Лука 22:1—71
-
Дин кызматчылар Исаны өлтүрүүнү ойлонуштурушат (1—6)
-
Акыркы Куткарылуу майрамына көрүлгөн даярдыктар (7—13)
-
Мырзабыздын кечки тамагы (14—20)
-
«Мага чыккынчылык кыла турган киши мени менен бир дасторкондо отурат» (21—23)
-
Шакирттер кимиси улук экени жөнүндө катуу талашышат (24—27)
-
Исанын Падышалык келишими (28—30)
-
Петирдин Исаны тааныбайм деп танары айтылат (31—34)
-
Даярдык көрүш керек; 2 кылыч (35—38)
-
Исанын Зайтун тоосундагы тиленүүсү (39—46)
-
Исаны кармап кетишет (47—53)
-
Петир Исаны тааныбайм деп танат (54—62)
-
Иса шылдыңга алынат (63—65)
-
Иши Жогорку сотто каралат (66—71)
22 Куткарылуу майрамы*+ деп аталган Калама майрамы* жакындап калган эле.+
2 Жогорку дин кызматчылар менен диний мыйзамдарды окуткандар эл эмне дейт деп корккондуктан+ Исаны кантип өлтүрсө болорун ойлонуштуруп жатышты.+
3 Ошол убакта 12 элчинин бири Жүйүт Искариоттун ичине Шайтан кирди.+
4 Ошондо Жүйүт жогорку дин кызматчылар менен ибадаткананын күзөт башчыларына барып, Исаны алардын колуна кантип салып берери жөнүндө сүйлөштү.+
5 Алар сүйүнүп, ага күмүш акча берерин айтышты.+
6 Жүйүт макул болуп, Исаны алардын колуна эл жокто салып бериш үчүн ыңгайлуу учурду издей баштады.
7 Ошентип, Калама майрамынын биринчи күнү келди. Ошол күнү Куткарылуу майрамындагы курмандык союлчу.+
8 Иса Петир менен Жаканды: «Барып, Куткарылуу майрамында жей турган тамагыбызды даярдагыла»,— деп жөнөттү.+
9 Алар: «Кайсы жерге даярдашыбызды каалайсың?» — деп сурашты.
10 Ал: «Шаарга барганыңарда, кумарага суу көтөрүп бараткан кишини жолуктурасыңар. Анын артынан барып, ал кирген үйгө киргиле.+
11 Анан үйдүн ээсине: „Устат сенден: ”Мен шакирттерим менен Куткарылуу майрамында тамак жей турган конок бөлмөсү кайсы?” — деп сурап жатат“,— деп айткыла.
12 Ал силерге үстүнкү кабаттагы чоң бөлмөнү көрсөтөт. Анда керектүүнүн баары болот. Куткарылуу майрамында жей турган тамакты ошол жерге даярдагыла»,— деди.
13 Шакирттер барганда, бардыгы Иса айткандай болуп чыкты. Анан алар Куткарылуу майрамына даярдык көрүштү.
14 Тамактанар убак келгенде, Иса элчилери менен дасторконго отурду.+
15 Анан аларга: «Азап чегеримден мурун ушул Куткарылуу майрамындагы тамакты силер менен чогуу жегенди самап жүргөм.
16 Анткени, силерге айтып коёюн, Кудайдын Падышалыгы башкарган убакта бардыгы аткарылганга чейин, Куткарылуу майрамындагы тамактан жебейм»,— деп айтты.
17 Иса чөйчөктү алып, Кудайга ыраазычылык билдирди да, шакирттерине: «Муну алып, бири-бириңерге узатып, баарыңар ичкиле.
18 Силерге айтып коёюн, Кудайдын Падышалыгы башкара турган убакка чейин шарап ичпейм»,— деди.
