Лука 12:1—59
-
Фарисейлердин ачыткысы (1—3)
-
Адамдардан эмес, Кудайдан корккула (4—7)
-
Машаяктын жолдоочусу экениңерди ачык билдиргиле (8—12)
-
Акылсыз бай киши жөнүндөгү мисал (13—21)
-
Сарсанаа боло бербегиле (22—34)
-
Кичине отор (32)
-
-
Сергек тургандын маанилүүлүгү (35—40)
-
Ишенимдүү жана акылдуу үй башкаруучу (41—48)
-
Тынчтык алып келиш үчүн эмес, бөлүп-жарыш үчүн келди (49—53)
-
Болуп жаткан нерселердин маанисин түшүнгөн маанилүү (54—56)
-
Талаштарды чечүүнүн жолу (57—59)
12 Ал ортодо ошол жерге миңдеген кишилер чогулду. Алар ушунчалык көп болгондуктан, бири-бирин кыса башташты. Иса адегенде шакирттерине кайрылып, мындай деди: «Фарисейлердин ачыткысынан, эки жүздүүлүктөн, сак болгула.+
2 Бек катылган, ачылбай кала турган эч нерсе жок, билинбей кала турган эч бир сыр жок.+
3 Ошондуктан караңгыда айткандарыңар жарыкта угулат, бөлмөдө шыбырап айткандарыңар үйдүн төбөсүнөн жарыяланат.
4 Досторум,+ дагы айтарым, силерди өлтүрүп, бирок силерге андан башка эч нерсе кыла албай тургандардан коркпогула.+
5 Силерге кимден коркуш керектигин айтайын: өлтүргөнгө эле эмес, андан кийин гээнага*+ таштап салганга да бийлиги бардан корккула. Ооба, силерге айтып коёюн, мына ошондон корккула.+
6 Беш таранчы наркы өтө төмөн эки тыйынга* эле сатылат эмеспи. Ошентсе да Кудай алардын бирин да унутпайт*.+
7 Силердин болсо атүгүл чачыңардын ар бир талы саналуу.+ Коркпогула: силер көп таранчыдан алда канча баалуусуңар.+
8 Силерге айтып коёюн, ким менин жолдоочум экенин башкалардын алдында ачык билдирсе,+ адам Уулу да анын өзүнүн жолдоочусу экенин Кудайдын периштелеринин алдында ачык билдирет.+
9 Ал эми ким башкалардын алдында менден баш тартса, адам Уулу да Кудайдын периштелеринин алдында андан баш тартат.+
10 Ким адам Уулуна каршы сүйлөсө, кечирилет; ал эми ким Кудайдын ыйык рухуна акарат кылса, кечирилбейт.+
11 Силерди эл чогулган жерлерге*, башчылар менен бийликтегилердин алдына алып барышканда, өзүңөрдү коргош үчүн кантип же эмне деп жооп берериңерди же эмне айтарыңарды ойлоп тынчсызданбагыла.+
12 Себеби ошол убакта Кудайдын ыйык руху эмне айтышыңар керектигин үйрөтөт».+
13 Ошондо элдин арасынан бирөө Исага: «Устат, бир тууганыма айтып койчу, атабыздан калган мурасты мени менен бөлүшсүн»,— деп кайрылды.
14 Иса: «Мени экөөңөргө сот болгонго же мурасыңарды бөлүштүргөнгө ким дайындады?» — деди.
15 Анан ал жердегилерге: «Байкагыла! Ач көздүктүн бардык түрүнөн сак болгула.+ Анткени адамдын дүнүйөсү ашып-ташып турса да, өмүрү колунда болгон мүлкүнөн көз каранды эмес»,— деп айтты.+
16 Анан мындай мисал келтирди: «Бир бай киши жеринен мол түшүм алат да:
17 „Эмне кылсам? Түшүмүмдү жыярга жер жок“,— деп ойлоно баштайт.
18 Ал: „Мындай кылайын:+ кампаларымды бузуп, чоңураак кылып салайын да, бүт дүнүйөмдү, эгинимди ошол жерге жыйнайын“,— дейт.
