Лука 4:1—44
4 Иса Кудайдын ыйык рухуна толуп, Иордан дарыясынан кайтып келди. Анан Кудайдын ыйык рухунун жетеги менен ээн талаага барып,+
2 ал жакта 40 күн болду. Ошол жерде Ибилис* аны азгырганга аракет кылды.+ 40 күн бою эч нерсе жебегендиктен Иса акырында ачка болду.
3 Ошондо Ибилис ага: «Эгерде Кудайдын уулу* болсоң, анда бул ташка буйрук кылчы, нанга айлансын»,— деди.
4 Бирок Иса: «Ыйык Жазмада: „Адамдын өмүрү нандан гана көз каранды эмес“,— деп жазылган»,— деп жооп берди.+
5 Андан кийин Ибилис аны бийик жерге чыгарып, көз ирмемде жер жүзүндөгү бардык падышалыктарды көрсөттү да:+
6 «Сага ушул падышалыктардын баарынын үстүнөн бийлик берем, алардын атак-даңкын да берем, анткени ал бийлик мага берилген.+ Аны, кимге кааласам, ошого берем.
7 Эгер мага бир эле жолу сыйынып койсоң, ушунун баары сеники болот»,— деди.
8 Иса ага: «Ыйык Жазмада: „Жахаба Кудайыңарга сыйынгыла, ага гана кызмат кылгыла“,— деп жазылган»,— деп жооп берди.+
9 Анан Ибилис аны Иерусалимге алып барып, ибадаткананы курчап турган дубалдын эң бийик жерине чыгарды да: «Эгерде Кудайдын уулу болсоң, ушул жерден боюңду таштачы,+
10 анткени Ыйык Жазмада: „Кудай периштелерине сени сактап калганга буйрук берет.
11 Бутуң ташка урунбашы үчүн, алар сени колуна көтөрүп кетишет“,— деп жазылган эмес беле»,— деп айтты.+
12 Иса ага: «Ыйык Жазмада: „Жахаба Кудайыңарды сынабагыла“,— деп жазылган»,— деди.+
13 Ибилис Исаны ушинтип азгырганга аракет кылгандан кийин анын жанынан кетип, башка ыңгайлуу учурду күтүп жүрдү.+
14 Андан кийин Иса Кудайдын ыйык рухуна толуп, Галилеяга кайтып келди.+ Тегеректеги бардык аймактарда ал жөнүндө жакшы сөздөр айтылып жатты.
15 Иса ошол жактагы сыйынуу жайларында* элди окута баштады. Аны баары мактап жатты.
16 Ал өзү чоңойгон Назаретке+ келип, дем алыш күнү* адатынча сыйынуу жайына+ кирди. Анан Ыйык Жазмадан окуп бериш үчүн ордунан турду.
17 Ага Ышая пайгамбардын түрмөгүн беришти. Ал аны ачып, мындай деп жазылган жерин таап окуду:
18 «Жахаба мага ыйык рухун берди, себеби ал мени жакырларга жакшы кабар айтканга дайындады*. Мени туткундарга боштондукка чыгарын, сокурларга көздөрү ачыларын кабарлаганга, эзилгендерди эркиндикке чыгарганга,+
19 Жахабанын элге ырайым кыла турган жылы жөнүндө жарыялаганга жиберди».+
20 Анан Иса түрмөктү кайра түрүп, кызматчыга берди да, барып отурду. Сыйынуу жайындагылардын баары аны тигиле карап калды.
21 Ошондо ал: «Силер эми эле уккан сөздөр бүгүн аткарылды»,— деди.+
22 Баары аны мактап, жагымдуу сөздөрүнө таң калып,+ бири-бирине: «Бул Жусуптун эле уулу эмеспи?!» — деп жатышты.+
23 Ошондо Иса: «Албетте, силер: „Дарыгер, өзүңдү айыктыр“,— деген ылакапты мага карата айтасыңар. „Капернаумда+ кылган иштериң жөнүндө уктук. Аларды бул жерде, өз мекениңде да кылчы“,— деп да айтасыңар»,— деди.