19 Ал ошондой эле нанды алып,+ Кудайга ыраазычылык билдирген соң аны сындырды да, элчилерине узатып жатып: «Бул силер үчүн бериле турган+ денемди билдирет.+ Муну мени эскериш үчүн кылгыла»,— деп айтты.+
20 Кечки тамактан кийин чөйчөктү да алып: «Бул чөйчөк силер үчүн төгүлө турган канымдын+ негизинде+ түзүлчү жаңы келишимди билдирет.+
21 Мага чыккынчылык кыла турган киши мени менен бир дасторкондо отурат.+
22 Дегинкиси, адам Уулу алдын ала айтылган жол менен баратат,+ ошондой болсо да ага чыккынчылык кыла турган кишинин башына каран түн түшөт!» — деди.+
23 Ошондо элчилери андай ишке кимиси барышы мүмкүн экенин өз ара талкуулай башташты.+
24 Анан кимиси баарынан улук экени жөнүндө катуу талашып киришти.+
25 Иса аларга мындай деди: «Падышалар элге үстөмдүк кылышат, элдин үстүнөн бийлик жүргүзгөндөр жакшылык кылуучулар* деп аталат.+
26 Бирок силер алардай болбогула.+ Араңардан ким эң улук болсо, ал эң кичүүдөй болсун,+ ал эми ким жетекчиликти колго алса, кызматчыдай болсун.
27 Кимиси улук: дасторкондо отурганыбы же кызмат кылганыбы? Дасторкондо отурганы эмеспи? Мен болсо силердин араңарда кызматчыдаймын.+
28 Анткен менен силер, сыноолорго кабылганымда,+ жанымда болдуңар.+
29 Атам мени менен Падышалык келишимин түзгөндөй, мен да силер менен Падышалык келишимин түзүп жатам.+
30 Ошентип, силер Падышалыгымда менин дасторконумдан ичип-жейсиңер,+ тактыларга отуруп,+ Ысрайылдын 12 уруусун соттойсуңар.+
31 Симон, Симон, Шайтан баарыңарды калбырдан буудай сыяктуу өткөргөнгө жол беришимди талап кылды.+
32 Бирок мен сенин ишенимиң солгундап калбашын суранып Кудайга жалындым.+ Өкүнгөнүңдөн кийин бир туугандарыңдын ишенимин бекемде».+
33 Ошондо Петир: «Мырзам, сени менен түрмөгө отурганга да, өлгөнгө да даярмын»,— деди.+
34 Бирок Иса ага: «Петир, сага айтып коёюн, бүгүн короз кыйкырганга чейин, мени билбейм деп үч жолу танасың»,— деп айтты.+
35 Андан кийин Иса шакирттеринен: «Силерди элге кабар айтканы капчыксыз, азык салынган баштыксыз, сандалсыз жөнөткөнүмдө,+ бир нерсеге муктаж болдуңар беле?» — деп сурады. Алар: «Жок»,— дешти.
36 Ошондо Иса: «Бирок азыр кимдин капчыгы бар болсо, ал аны да, азык салынган баштыгын да алсын. Кимдин кылычы жок болсо, сырт кийимин сатып, кылыч сатып алсын.
37 Себеби, силерге айтып коёюн: „Кылмышкер катары эсептелди“,— деген мага карата айтылган+ сөздөр аткарылышы керек. Чын эле, мен жөнүндө жазылган бул сөздөр аткарылып жатат»,— деди.+
38 Алар: «Мырзам, бизде эки кылыч бар»,— дешти. «Ошол жетет»,— деди Иса.
39 Анан сыртка чыгып, адатынча Зайтун тоосун көздөй бет алды. Шакирттери артынан жөнөдү.+
40 Ал жакка жеткенде Иса аларга: «Азгырыкка алдырбаш үчүн Кудайдан тиленгиле»,— деди.+
41 Өзү болсо таш ыргытым жерге барды да, чөгөлөп, Кудайдан:
42 «Ата, эгер кааласаң, бул чөйчөктү* менден алыстата көрчү. Бирок мен каалагандай эмес, сен каалагандай болсун»,— деп тилене баштады.+
43 Ошондо асмандан периште келип, ага дем-күч берди.+
44 Бирок жан дүйнөсү ушунчалык кыйналгандыктан, Иса Кудайга ого бетер жалына баштады.+ Анын тери кан болуп жерге тамып жатты.
