бүт жамаат келип, Жахабанын алдына турду.
6 Муса аларга: «Жахабанын даңкы силерге көрүнүшү үчүн, Жахаба ушуларды кылгыла деп буйрук кылды»,— деди.+
7 Андан кийин Арунга: «Курмандык жайына барып, өзүң алып келген күнөө үчүн курмандык+ менен бүтүндөй өрттөлчү курмандыкты чалып, өзүңдү да,+ үйүңдөгүлөрдү* да күнөөдөн арылт. Эл алып келген курмандыкты да чалып,+ аларды күнөөдөн арылт.+ Ошентип, Жахаба буйрук кылгандай кыл»,— деди.
8 Арун ошол замат курмандык жайына барып, өзүнүн күнөөсү үчүн курмандыкка чалына турган музоону сойду.+
9 Уулдары музоонун канын+ атасына беришти. Арун канга манжасын малып, курмандык жайынын мүйүздөрүнө сыйпады, калган канды болсо курмандык жайынын түбүнө төктү.+
10 Музоонун майын, бөйрөктөрүн, боорундагы майын алып, Жахаба Мусага буйругандай, курмандык жайынын үстүндө өрттөдү.+
11 Эти менен терисин болсо конуштун сыртына алып чыгып өрттөдү.+
12 Андан кийин бүтүндөй өрттөлчү курмандыкка чалына турган кочкорду сойду. Уулдары Арунга анын канын беришти. Ал аны курмандык жайына тегерете чачыратып чыкты.+
13 Анан ага бүтүндөй өрттөлчү курмандыкка чалынган кочкордун бөлүнгөн этин, башын беришти. Арун анын баарын курмандык жайында өрттөдү.
14 Анан ичеги-карынын, шыйрактарын жууп, курмандык жайындагы бүтүндөй өрттөлчү курмандыктын үстүндө өрттөдү.
15 Андан соң эл үчүн союла турган курмандыкты чалды: адегенде элдин күнөөсү үчүн курмандыкка чалына турган текени союп, музоону курмандыкка чалгандай эле, аны да күнөө үчүн курмандыкка чалды.
16 Анан бүтүндөй өрттөлчү курмандыкты берилген көрсөтмө боюнча чалды.+
17 Андан кийин дан азыктарынан алынып келген тартуудан+ бир ууч алып, курмандык жайына алып барды да, эртең менен чалынган бүтүндөй өрттөлчү курмандыктын үстүнө коюп өрттөдү.+
18 Ошондон кийин Арун эл үчүн тынчтык курмандыгы катары алынып келген бука менен кочкорду сойду. Уулдары алардын канын атасына беришти. Арун канды курмандык жайына тегерете чачыратып чыкты.+
19 Андан кийин алар буканын майы+ менен кочкордун куйрук майын, алардын ич майын, бөйрөктөрүн, боорундагы майын+
20 бука менен кочкордун төшүнүн үстүнө коюшту. Анан Арун ал майдын баарын алып, курмандык жайында өрттөдү.+
21 Ал эми алардын төшүн, арткы оң санын, Муса буйругандай, Жахабанын алдында чайпалта турган курмандык катары ары-бери чайпады.+
22 Анан Арун колун көтөрүп, элди карап батасын берди.+ Андан кийин күнөө үчүн курмандыкты, бүтүндөй өрттөлчү курмандыкты, тынчтык курмандыгын чалган жерден түштү.
23 Акырында Муса менен Арун жолугушуу чатырына киришти. Кайра чыккандан кийин элге батасын беришти.+
Ошондо Жахаба бүт элге даңкын көрсөттү.+
24 Жахабадан от түшүп,+ курмандык жайындагы май менен бүтүндөй өрттөлчү курмандыкты жалмап кетти. Муну көргөндө бүт эл таң калганынан кыйкырып, жүзтөмөндөп жыгылды.+
