Лука 19:1—48
19 Иса Жерихого кирип, аны аралап баратты.
2 Ошол шаарда Закай деген бай киши бар эле. Ал салык жыйнагандардын башчысы болчу.
3 Закай Исаны көргөнгө аябай аракет кылды. Бирок бою кыска болгондуктан, элдин арасынан көрө албай койду.
4 Ошондуктан алдыга чуркап барып, Исаны көрүш үчүн ал өтө турган жолдун боюндагы жапайы анжир дарагына чыгып алды.
5 Иса ошол жерге жеткенде өйдө карап: «Закай, тезирээк түш, бүгүн сенин үйүңө барам»,— деди.
6 Закай дароо дарактан түштү да, үйүнө барып, Исаны кубанып тосуп алды.
7 Муну көргөндөр: «Бул күнөөкөрдүн үйүнө конокко келди»,— деп сүйлөнө башташты.+
8 Закай болсо ордунан туруп, Исага: «Мырзам, мүлкүмдүн жарымын кедей-кембагалдарга таратып берем. Ал эми башкалардан жалган айып менен тартып алгандарымды төрт эсе кылып кайрып берем»,— деди.+
9 Ошондо Иса: «Бүгүн Кудай бул кишини да, үй-бүлөсүн да куткарды, анткени бул да Ыбрайымдын тукуму.
10 Себеби адам Уулу жоголгондорду издеп таап, куткарыш үчүн келген»,— деп айтты.+
11 Бул сөздөрдү угуп турган шакирттерине Иса дагы бир мисал келтирди. Себеби Иерусалимге жакындап калган эле. Шакирттери болсо ал жакка барарыбыз менен Кудайдын Падышалыгы келет* деп ойлоп жатышкан.+
12 Ошондуктан ал мындай деди: «Ак сөөктөрдүн тукумунан болгон бир киши падыша болуп дайындалыш үчүн алыскы өлкөгө+ барып келмекчи болот.
13 Ал 10 кулун чакырып, 10 күмүш акча* берет да: „Мен келгиче, буларды айландыргыла“,+— дейт.
14 Бирок аны жек көргөн жердештери артынан элчилерди жиберип: „Анын бизге падыша болушун каалабайбыз“,— деп айттырышат.
15 Акыры, ал падыша болуп, кайтып келет да, күмүш акчаларды айландырганда канча киреше табышканын билиш үчүн баягы кулдарын чакыртат.+
16 Биринчиси келип: „Мырзам, сиздин акчаңызга дагы 10 күмүш акча кошулду“,+— дейт.
17 Кожоюну ага: „Жарайсың! Сен жакшы кулсуң! Ушундай кичинекей иште ишенимдүү болгонуң үчүн 10 шаарга бийлик кыласың“,+— деп айтат.
18 Анан экинчиси келип: „Мырзам, сиз берген акчага дагы 5 күмүш акча кошулду“,+— дейт.
19 Кожоюну ага да: „Сен болсо 5 шаарды башкарасың“,— деп айтат.
20 Анан дагы бири келип: „Мырзам, мына акчаңыз. Мен муну чүпүрөккө ороп, катып койгом.
21 Сизден корктум, анткени сиз бербегениңизди алып, сеппегениңизди жыйнаган катаал кишисиз“,— дейт.+
22 Кожоюну ага: „Оңбогон кул десе, анда сени өз сөзүңөн кармайын. Бербегенимди алып, сеппегенимди жыйнаган катаал киши экенимди билген экенсиң,+
23 анда эмнеге күмүш акчамды акча айландыра тургандарга берген жоксуң? Кайтып келгенимде кирешеси менен албайт белем“,— деп айтат.
24 Анан жанында тургандарга: „Мунун колунан акчаны алып, 10 күмүш акчасы бар кулга бергиле“,+— дейт.
25 Алар: „Мырзам, анын 10 күмүш акчасы бар да!“ — дешет.
