Лука 9:1—62
-
Иса 12 элчисине кабар айтканга байланыштуу көрсөтмөлөрдү берет (1—6)
-
Ирод Иса жөнүндө угуп, аң-таң болот (7—9)
-
Иса 5 000 кишини тойгузат (10—17)
-
Петир Исанын Машаяк экенин айтат (18—20)
-
Иса өлтүрүлөрүн айтат (21, 22)
-
Чыныгы шакирттерден күтүлгөн нерсе (23—27)
-
Исанын көрүнүшү өзгөрөт (28—36)
-
Ичине жин кирген бала айыгат (37—43а)
-
Иса өлтүрүлөрүн дагы айтат (43б—45)
-
Шакирттери кимиси улук экени тууралуу өз ара талашат (46—48)
-
Ким бизге каршы болбосо, ал биз тарапта (49, 50)
-
Самариялыктар Исаны кабыл албай коюшат (51—56)
-
Иса анын жолун кантип жолдош керектигин айтат (57—62)
9 Андан кийин Иса 12 элчисин чакырып, аларга жиндерди кууп чыгарганга+, оорулууларды айыктырганга бийлик жана күч берди.+
2 Анан аларды Кудайдын Падышалыгы жөнүндө кабар айтканга, оорулуу адамдарды айыктырганга жөнөтүп жатып:
3 «Жолго эч нерсе: таяк да, азык салынган баштык да, нан да, акча* да, ашыкча кийим* да албагыла.+
4 Кайсы үйгө кирбегиле, ошол жерде калып, кайра ошол жерден жолго чыккыла.+
5 Эгер кайсы бир жерде силерди кабыл алышпаса, ал шаардан чыгып баратканда бутуңардагы чаңды күбүп салгыла*. Аларга эскерткениңерди ошентип көрсөткөн болосуңар*»,— деди.+
6 Элчилер жолго чыгып, айыл-кыштактарды кыдырып, бардык жерде жакшы кабарды жарыялап, оорулууларды айыктырып жүрүштү.+
7 Дубан башчысы Ирод булар жөнүндө угуп, аң-таң болду. Анткени кээ бирөөлөр Жакан тирилди дешсе,+
8 айрымдары Илияс келди деп, дагы башкалары байыркы пайгамбарлардын бири тирилди деп жатышты.+
9 Ирод: «Жакандын башын алдырбадым беле.+ Анда эл сөз кылып жаткан бул киши ким?» — деп, аны аябай көргүсү келди.+
10 Элчилер кайтып келип, Исага эмнелерди кылышканын бүт айтып беришти.+ Өздөрүнчө болуш үчүн, Иса аларды ээрчитип, Бетсаида деген шаарга кетти.+
11 Бирок эл муну билип калып, артынан жөнөдү. Иса аларды жылуу тосуп алып, Кудайдын Падышалыгы жөнүндө айта баштады жана оорулууларды айыктырды.+
12 Кеч кире баштаганда, 12 элчиси Исанын жанына келип: «Элди тарат, тегеректеги айыл-кыштактарга барып, өздөрүнө түнөк жай, тамак-аш табышсын, анткени бул жер ээн»,— дешти.+
13 Бирок Иса: «Буларга тамак-ашты силер бергиле»,— деди.+ Шакирттери: «Бизде беш нан менен эки балыктан башка эч нерсе жок. Же эмне, барып, бул элдин баарына тамак-аш сатып келелиби?» — дешти.
14 Ал жерде 5 000дей киши бар эле. Иса шакирттерине: «Элди болжол менен элүү-элүүдөн кылып отургузгула»,— деди.
15 Шакирттери ал айткандай кылып, баарын отургузушту.
16 Андан кийин Иса беш нан менен эки балыкты алды да, асманды карап, Кудайдан тиленди*. Анан аларды бөлүп, элге таратыш үчүн шакирттерине бере баштады.