19 Анан: „Эми көп жылдарга жете турган байлыгым бар. Ошон үчүн эс алам, ичип-жейм, көңүл ачам“,— дейт.
20 Бирок Кудай ага: „Акылсыз, ушул түнү өмүрүңөн айрыласың. Ошондо жыйнаганыңдын баары кимге калат?“ — дейт.+
21 Өзү үчүн байлык жыйнаган, бирок Кудайдын көз алдында байыбаган киши ушундай болот».+
22 Андан кийин Иса шакирттерине мындай деди: «Ошондуктан силерге айтарым, эмне жээриңерди ойлоп жаныңар үчүн, эмне киериңерди ойлоп денеңер үчүн сарсанаа боло бербегиле*.+
23 Анткени тамакка караганда жан, кийимге караганда дене кымбат.
24 Кузгундарды карагылачы: алар эгин экпейт, оруп-жыйбайт. Бир нерсе сактай турган жайы да, кампасы да жок. Бирок Кудай аларды азыктандырат.+ Силер канаттуулардан алда канча баалуу эмессиңерби?!+
25 Тынчсызданып жатып кимиңер өмүрүңөрдү бир азга* болсо да узарта аласыңар?
26 Эгер ушундай жөнөкөй нерсени кыла албасаңар, анда башка нерселерге эмнеге тынчсызданасыңар?+
27 Лилия гүлдөрүнүн кантип өсүп жатканын карагылачы: алар эмгектенбейт, жип ийрибейт. Бирок силерге айтып коёюн, атүгүл Сулайман да, канчалык атак-даңктуу болбосун, алардын бириндей да кийинген эмес.+
28 Бүгүн талаада өсүп, эртең мешке ыргытыла турган чөптү Кудай ушундай кийиндирсе, силерди кантип кийиндирбей койсун, ишеними алсыздар?!
29 Ошондуктан эмне жээриңерди, эмне ичериңерди ойлоп сарсанаа боло бербегиле, тынчсыздана бербегиле.+
30 Кудайды таанып-билбеген адамдар* ушунун баарын ойлоп, түйшүк тартышат. Ал эми силердин мунун бардыгына муктаж экениңерди асмандагы Атаңар билет.+
31 Ошондуктан мындан ары да анын Падышалыгын биринчи орунга койгула, ошондо силерге ушунун баары берилет.+
32 Коркпо, кичине отор,+ анткени асмандагы Атаңар силерге өзүнүн Падышалыгын берүүнү туура көрдү.+
33 Мал-мүлкүңөрдү сатып, муктаж болгондорго жардам бергиле.+ Эскирбей турган капчык жасагыла, башкача айтканда, асманга түгөнгүс байлык жыйнагыла.+ Ал жактан ага ууру да жете албайт, күбө да түшпөйт.
34 Байлыгыңар кайсы жерде болсо, жүрөгүңөр да ошол жерде болот.
35 Белиңерди бууп, даяр тургула,+ чырагыңар күйүп турсун.+
36 Үйлөнүү тоюнан келе турган кожоюнун күтүп жаткан жана ал келип, эшикти тыкылдатар замат ачканга даяр турган кулдардай болгула.+
37 Кожоюну кайтып келгенде, сергек турган кулдар бактылуу! Силерге айтып коёюн, ал кызмат кылыш үчүн кийинет да, кулдарын дасторконго отургузуп, аларга кызмат кылат.
38 Кожоюну түндө*, атүгүл тээ түн бир оокумда* келип, кулдарынын сергек турганын көрсө, алар бактылуу!
39 Билип койгула, үй ээси уурунун кайсы убакта келерин билсе, ага эч нерсесин уурдатпайт.+
40 Силер да даяр тургула, себеби адам Уулу силер күтпөгөн саатта келет».+
41 Ошондо Петир Исадан: «Мырзам, бул мисалды бизге карата айттыңбы же баарынабы?» — деп сурады.