26 Ал: „Силерге айтып коёюн, кимде бар болсо, ага дагы берилет, ал эми кимде жок болсо, андан өзүндө болгон нерсеси да тартылып алынат.+
27 Падыша болушумду каалабаган душмандарымды болсо бул жакка алып келип, менин көзүмчө өлтүрүп салгыла“,— деп айтат».
28 Ушуларды айткандан кийин Иса андан ары жолун улап, Иерусалимди көздөй жөнөдү.
29 Зайтун тоосундагы+ Бетфагия менен Бетанияга жакындаганда ал өзүнөн мурун эки шакиртин жөнөтүп жатып:+
30 «Тээтиги көрүнүп турган айылга баргыла. Айылга киргениңерде эч ким мине элек кодиктин* байланып турганын көрөсүңөр. Аны чечип, мага алып келгиле.
31 Эгер кимдир бирөө: „Муну эмнеге чечип жатасыңар?“ — десе, „Бул Мырзабызга керек“,— деп айткыла»,— деди.
32 Шакирттер барганда, баары Иса айткандай болуп чыкты.+
33 Алар кодикти чечип жатышканда, анын ээлери: «Кодикти эмнеге чечип жатасыңар?» — дешти.
34 Шакирттер: «Бул Мырзабызга керек»,— деп жооп беришти.
35 Анан кодикти жетелеп келип, үстүнө сырт кийимдерин салышты да, Исаны мингизишти.+
36 Иса кодик минип баратканда, эл жолго сырт кийимдерин төшөп жатты.+
37 Ал Зайтун тоосунан түшө турган жолго жакындап калганда, көптөгөн шакирттери өз көзү менен көргөн бардык кереметтер үчүн кубанып, үнүн бийик чыгара Кудайды даңктап:
38 «Жахабанын атынан Падыша катары келатканга анын батасы тийсин! Кудай менен биздин ортобузда тынчтык болсун, жогорудагы Кудай даңкталсын!*» — деп жатышты.+
39 Ошондо элдин арасындагы айрым фарисейлер Исага: «Устат, шакирттериңди тыйып койбойсуңбу»,— дешти.+
40 Буга ал: «Силерге айтып коёюн, эгер алар унчукпаса, таштар кыйкырат»,— деп жооп берди.
41 Иерусалимге жакындаганда Иса шаарды карап, ыйлап жиберди да:+
42 «Эмне тынчтыкка жеткирерин азыр түшүнсөң кана... Бирок бул азыр сенден жашыруун.+
43 Себеби душмандарың айланаңа учтуу устундардан коргон куруп, сени туш тараптан курчай турган* күндөр келет.+
44 Алар өзүң менен кошо тургундарыңды жерге чабышат,+ таш-талканыңды чыгарышат.+ Анткени Кудай сени соттош үчүн* келген убакты баамдаган жоксуң»,— деди.
45 Анан ибадатканага кирип, соодагерлерди кууп чыгара баштады да,+
46 аларга: «Ыйык Жазмада: „Менин үйүм тиленүү үйү болот“,— деп жазылган.+ Силер болсо бул жерди каракчылардын уюгуна айландырып салдыңар»,— деп айтты.+
47 Ал күн сайын ибадатканада элди окутуп жатты. Жогорку дин кызматчылар, диний мыйзамдарды окуткандар менен эл башчылары болсо аны өлтүрүштүн жолун издеп,+
48 бирок таппай жатышты. Себеби эл Исанын сөздөрүн угуш үчүн дайыма анын жанында жүрдү.+
Шилтемелер
^ Же: «айкын көрүнөт».
^ Сөзмө-сөз: «мина». Гректердин 340 граммдык күмүш акчасы. 1 мина 100 драхмага барабар болгон. Б14 тиркемесин кара.
^ Такайдын.
^ Же: «Асманда тынчтык, жогоруда даңк болсун!»
^ Же: «кысымга ала турган».
^ Сөзмө-сөз: «текшериш үчүн».