17 Ошентип, бардыгы тоё жешти. Жегенден калганын чогултканда, 12 себет толду.+
18 Кийинчерээк Иса эч ким жок жерде Кудайдан тиленип жатканда, шакирттери жанына барышты. Иса алардан: «Эл мени ким деп ойлойт?» — деп сурады.+
19 Алар: «Айрымдар Чөмүлдүрүүчү Жакан, башкалары Илияс десе, дагы бирөөлөрү байыркы пайгамбарлардын бири тирилди деп айтып жүрүшөт»,— деп жооп беришти.+
20 Ошондо Иса: «Силерчи? Силер мени ким деп ойлойсуңар?» — деп сурады. Петир: «Сен Кудай жиберген Машаяксың»,— деди.+
21 Анан Иса аларга бул жөнүндө эч кимге айтпашы керектигин катуу эскертти да:+
22 «Адам Уулу көп азап чегиши керек. Аксакалдар, жогорку дин кызматчылар, диний мыйзамдарды окуткандар аны четке кагышат, анан ал өлтүрүлүп,+ үчүнчү күнү тирилет»,— деп айтты.+
23 Андан кийин ал баарына: «Ким менин жолдоочум болгусу келсе, өзүнөн баш тартып,+ жаза устунун* күн сайын көтөрүп, дайыма менин жолумду жолдосун.+
24 Анткени ким жанын сактап калгысы келсе, андан айрылат, ал эми ким мен үчүн жанынан айрылса, аны сактап калат*.+
25 Чынында, адам бүт дүйнөгө ээ болуп, бирок өмүрүнөн айрылса же өзүнө зыян келтирсе, ага эмне пайда?+
26 Ким менин шакиртим болгонуна, сөздөрүмө ишенгенине уялса, адам Уулу да Атасынын, өзүнүн жана ыйык периштелердин даңкы менен келгенде аны шакирти катары кабыл алгандан уялат.+
27 Ишенип койгула, бул жерде тургандардын айрымдары Кудайдын Падышалыгынын башкарып жатканын көрмөйүнчө өлүшпөйт»,— деди.+
28 Ушул сөздөрдү айткандан 8 күндөй өткөндөн кийин, Иса Петирди, Жаканды, Жакыпты ээрчитип, Кудайдан тилениш үчүн тоого чыкты.+
29 Ал Кудайдан тиленип жатканда, жүзү өзгөрүп, кийими көз уялткыдай жаркырап, аппак болуп калды.
30 Анан капысынан эки киши пайда болуп, аны менен сүйлөшүп жатты. Алар Муса менен Илияс эле.
31 Экөөнөн тең нур чачырап турду. Алар Исанын дүйнөдөн кетери, башкача айтканда, Иерусалимде боло турган окуялар жөнүндө сүйлөшүп жатышты.+
32 Петир менен жанындагы эки шакирт болсо үргүлөп кетишти. Бирок ойгонушканда, Исанын жаркырап жатканын жана анын жанында турган эки кишини көрүштү.+
33 Ал экөө Исанын жанынан алыстап баратканда, Петир Исага: «Устат, бул жер бизге аябай жакты. Ушул жерге үч алачык жасайлы: бири сага, бири Мусага, бири Илияска болсун»,— деди. Бирок эмне деп айтканын өзү да түшүнгөн жок.
34 Ал сүйлөп жатканда, булут пайда болуп, аларды каптап калды. Ошондон улам шакирттер коркуп кетишти.
35 Анан булут ичинен: «Бул — менин Уулум. Аны өзүм тандап алгам.+ Уулумду уккула»,+— деген үн+ угулду.
36 Үн угулганда, шакирттери Исанын жалгыз турганын көрүштү. Алар көргөндөрү жөнүндө ошол күндөрү эч кимге айтпай, ичинде сактап жүрүштү.+
37 Эртеси күнү алар тоодон түшкөндө, Исаны көп эл тосуп чыкты.+
38 Алардын арасынан бир киши мындай деп кыйкырды: «Устат, суранам, уулумду көрүп бер. Ал — менин жападан жалгыз балам.+
39 Ичине жин киргенде, ал капысынан кыйкырып жиберет да, дене бою карышып, калчылдап, оозунан көбүк чыга баштайт. Жин аны жабыркаткандан кийин да чыккысы келбей жатып араң чыгат.
40 Шакирттериңден жинди кууп чыгарышын өтүнсөм, колдорунан келбей койду».
41 Ошондо Иса: «Оо, ишеними жок бузулган муун,+ качанга чейин силер менен болушум керек? Силерге дагы канча чыдашым керек? Уулуңду алып кел»,— деди.+
42 Бала Исага келатканда, жин аны жерге көтөрүп чаап, катуу калтырата баштады. Бирок Иса жинди кууп чыгып, баланы айыктырды да, атасына тапшырды.
