Лука 7:1—50
7 Иса элге сүйлөп бүткөндөн кийин Капернаум шаарына барды.
2 Ал жакта бир жүз башынын жакшы көргөн кулу катуу ооруп, өлүм алдында жаткан эле.+
3 Иса жөнүндө укканда жүз башы ага жүйүт аксакалдарын жөнөтүп, андан келип, кулун айыктырып беришин суранды.
4 Алар Исага барып, жалынып-жалбара: «Ал киши жардам беришиңе татыктуу,
5 себеби биздин элди жакшы көрөт. Сыйынуу жайыбызды да ошол куруп берген»,— дешти.
6 Иса алар менен жөнөдү. Ал үйгө жакындап калганда, жүз башы ага досторун жиберип: «Мырзам, убара болбо. Үйүмө киришиңе татыксызмын.+
7 Ошон үчүн да сага өзүм барган жокмун. Бирок бир ооз сөз айтсаң эле, кызматчым айыгып калат.
8 Анткени өзүм бирөөнүн бийлиги астында болсом да, менин да кол алдымда аскерлерим бар. Алардын бирине: „Бар!“ — десем, барат; башкасына: „Кел!“ — десем, келет. Ошондой эле кулума: „Муну кыл!“ — десем, кылат»,— деп айттырып жиберди.
9 Муну укканда Иса таң калып, артында келаткан элге бурулду да: «Силерге айтып коёюн, мындай күчтүү ишенимди атүгүл Ысрайыл жеринен да көргөн эмесмин»,— деди.+
10 Жиберилген кишилер үйгө кайтып келип, кулдун айыгып калганын көрүштү.+
11 Ошондон көп өтпөй Иса Наин шаарына жөнөдү. Артынан шакирттери менен көп эл баратты.
12 Ал шаардын дарбазасына жакындап калганда, бирөөлөр бир аялдын жалгыз уулунун сөөгүн көтөрүп чыгып бараткан эле.+ Ал аял жесир болчу. Аны шаардан чыккан көп эл коштоп баратыптыр.
13 Иса аялды көргөндө боору ооруп:+ «Ыйлаба»,— деди.+
14 Анан жакын барып, табытка колун тийгизди. Табытты көтөрүп бараткандар токтоп калышты. Ошондо Иса: «Жигит, сага айтып жатам: тур!» — деди.+
15 Өлгөн жигит өйдө болуп, отурду да, сүйлөй баштады. Иса аны энесине тапшырды.+
16 Ал жердегилерди коркунуч басып, баары: «Арабыздан улуу пайгамбар чыкты»,+ «Кудай өз элине назарын салды»,— деп Кудайды алкап-даңктап жатышты.+
17 Исанын эмне кылганы жөнүндө бүт Жүйүт жериндегилер, тегерек-четтеги аймактагылардын баары укту.
18 Жакандын шакирттери ага ушулардын баарын айтып барышты.+
19 Ошондо ал эки шакиртин: «Келе турган Машаяк сенсиңби*+ же башка бирөөнү күтүшүбүз керекпи?» — деп Исадан сурап келгени жөнөттү.
20 Алар Исага барып: «Чөмүлдүрүүчү Жакан бизди сага: „Келе турган Машаяк сенсиңби же башка бирөөнү күтүшүбүз керекпи?“ — деп сурап келгени жиберди»,— дешти.
21 Ошол учурда Иса көптөрдү оору-сыркоолорунан,+ катуу илдеттеринен айыктырып, жиндерди кууп чыгарып, көптөгөн сокурлардын көзүн ачты.
22 Анан Жакандын эки шакиртине: «Баргыла да, Жаканга уккан-көргөнүңөрдү айтып бергиле: сокурлар көрүп,+ аксактар басып, пес оорулуулар айыгып, дүлөйлөр угуп,+ өлгөндөр тирилип, жакырларга жакшы кабар жарыяланып жатат.+
23 Менден шектенбеген* адам бактылуу»,— деди.+
24 Жакандын шакирттери кеткенден кийин, Иса элге Жакан жөнүндө мындай деди: «Чөлдүү аймакка эмнени көрүш үчүн бардыңар эле? Шамалга ыргалган камыштыбы?+
25 Ал жакка эмнени көргөнү бардыңар эле? Кымбат кездемеден кийим кийген адамдыбы?+ Андай кымбат баалуу кийим кийгендер, бай жашагандар падыша сарайларында отурушат эмеспи.
