Лука 18:1—43
18 Андан кийин Иса шакирттерине Кудайдан дайыма тиленип,+ эч качан багынбаш керектиги жөнүндө мындай мисал айтып берди:
2 «Бир шаарда Кудайдан коркпогон, адамдарды сыйлабаган сот болуптур.
3 Ошол эле шаарда бир жесир аял жашаптыр. Ал сотко кайра-кайра барып: „Мени менен соттошуп жаткан киши экөөбүздүн ортобуздагы талашты адилеттик менен чечип бериңизчи“,— деп суранат.
4 Сот бир нече убакытка чейин аялдын өтүнүчүн аткаргысы келбейт. Бирок акыры өзүнчө: „Кудайдан коркпосом да, эч кимди сыйлабасам да,
5 ушул жесир аял жанымды койбой келе бергени үчүн, ишин адилеттик менен чечип берейин. Болбосо тажатып кайра-кайра келе берет“,— деп ойлонот».+
6 Анан Иса: «Адил болбосо да, ал соттун эмне дегенин байкадыңарбы?
7 Анда Кудай өзү тандап алган, ага күнү-түнү жалынган адамдар үчүн адилеттикти орнотпой коёбу?+ Кудайга сабырдуулук кылганга туура келсе да,+
8 силерге айтып коёюн, ал алар үчүн адилеттикти орнотконго шашат. Бирок адам Уулу келгенде жер бетинен ушундай ишеним табар бекен?» — деди.
9 Өзүлөрүн адил эсептеп, башкаларды киши ордуна көрбөгөндөргө болсо мындай мисал келтирди:
10 «Эки киши Кудайдан тиленгени ибадатканага кирет: бири — фарисей, экинчиси — салык жыйнаган киши.
11 Фарисей туруп, ичинен: „Оо, Кудай, сага ыраазымын, себеби башкалардай эмесмин: эч кимди талап-тонобойм, адилетсиздик кылбайм, ойноштук да кылбайм, мобу салык жыйноочудай да эмесмин.
12 Жумасына эки жолу орозо кармайм, тапканымдын ондон бир бөлүгүн тартуу катары берип турам“,— деп тилене баштайт.+
13 Салык жыйнаган киши болсо алыста туруп, башын көтөргөнгө да батынбай: „Оо, Кудай, мендей күнөөкөргө ырайым кыла көр“,— деп көкүрөгүн койгулайт.+
14 Силерге айтып коёюн, бул киши үйүнө Кудайдын алдында фарисейге караганда алда канча адил деп эсептелип кайтат.+ Анткени ким өзүн көтөрсө, ал басынтылат; ким өзүн төмөн койсо, көтөрүлөт».+
15 Иса колун коюп, батасын бериши үчүн, эл ага наристелерин алып келип жатты. Муну көргөндө шакирттер аларды тыя баштады.+
16 Бирок Иса наристелерди өзүнө чакырып, шакирттерине: «Балдарды мага коё бергиле, аларга тоскоолдук кылбагыла, анткени Кудайдын Падышалыгынын баталарын ушуларга окшогондор алат.+
17 Силерге айтып коёюн, ким Кудайдын Падышалыгын кичинекей баладай болуп кабыл албаса, ал анын баталарын албайт*»,— деп айтты.+
18 Бир башчы Исадан: «Жакшы Устат*, түбөлүк өмүрдү мурасташ үчүн эмне кылышым керек?» — деп сурады.+
19 Иса ага: «Эмне үчүн мени жакшы дейсиң? Жакшы деп аталганга Кудайдан башка эч ким татыктуу эмес.+
20 Сен: „Ойноштук кылбагыла,+ киши өлтүрбөгүлө,+ уурдабагыла,+ жалган күбө болбогула,+ ата-энеңерди сыйлагыла“,+— деген осуяттарды билесиң да»,— деди.
21 Башчы: «Мунун баарын мен бала кезимден бери аткарып келатам»,— деди.
22 Анын сөздөрүн укканда Иса: «Аткарышың керек болгон дагы бир нерсе бар: колуңда болгондун баарын сатып, түшкөн акчаны кедей-кембагалдарга таратып бер, ошондо асманда казынаң болот. Анан келип, менин жолдоочум бол»,— деп айтты.+
23 Муну укканда башчы аябай капаланды, себеби абдан бай эле.+
24 Иса аны карап: «Акчасы көптөрдүн Кудайдын Падышалыгынын баталарын алышы* кандай кыйын!+
25 Байдын Кудайдын Падышалыгына киргенине караганда төөнүн ийненин көзүнөн өткөнү оңоюраак»,— деди.+
26 Муну уккандар: «Анда ким куткарыла алат?» — дешти.+
27 Иса: «Адамдар кыла албаган нерселерди Кудай кыла алат»,— деди.+
28 Ошондо Петир: «Мына, биз баарын таштап, сени ээрчип жүрөбүз»,— деп айтты.+
29 Иса: «Ишенип койгула, ким Кудайдын Падышалыгы үчүн үй-жайын, аялын, бир туугандарын, ата-энесин же балдарын калтырса,+
30 ал азыркы убакта мурдагыдан алда канча көп алат, ал эми келечектеги заманда* түбөлүк өмүргө ээ болот»,— деп айтты.+
31 Андан кийин Иса 12 элчисин өзүнчө бөлүп алып, аларга: «Мына, биз Иерусалимге баратабыз. Адам Уулу жөнүндө пайгамбарлар эмнелерди жазса, ошонун баары аткарылат.+
32 Мисалы, аны башка элден болгон адамдардын колуна салып беришет.+ Алар болсо аны шылдыңдашат,+ кордошот, ага түкүрүшөт.+
33 Анан аны сабагандан кийин өлтүрүшөт.+ Бирок ал үчүнчү күнү тирилет»,— деп айтты.+
34 Бирок элчилери Исанын сөздөрүнүн бирин да түшүнүшкөн жок, анткени айтылгандардын мааниси аларга ачыла элек болчу.
35 Иса Жерихого жакындап калганда, жол боюнда бир сокур киши кайыр сурап отурган эле.+
36 Элдин өтүп баратканын угуп, ал эмне болуп жатканын сурай баштады.
37 Ага: «Назареттик Иса өтүп баратат»,— деп айтышты.
38 Ошондо ал: «Дөөтүнүн Уулу Иса, мага кайрымдуулук кыла көр!» — деп кыйкырды.
39 Алдыда бараткандар аны тыйып жатышты. Бирок ал: «Дөөтүнүн Уулу, мага кайрымдуулук кыла көр!» — деп ого бетер кыйкыра баштады.
40 Ошондо Иса токтоп, аны бери алып келгиле деп буйруду. Ал жакын келгенде:
41 «Эмне кылып берейин?» — деп сурады. Сокур киши: «Мырзам, көзүм көрсүнчү»,— деди.
42 Иса ага: «Көзүң көрсүн, сени ишенимиң айыктырды»,— деп айтты.+
43 Ошол замат анын көзү көрүп калды. Ошондо ал Кудайды алкап-даңктап, Исанын артынан жөнөдү.+ Муну көрүп, бүт эл да Кудайды алкады.+
Шилтемелер
^ Сөзмө-сөз: «ага кирбейт».
^ Сыягы, бул сөздөрдү жагыныш үчүн наам катары колдонгон. Диний устаттарга кайрылганда ушу сыяктуу наамдар колдонулчу.
^ Же: «асман Падышалыгына кириши».
