Лука 16:1—31
16 Анан Иса шакирттерине мындай деди: «Бир байдын чарба башкаруучусу* болот. Бирөөлөр байга келип, чарба башкаруучусунун анын мүлкүн ысырап кылып жатканын айтышат.
2 Бай аны чакырып: „Сен жөнүндө ар кандай сөздөрдү угуп жатам. Сени жумуштан бошотом, чарба иштеринин эсеп-кысабын бер“,— дейт.
3 Ошондо ал: „Кожоюнум иштен бошоткондо, эмне кылам? Жер казганга жарабайм, кайыр сурагандан уялам.
4 Аа, таптым: жумуштан бошогондо, башкалар мени үйүнө киргизиши үчүн, минтейин“,— деп өзүнчө ойлонот да,
5 кожоюнуна карыз болгондорду бир-бирден чакыра баштайт. Биринчисинен: „Кожоюнума канча карызсың?“ — деп сурайт.
6 Ал: „2 200 литр* зайтун май карызмын“,— деп жооп берет. Чарба башкаруучу: „Тил катыңды ал да, отуруп, тезинен 1 100 деп жаз“,— дейт.
7 Анан экинчисинен: „Сен канча карызсың?“ — деп сурайт. „100 чоң кап* буудай“,— дейт ал. Чарба башкаруучу ага: „Тил катыңды ал да, 80 деп жаз“,— дейт.
8 Чарба башкаруучусу адил болбосо да, кожоюну аны тапкычтыгы үчүн* мактайт. Чынында эле, бул дүйнөнүн адамдары замандаштары менен иштешип, мамилелешкен жагынан Кудайдын кызматчыларына*+ караганда кыйын* келишет.
9 Силерге айтып коёюн, бул дүйнөнүн байлыгын* өзүңөргө досторду күткөнгө жумшагыла.+ Ошондо байлыгыңар түгөнгөндө, алар силерди түбөлүк турак жайларга кабыл алышат.+
10 Ким кичинекей нерседе ишеничтүү болсо, ал чоң нерседе да ишеничтүү болот. Ал эми ким кичинекей нерседе ишеничтүү болбосо, ал чоң нерседе да ишеничтүү болбойт.
11 Эгер бул дүйнөдөгү байлыкты колдонгондо ишеничтүү болбосоңор, чыныгы байлыкты силерге ким ишенип тапшырат?
12 Эгер башканыкын колдонгондо ишеничтүү болбосоңор, анда өзүңөргө тиешелүүнү силерге ким берет?+
13 Бир да кул бир эле учурда эки мырзага кызмат кыла албайт, анткени бирин жек көрүп, экинчисин жакшы көрөт же бирине берилип кызмат кылып, экинчисин баркка албайт. Бир эле учурда Кудайга да, байлыкка да кул боло албайсыңар».+
14 Акчаны жакшы көргөн фарисейлер бул сөздөрдү угуп, Исаны шылдыңдай башташты.+
15 Иса аларга мындай деди: «Силер башкалардын алдында өзүңөрдү адил кылып көрсөтөсүңөр,+ бирок Кудай жүрөгүңөрдөгүнү билет.+ Адамдар жогору баалаган нерсе Кудайдын көз алдында жийиркеничтүү.+
16 Мусанын Мыйзамында жазылгандар менен пайгамбарлардын сөздөрү Жакандын убагына чейин жарыяланган. Ал эми ошол убактан тартып Кудайдын Падышалыгы жөнүндөгү жакшы кабар жарыяланып келатат. Ошол Падышалыкта болгонго ар кандай адамдар бүт күчү менен умтулуп жатышат.+
17 Чынында, асман менен жер жок болуп кеткен күндө да, Мыйзамдагы кайсы бир тамганын бир да сызыгы жок болбойт, баары аткарылат.+
18 Ким аялы менен ажырашып*, башкага үйлөнсө, ойноштук кылган болот. Ошондой эле ким күйөөсү менен ажырашкан аялга үйлөнсө, ал да ойноштук кылган болот.+
19 Бир бай киши болгон экен. Ал кымбат баалуу кызгылт көк кездемеден, зыгыр буласынан кийим кийип, майкөл-сүткөл жашап, күн сайын сайран курчу.
20 Анын дарбазасынын жанына бүт денесин жара баскан Лазар деген кайырчыны алып келип турушчу.
21 Ал бай кишинин үстөлүнөн түшкөн тамак-аштын калдыктарына зар болор эле. Иттер келип, анын жараларын жалашчу.
22 Бир күнү ал кайырчы өлөт да, периштелер аны Ыбрайымдын жанына* алып барышат.
Бай да өлүп, мүрзөгө коюлат.
23 Көрдө* кыйналганда ал башын көтөрүп, алыста турган Ыбрайым менен анын жанындагы Лазарды көрөт.
24 Анан: „Ыбрайым ата, мага кайрымдуулук кылып, Лазарды жибериңизчи. Ал манжасынын учун сууга малып, тилиме тамызып койсунчу, жалындап күйгөн оттон кыйналып жатам“,— деп кыйкырат.
25 Бирок Ыбрайым ага: „Балам, эстечи, сен өмүр бою жакшы жашадың, Лазардын жашоосу болсо азап менен өттү. Эми ал бул жерде сооронуп, жыргап жатат, сен болсо азап чегип жатасың.
26 Анын үстүнө, силер менен биздин ортобузда түпсүз аң бар. Ошондуктан биз жактан силерге, силер жактан бизге өткүсү келгендердин эч кимиси өтө албайт“,— деп айтат.
27 Ошондо тиги киши: „Андай болсо, ата, суранам, Лазарды атамдын үйүнө жибериңизчи.
28 Анткени менин беш бир тууганым бар. Лазар аларга баарын жакшылап түшүндүрүп берсинчи, алар да бул жерге түшүп, азап чегишпесин“,— дейт.
29 Ыбрайым болсо: „Аларда Муса менен пайгамбарлардын жазгандары бар, ошолордун сөздөрүнө кулак кагышсын“,— деп айтат.+
30 Анда тиги: „Жок, Ыбрайым ата, аларды угушпайт, ал эми өлгөндөрдөн бирөө барса, өкүнүшөт“,— дейт.
31 Ошондо Ыбрайым: „Эгер Муса менен пайгамбарлардын сөздөрүн угушпаса,+ анда өлгөндөрдөн бирөө тирилип барса да, ишенишпейт“,— деп айтат».
Шилтемелер
^ Же: «үй башкаруучусу».
^ Сөзмө-сөз: «100 бат». 1 бат — болжол менен 22 литрге барабар чен бирдиги. Б14 тиркемесин кара.
^ Сөзмө-сөз: «100 кор». 1 кор — болжол менен 170 килограммга барабар чен бирдиги. Б14 тиркемесин кара.
^ Же: «акылдуулук менен иш кылганы үчүн».
^ Сөзмө-сөз: «жарыктын уулдарына».
^ Же: «акылдуураак».
^ Сөзмө-сөз: «адилетсиз байлыкты».
^ Бул жерде жыныстык адеп-ахлаксыздыктан башка себеп менен ажырашуу жөнүндө сөз жүрүп жатат. Кара: Матай 19:9.
^ Сөзмө-сөз: «көкүрөгүнө».