45 Тиленип бүткөндөн кийин кайра шакирттерине келди. Анан кайгыга баткандыктан алы кетип уктап калган шакирттерин көрүп:+
46 «Эмнеге уктап жатасыңар? Тургула, азгырыкка алдырбаш үчүн Кудайдан тынбай тиленгиле»,— деди.+
47 Ал сүйлөп бүтө электе эле, 12 элчинин бири Жүйүт бир топ кишини ээрчитип келди да, Исаны өбүш үчүн жанына барды.+
48 Ошондо Иса: «Жүйүт, адам Уулун өөп туруп сатканы жатасыңбы?» — деди.
49 Эмне болорун түшүнгөндө жанындагылары Исага: «Мырзам, кылыч менен чаап салалыбы?» — дешти.
50 Атүгүл бири башкы дин кызматчынын кулунун оң кулагын шылый чапты.+
51 Бирок Иса: «Болду, токтоткула!» — деди да, кулдун кулагына колун тийгизип, айыктырып койду.
52 Анан өзүн кармаганы келген жогорку дин кызматчыларга, ибадаткананын күзөт башчылары менен аксакалдарга: «Каракчыны кармачудай болуп, кылыч, союл көтөрүп келгениңер кандай?+
53 Күн сайын ибадатканада силер менен жүргөндө+ мага тийген жок элеңер го.+ Бирок азыр силердин убагыңар, караңгылык бийлик кылган убак»,— деди.+
54 Алар Исаны кармап,+ башкы дин кызматчынын үйүнө алып барышты. Петир болсо аларды алыстан ээрчип барды.+
55 Ал жердегилер короонун ортосуна от жагып, тегеректеп отурушканда, Петир да алар менен чогуу отурду.+
56 Ошондо бир күң оттун жанында отурган Петирди көрүп, тигиле карады да: «Бул да аны менен чогуу жүргөн»,— деди.
57 Бирок Петир: «Мен аны тааныбайм»,— деп танып койду.
58 Бир аздан кийин аны башка бир киши көрүп: «Сен да ошолордун бирисиң»,— деп айтты. Бирок Петир: «Жок, андай эмес»,— деди.+
59 Бир сааттай өткөндөн кийин, дагы бир киши: «Чын эле, бул да ошо менен чогуу жүргөн, себеби бул галилеялык!» — деп ишенимдүү айта баштады.
60 Петир болсо: «Эмне деп жатасың? Түшүнгөн жокмун»,— деди. Ал сүйлөп бүтө электе, короз кыйкырды.
61 Ошол убакта Иса бурулуп, Петирди карады. Ошондо Петир анын: «Бүгүн короз кыйкырганга чейин, менден үч жолу баш тартасың»,— деген сөздөрүн эстеди.+
62 Анан сыртка чыгып, өксөп ыйлады.
63 Исаны кайтарып турган кишилер аны шылдыңдап,+ уруп-сого башташты.+
64 Анан бетин жаап: «Пайгамбар болсоң, айтчы, сени ким урду?» — деп сурап жатышты.
65 Алар аны дагы башка көптөгөн жаман сөздөр менен кордошту. Кудайга ошентип акарат келтиришти.
66 Эртең менен эл аксакалдары: жогорку дин кызматчылар менен диний мыйзамдарды окуткандар чогулуп,+ Исаны Жогорку соттун* алдына алып барышты да, ага:
67 «Эгер Машаяк болсоң, айт бизге»,— дешти.+ Ал: «Айтсам деле, баары бир ишенбейсиңер.
68 Сурасам, жооп бербейсиңер.
69 Бирок адам Уулу+ эми кудуреттүү Кудайдын оң жагына отурат»,— деп айтты.+
70 Ошондо алардын баары: «Демек, сен Кудайдын Уулу экенсиң да?!» — дешти. «Муну өзүңөр билесиңер да»,— деди Иса.
71 Алар: «Бизге дагы башка кандай далил керек?! Муну азыр эле өз оозунан укпадыкпы»,— дешти.+
Шилтемелер
^ «Жакшылык кылуучу» деген сөз айкашы бул жерде ардактуу наам катары колдонулган.
^ Бул жерде «чөйчөк» деген сөз Кудайдын эрки боюнча Исанын Кудайга акарат кылды деп ак жерден айыпталып өлтүрүлөрүн билдирет.