26 Анда ал жакка эмнеге бардыңар эле? Пайгамбарды көргөнүбү? Силерге айтып коёюн, ал — пайгамбар, керек болсо, пайгамбардан алда канча улук.+
27 „Мына, мен сенден мурун кабарчымды жөнөтүп жатам, ал сага жол даярдайт!“ — деп ошол тууралуу жазылган.+
28 Силерге айтып коёюн, аялзатынан төрөлгөндөрдүн арасынан Жакандан улук эч ким жок, бирок Кудайдын Падышалыгындагылардын кичинеси андан улук».+
29 Салык жыйнагандар менен бүт эл бул сөздөрдү укканда Кудайдын адил экенин жарыялашты, себеби алар Жаканга барып чөмүлүшкөн эле.+
30 Ал эми фарисейлер менен Мусанын Мыйзамын кыйын билгендер Кудайдын эркин аткаргысы келбей,+ Жаканга барып чөмүлбөй коюшкан.
31 Андан ары Иса: «Бул муундун адамдарын кимге салыштырайын? Булар кимге окшош?+
32 Булар базар аянтында отуруп алып, бири-бирине: „Биз силерге чоор тартып бердик, бирок силер бийлеген жоксуңар. Биз кошок кошуп боздодук, бирок силер ыйлаган жоксуңар“,— деп кыйкырып жаткан жаш балдарга окшош.
33 Анын сыңарындай, Чөмүлдүрүүчү Жакан келди: ал нан да жебейт, шарап да ичпейт.+ Силер: „Анын ичинде жин бар“,— деп айтып жатасыңар.
34 Ошондой эле адам Уулу келди: ал жейт, ичет. Баары бир деле: „Ал — сугалак, шарапты жакшы көргөн киши, салык жыйнагандар менен күнөөкөрлөрдүн досу!“ — деп айтып жатасыңар.+
35 Кандай дебегиле, адамдын акылдуу экени адил иштеринен көрүнөт*»,— деди.+
36 Симон деген бир фарисей Исадан конок болуп кетишин кайра-кайра суранды. Иса анын үйүнө барып, дасторконго отурду.
37 Ошол шаардагыларга күнөөкөр катары таанымал болгон бир аял анын фарисейдин үйүндө экенин билип, жыпар жыттуу май куюлган идиш* көтөрүп келди.+
38 Ал Исанын артына барды да, бут жагына чөгөлөп, бутуна көз жашын төгүп, ыйлай баштады. Анан чачы менен сүртүп, назик өпкүлөп, жыпар жыттуу май куюп майлады.
39 Исаны чакырган фарисей муну көрүп: «Эгерде бул чын эле пайгамбар болсо, ага кандай аял колун тийгизип жатканын, анын күнөөкөр экенин билмек да»,— деп ойлоду.+
40 Анын оюн билген Иса: «Симон, сага айтар бир сөзүм бар»,— деди. Ал: «Айт, Устат!» — деди.
41 Иса: «Башкаларга карыз берип жүргөн бирөөгө эки киши карыз болуп калат: бири 500 динар*, экинчиси 50 динар.
42 Алардын төлөп бергенге эч нерсеси жок болгондуктан, карыз берген киши экөөнүн тең карызын айкөлдүк менен кечип коёт. Эми экөөнүн кимиси аны көбүрөөк жакшы көрөт?» — деп сурады.
43 Симон: «Кимисинин карызы көбүрөөк болсо, ошонусу деп ойлойм»,— деп жооп берди. «Туура айттың»,— деди Иса.
44 Анан аялды карап, Симонго: «Бул аялды көрдүңбү? Үйүңө келгенимде, сен мага бутумду жууганга суу берген жоксуң. Бул аял болсо бутумду көз жашы менен жууп, чачы менен сүрттү.
45 Сен мени өөп тосуп алган жоксуң. Бул аял болсо, келгенимден бери, бутумду назик өпкүлөп жатат.
46 Сен башымды майлаган жоксуң. Бул аял болсо бутумду жыпар жыттуу май менен майлады.
47 Ошондуктан, сага айтып коёюн, ал көбүрөөк жакшы көргөндүктөн, күнөөлөрү көп* болсо да, кечирилди.+ Ал эми кимдин аз эле күнөөсү кечирилсе, ал азыраак жакшы көрөт»,— деп айтты.
48 Анан аялга: «Күнөөлөрүң кечирилди»,— деди.+
49 Ошондо Иса менен дасторкондо отургандар: «Күнөөлөрдү да кечиргидей бул ким өзү?» — деп өз ара сүйлөшө башташты.+
50 Иса болсо аялга: «Сени ишенимиң куткарды.+ Эч тынчсызданба, бара бер»,— деди.
Шилтемелер
^ Сөзмө-сөз: «Келаткан сенсиңби?»
^ Же: «Менин айыман мүдүрүлбөгөн».
^ Же: «акылмандык иштери менен акталат».
^ Сөзмө-сөз: «алебастр бөтөлкө». Кумара сыяктуу мындай кичинекей идиштер Мисирдеги (Египеттеги) Алабастрон шаарынын жанынан казылып алынган таштан жасалчу.
^ Римдиктердин күмүш тыйыны. 1 динар жумушчунун 1 күндүк эмгек акысы болгон. Б14 тиркемесин кара.
^ Же: «чоң».