43 Ошондо баары Кудайдын улуу күчүнө аң-таң болушту.
Ал жердегилер Исанын кылган иштерине таң калып жатканда, Иса шакирттерине:
44 «Муну жакшылап угуп, эсиңерге түйүп алгыла: адам Уулун душмандарынын колуна салып беришет»,— деди.+
45 Бирок шакирттери анын айткандарын түшүнүшкөн жок, себеби ал сөздөрдүн мааниси алардан жашырылган эле. Анткен менен Исадан айткандарынын маанисин сурагандан коркушту.
46 Андан кийин шакирттери кимиси улук экени тууралуу өз ара талаша башташты.+
47 Иса алардын оюн билип, бир кичинекей баланы жанына тургузду да:
48 «Ким ушул кичинекей баладай болгондорду мен үчүн* кабыл алса, ал мени да кабыл алган болот. Ал эми ким мени кабыл алса, ал мени жибергенди да кабыл алган болот.+ Ким араңарда өзүн кичүүдөй алып жүрсө, ошол баарынан улук»,— деди.+
49 Жакан Исага: «Устат, биз сенин атыңды айтып жиндерди кууп чыгарып жүргөн бир кишини көрдүк. Биз менен чогуу жүрбөгөндүктөн, аны тыйганга аракет кылдык»,— деди.+
50 Иса: «Аны жөн койгула, тоскоолдук кылбагыла. Анткени ким силерге каршы болбосо, ал силер тарапта»,— деди.
51 Асманга кете турган убагы жакындаганда,+ Иса Иерусалимге барам деп бек чечип алды.
52 Ал өзүнөн мурун шакирттерин жөнөттү. Алар барып, Исанын келишине даярдык көрүш үчүн самариялыктардын айылына киришти.
53 Бирок Иса Иерусалимге бараткандыктан, самариялыктар аны кабыл албай коюшту.+
54 Муну көргөндө шакирттери Жакып менен Жакан:+ «Мырзам, асмандан от түшүп, буларды жалмап кетсин деп айталыбы?» — дешти.+
55 Бирок Иса бурулуп, аларды тыйып койду.
56 Ошентип, алар башка айылга кетишти.
57 Жолдо баратышканда, бир киши Исага: «Сен каякка барсаң, мен да ошол жакка барам»,— деди.
58 Бирок Иса ага: «Түлкүлөрдүн ийини, көктө учкан канаттуулардын уясы бар, адам Уулунун болсо баш калкалаар жайы жок»,— деп айтты.+
59 Андан кийин Иса башка бирөөнө: «Менин жолдоочум бол»,— деди. Ал: «Мырзам, адегенде үйүмө барып, атамды коюп келгенге уруксат этчи»,— деди.+
60 Бирок Иса: «Өлүктөр*+ өлгөн адамдарын өздөрү койсун. Сен болсо барып, бардык жерде Кудайдын Падышалыгы жөнүндө жарыяла»,— деди.+
61 Дагы бирөө келип: «Мырзам, мен сенин жолуңду жолдойм. Бирок адегенде үйдөгүлөрүм менен коштошуп келгенге уруксат берчи»,— деп айтты.
62 Иса ага: «Сокону кармап баратып артын карай берген адам+ Кудайдын Падышалыгынын баталарын ала албайт*»,— деди.+
Шилтемелер
^ Сөзмө-сөз: «күмүш».
^ Же: «эки кийим».
^ Бутка жуккан чаңды күбүп салуу жоопкерчиликтен бошонууну билдирген.
^ Же: «Бул аларга каршы күбөлөндүрүү болсун».
^ Сөзмө-сөз: «батасын берди».
^ Мындай устун кимдир бирөөнү жазага тартыш үчүн колдонулчу. Бирок бул жерде, сыягы, Исанын жолдоочулары кабыла турган кыйынчылыктарга, сыноолорго карата айтылган. Сөздүктү кара.
^ Же: «кайра жашайт».
^ Же: «ысмым үчүн».
^ Кудайдын көз алдында өлүк болуп эсептелгендер жөнүндө сөз жүрүп жатат.
^ Сөзмө-сөз: «Кудайдын Падышалыгы үчүн жараксыз».
