Лука 21:1—38
21 Иса казына идиштери* турган жакты карап, байлардын тартуу салып жатканын көрдү.+
2 Анан наркы өтө төмөн эки кичинекей тыйын* салган бир жарды жесир аялды көрүп:+
3 «Силерге айтып коёюн, бул жесир аял жарды болгонуна карабай баарынан көп салды.+
4 Анткени тигилердин бардыгы өздөрүнөн артканды салышты, ал эми бул аял, өзү муктаж болуп турса да, колунда болгондун баарын салды»,— деди.+
5 Кийинчерээк айрымдар ибадаткана жөнүндө, анын Кудайга арналган тартуулар, кооз таштар менен кооздолгону жөнүндө сөз кылганда,+
6 Иса: «Силер көрүп тургандын бардыгы кыйратылып, таш үстүндө таш калбай турган күндөр келет»,— деди.+
7 Ошондо алар: «Устат, бул качан болот? Мунун баары боло турган убакты кайсы белгиден билсек болот?» — деп сурашты.+
8 Иса аларга: «Сак болгула, силерди бирөө адаштырып кетпесин.+ Анткени көптөр менин атыман келип: „Мен Машаякмын“, „Белгиленген убакытка аз калды“,— дешет. Аларды ээрчибегиле.+
9 Ошондой эле согуштар, баш аламандыктар* жөнүндө укканыңарда үрөйүңөр учпасын. Себеби адегенде ушулардын баары болушу керек. Анткен менен бул замандын акыры ошол замат келбейт»,— деди.+
10 Андан ары сөзүн минтип улады: «Бир эл бир элге,+ бир падышалык бир падышалыкка каршы көтөрүлөт.+
11 Катуу жер титирөөлөр, улам бир жерде ачарчылык, жугуштуу оорулар болот.+ Адамдар жүрөктүн үшүн алган окуяларга күбө болушат, асмандан улуу жышаандар көрүнөт.
12 Бирок ушулардын баары болгонго чейин, башкалар силерди куугунтукташат,+ кармап алып, соттош үчүн сыйынуу жайларына алып барышат, түрмөгө камашат, мен* үчүн падышалар менен башкаруучулардын алдына алып барышат.+
13 Ошонун аркасында аларга ишенген нерселериңер жөнүндө айтып бергенге мүмкүнчүлүгүңөр болот.
14 Бирок ошондо кантип коргонуш керектигин алдын ала ойлонбогула.+
15 Анткени мен силерге акылмандык берем, сөз тапканга жардам берем. Ошон үчүн каршы чыккандардын баары биригип да силерге каршы тура албайт, айткандарыңарды жокко чыгара албайт.+
16 Силерди атүгүл ата-энеңер, бир туугандарыңар, тууган-туушкандарыңар, досторуңар кармап беришет, айрымдарыңар өлүмгө кыйыласыңар.+
17 Мен* үчүн баарына жек көрүндү болосуңар.+
18 Бирок бир тал чачыңар да түшпөйт.+
19 Аягына чейин чыдап, туруктуу болсоңор, жаныңарды сактап каласыңар.+
20 Иерусалимди аскер кошуундары курчап алганын көргөнүңөрдө+ анын кыйрай турган убагы жакындап калганын билгиле.+
21 Ошондо Жүйүт жериндегилер тоого качсын.+ Иерусалимдин ичиндегилер шаардан чыгып кетишсин, тегерек-четиндегилер шаарга кирбесин.
22 Анткени, жазылгандардын бардыгы аткарылышы үчүн, ал күндөр жазалай турган* күндөр болот.
23 Ошол күндөрү кош бойлуу аялдар менен эмчекте баласы барларга кыйын болот!+ Себеби бул аймакты чоң кайгы-касырет басат, бул эл жазасын алат.
24 Кээ бирлери кылычтын мизине алынат, калгандары башка* элдерге туткун болушат.+ Иерусалим болсо, башка элдерге белгиленген убакыт аяктаганга чейин, алардын таман астында калат.+
25 Күндө, айда, жылдыздарда ар кандай жышаандар болот.+ Деңиз күркүрөп, алай-дүлөй түшкөндүктөн, жер бетинде элдер эмне кыларын билбей катуу кыйналышат.
26 Асмандагы кубаттуу нерселер солкулдагандыктан, адамдар жер жүзүндө боло турган окуяларды күтүп, коркконунан эсинен танышат.
27 Анан алар адам Уулунун+ булут ичинде күч-кубат, улуу даңк менен келатканын көрүшөт.+
28 Ушулар аткарыла баштаганда, боюңарды түзөп, башыңарды көтөргүлө, анткени куткарыларыңарга аз калган болот».
29 Андан кийин аларга мындай мисал келтирди: «Анжир менен башка бак-дарактар жөнүндө ойлонуп көрсөңөр:+
30 алардын бүчүр байлаганын көргөндө жайдын жакындап калганын билесиңер.
31 Ошо сыяктуу эле, булардын болуп жатканын көргөндө Кудайдын Падышалыгынын жакындап калганын билгиле.
32 Ишенип койгула, ушулардын баары бул муун өтүп кеткенче аткарылат.+
33 Асман менен жер* жок болуп кетет, бирок менин сөздөрүм жок болбойт.+
34 Өзүңөргө сак болгула: эси-дартыңардын баары эле ашыра жеп-ичүү, мас болуу,+ турмуш түйшүктөрү болуп калбасын.+ Ал күн капысынан келип, силерди тор сыяктуу басып калбасын.+
35 Себеби ал күн жер бетинде жашагандардын бардыгына келет.
36 Ошондуктан алдыда боло тургандарга кабылбаш үчүн жана адам Уулунун алдында туруш үчүн,+ дайыма Кудайдан жалынып тиленип,+ сергек болгула»+.
37 Иса күндүзү ибадатканада элди окутчу, ал эми кечинде ал жерден чыгып, Зайтун тоосуна барып түнөчү.
38 Таң атары менен, элдин баары аны угуш үчүн ибадатканага келчү.
Шилтемелер
^ Б. а. тартуу салынган кутулар. Сыягы, алар ар кандай формада болгон. Айрымдары сурнай сыяктуу келип, үстүндө кичинекей тешиги болгон.
^ Сөзмө-сөз: «эки лепта». Эки лепта — болжол менен 10 мүнөттүк жумуш үчүн төлөнгөн акы. Б14 тиркемесин кара.
^ Же: «көтөрүлүштөр».
^ Сөзмө-сөз: «менин атым».
^ Сөзмө-сөз: «менин атым».
^ Же: «адилет сот жүргүзө турган».
^ Сөзмө-сөз: «бардык».
^ Бул жерде, сыягы, бул ыймансыз дүйнө жөнүндө, тактап айтканда, анын башкаруучулары менен адамзат коому жөнүндө сөз жүрүп жатат.