24 Анан: «Чынында, бир да пайгамбарды өз жеринде кабыл алышпайт.+
25 Силерге айтып коёюн, Илияс пайгамбардын күндөрүндө Ысрайыл жеринде жесир аялдар көп болгон. Бирок үч жарым жыл жамгыр жаабай, ошол жердин баарында катуу ачарчылык болгондо,+
26 Илияс алардын бирине да жиберилген эмес. Ал Сидон жериндеги Сарепатта жашаган жесир аялга жиберилген.+
27 Ошондой эле Элиша пайгамбардын убагында Ысрайыл жеринде пес оорулуулар көп болгон. Бирок ал алардын бирин да айыктырган эмес, сириялык Нааманды гана айыктырган»,— деди.+
28 Муну укканда сыйынуу жайындагылардын баарынын каары кайнап чыкты.+
29 Алар ордуларынан тура калып, Исаны шаардын сыртына, өздөрүнүн шаары жайгашкан тоонун* кырына алып барышты да, түртүп жибермекчи болушту.
30 Бирок Иса аларды аралап өтүп, кетип калды.+
31 Андан кийин ал Галилеядагы Капернаум шаарына барып, дем алыш күнү элди окута баштады.+
32 Эл анын кантип окутканына аябай таң калды,+ анткени ал Кудай бийлик берген кишидей сүйлөп жатты.
33 Сыйынуу жайында ичине жин кирип алган бир киши бар эле.+
34 Ал: «Назареттик+ Иса, бул жакка эмнеге келдиң? Бизди жок кылганы келдиңби? Сенин ким экениңди билем: сен ыйыксың, сени Кудай жиберген»,— деп кыйкыра баштады.+
35 Бирок Иса жинди тыйып: «Үнүңдү бас да, бул кишинин ичинен чыгып кет»,— деди. Ошондо жин тиги кишини баарынын көзүнчө жерге көтөрүп чаап, эч зыян келтирбей чыгып кетти.
36 Ал жердегилердин бардыгы аябай таң калып: «Кандай гана күчтүү сөздөр! Мунун бийлигин, күчүн карагылачы, жиндерге буйрук берсе, чыгып кетип жатышат!» — деп өз ара сүйлөшө башташты.
37 Ошентип, Иса жөнүндө тегеректеги аймактардын баарына кабар тарап жатты.
38 Сыйынуу жайынан чыгып, ал Симондун үйүнө барды. Симондун кайненесинин эти катуу ысып, кыйналып жаткандыктан, Исадан ага жардам беришин өтүнүштү.+
39 Иса аялдын жанына барып, этинин ысыганын басып, айыктырып койду. Аял дароо ордунан туруп, аларга тамак-аш жасай баштады.
40 Күн батып баратканда, Исага ар кандай оорулууларды алып келишти. Ал ар биринин үстүнө колун коюп, аларды айыктырды.+
41 Ошондой эле көптөрдүн ичинен жиндерди кууп чыгарды. Жиндер чыгып баратып: «Сен Кудайдын Уулусуң!» — деп кыйкырып жатышты.+ Бирок Иса жиндерге сүйлөгөнгө тыюу салып койду,+ анткени алар анын Машаяк экенин билишчү.+
42 Таң атканда, Иса ал жерден чыгып, ээн жерге кетти.+ Эл болсо аны издей баштады. Анан тапкан соң кетирбей алып калганга аракет кылышты.
43 Бирок Иса аларга: «Кудайдын Падышалыгы* жөнүндөгү жакшы кабарды башка шаарларга да жарыялашым керек, анткени мен ошол үчүн жиберилгем»,— деди.+
44 Ошентип, ал Жүйүт жериндеги сыйынуу жайларында жакшы кабарды айтып жүрдү.