42 Ал мындай деп жооп берди: «Кызматчыларына өз убагында жетиштүү тамак берип турушу үчүн, кожоюн дайындай турган ишенимдүү жана акылдуу үй башкаруучу ким?+
43 Кожоюну кайтып келгенде, кул өзүнө тапшырылган ишти аткарып жатса, анда ал кул бактылуу!
44 Ишенип койгула, кожоюну аны өзүнүн бүт мүлкүнө жооптуу кылып дайындайт.
45 Бирок ал кул: „Кожоюнум жакында келбейт“,— деп ойлоп, мас болуп, ичип-жеп, үйдөгү башка кулдар менен күңдөрдү уруп-сабаса,+
46 кожоюну ал күтпөгөн күнү, ал күтпөгөн саатта келет да, аны катуу жазалап, ишенимсиздердин жанына таштайт.
47 Кожоюнунун эмнени каалаарын билип туруп даяр турбаган же ал айткандай иш кылбаган кул көбүрөөк таяк жейт.+
48 Ал эми билбей туруп жазага тартылгыдай иш кылган кул азыраак таяк жейт. Кимге көп берилсе, андан көп талап кылынат. Кимге көп нерсе тапшырылса, андан адаттагыдан көп күтүлөт.+
49 Мен жер бетине от жагыш үчүн келдим. Отту күйгүзгөн соң, дагы эмнени кааламак элем?
50 Бирок башыман кечиришим керек болгон бир сыноо бар*. Ошол сыноо бүтө турган убакты күтүп аябай кыйналып жатам!+
51 Мени жерге тынчтык алып келди деп ойлойсуңарбы? Жок, силерге айтып коёюн, мен бөлүп-жарыш үчүн келдим.+
52 Мындан ары бир үйдөгү беш киши өз ара бөлүнүп, үчөө экөөнө, экөө үчөөнө каршы чыгат.
53 Атасы баласына, баласы атасына, энеси кызына, кызы энесине, кайненеси келинине, келини кайненесине каршы чыгып, баары бөлүнүп-жарылат».+
54 Андан кийин Иса элге кайрылып, мындай деди: «Батыштан көтөрүлгөн булутту көрөрүңөр менен: „Катуу шамал болуп, жаан жаайт экен“,— дейсиңер, анан ошондой болот.
55 Ал эми түштүктөн шамал соккондо: „Ысык болот экен“,— дейсиңер, анан ошондой болуп чыгат.
56 Эки жүздүүлөр, асман менен жердеги нерселерди карап, аба ырайы кандай болорун билесиңер да, азыр болуп жаткан нерселердин маанисин түшүнө албайсыңарбы?+
57 Кандай иш кылганыңар туура болорун кантип билбейсиңер?
58 Мисалы, силерге нааразычылыгы бар адам менен башчыга баратканыңарда ортодогу талашты жолдон эле чечип алганга аракет кылгыла. Болбосо ал силерди сотко берет, сот болсо өкүмдү ишке ашыруучуга өткөрүп берет, ал болсо түрмөгө камап коёт.+
59 Силерге айтып коёюн, сокур тыйыныңарга чейин төлөп бермейинче ал жерден чыкпайсыңар».
Шилтемелер
^ Грекче ассарий. Бир ассарий — 45 мүнөттүк жумуш үчүн төлөнгөн акы. Б14 тиркемесин кара.
^ Же: «көз жаздымында калтырбайт».
^ Же балким: «сыйынуу жайларына».
^ Же: «тынчсызданганыңарды токтоткула».
^ Сөзмө-сөз: «бир чыканакка».
^ Сөзмө-сөз: «Дүйнөнүн элдери».
^ Гректер менен римдиктердин түнкү убакты бөлүү тартибине ылайык, бул экинчи күзөттү — кечки саат 9дардан түн ортосуна чейинки маалды — билдирчү.
^ Бул үчүнчү күзөттү — түн ортосунан таңкы саат 3төргө чейинки маалды — билдирчү.
^ Сөзмө-сөз: «Мен чөмүлүшүм керек болгон бир чөмүлүү бар».
