Малаки 2:1—17
2 «Эми, дин кызматчылар, силерге мындай деп эскертем*:+
2 Эгер укпасаңар, менин ысмымды даңкташ үчүн аны жүрөгүңөргө түйүп албасаңар,— дейт асман аскерлеринин Кудайы Жахаба,— анда силерге каргыш жиберем,+ батаңарды каргышка айлантам,+ атүгүл айлантып да койдум, себеби осуятымды жүрөгүңөргө түйгөн жоксуңар».
3 «Кылган иштериңер үчүн себилген үрөнүңөрдү өстүрбөй коём*,+ бетиңерге кык чачам, майрамдарыңарда курмандыкка чалган малыңардын кыгын чачам. Өзүңөр болсо ошол кыктын арасына ыргытыласыңар.
4 Ошондо бул осуятты силерге Леби менен түзгөн келишимим күчүн жоготпошу үчүн бергенимди билесиңер»,+— дейт асман аскерлеринин Кудайы Жахаба.
5 «Леби менен түзгөн келишимим өмүр менен тынчтык келишими болгон. Менден коркушу* үчүн, өмүрүн сактап, ага тынчтык бергем. Ал менден коркуп, ысмымды кастарлап турган.
6 Ал чындыктын мыйзамын үйрөткөн,+ эч качан жаман сөз сүйлөгөн эмес. Мени менен тынчтыкта болгон, менин алдымда чынчылдык менен иш кылган,+ көптөрдү жаман жолдон кайтарган.
7 Анткени дин кызматчынын милдети — элге Кудай жөнүндө билим берүү. Эл мыйзам жөнүндө андан сурашы керек,+ себеби ал — асман аскерлеринин Кудайы Жахабанын кабарчысы.
8 Бирок силер туура жолдон чыгып кеттиңер. Силердин айыңардан көптөр мыйзамды аткарбай калды*.+ Леби менен түзүлгөн келишимди буздуңар,+— дейт асман аскерлеринин Кудайы Жахаба.—
9 Менин жолумда жүрбөгөнүңөр үчүн, мыйзамды баарына бирдей колдонбой, адилетсиздик кылганыңар үчүн,+ силерди бардык элдерге жек көрүндү кылам, алардын алдында басынтам».
10 Баарыбыздын атабыз бир эмеспи?+ Баарыбызды бир эле Кудай жараткан эмеспи? Анда эмнеге Кудайдын ата-бабаларыбыз менен түзгөн келишимин бузуп*, бири-бирибизди алдап, жамандык кылып жатабыз?+
11 Жүйүттүн эли баш ийбестик кылып жатат, Ысрайыл менен Иерусалимде жийиркеничтүү иштер жасалып жатат. Жүйүттөр ыйыктыкты сүйгөн Жахабаны* урматтабай,+ башка кудайга сыйынган кыздарга үйлөнүп алышты.+
12 Жахаба ушундай иш кылгандардын ар бирин, ал ким болбосун, атүгүл асман аскерлеринин Кудайы Жахабага тартуу алып келип жатса да, Жакыптын чатырларынан* жок кылат.+
13 Силер мындан башка да жаман иш кылып жатасыңар, анын айынан Жахабанын курмандык жайына көз жаш төгүлүп, муң-зар менен үшкүрүк угулуп жатат. Ошон үчүн эми ал тартууларыңарды карабайт, алып келген бир да нерсеңерди кабыл албайт.+
14 Силер: «Эмнеге?» — дейсиңер. Анткени Жахаба сенин жаш чагыңда алган аялыңды, ал сенин жан шеригиң, келишим түзүп алган жубайың* болсо да, таштап, башкага кетип калганыңа күбө болуп жатат.+
15 Бирок араңарда андай ишке барбагандар да бар, себеби аларда кандайдыр бир деңгээлде Кудайдын ыйык руху* бар. Алардын каалаганы эмне? Кудайдын элинин арасында боло турган урпактар*. Ошондуктан оюңарды, ниетиңерди* таза сактагыла, эч кимиңер жаш чагыңарда алган аялыңарды таштап, башкага кетип калбагыла.
16 «Себеби мен ажырашууну жек көрөм,+— дейт Ысрайылдын Кудайы Жахаба,— зордук-зомбулук кылгандарды* жек көрөм,— дейт асман аскерлеринин Кудайы Жахаба.— Оюңарды, ниетиңерди таза сактагыла, бири-бириңерди алдап, жамандык кылбагыла».+
17 Силер Жахабаны сөздөрүңөр менен чарчаттыңар.+ Анан: «Биз аны эмне кылып чарчаттык?» — дейсиңер. Силер аны: «Жаман иш кылгандардын баарын Жахаба жакшы деп эсептейт, ага ошондойлор жагат»,+— деген сөздөрүңөр менен, «Кана адилеттүүлүктүн Кудайы?» — деген сөздөрүңөр менен чарчаттыңар.
Шилтемелер
^ Же: «мындай осуят берем».
^ Же: «жок кылам».
^ Же: «Мени урматтап-сыйлашы».
^ Же балким: «Силер берген көрсөтмөдөн улам көптөр мүдүрүлүштү».
^ Сөзмө-сөз: «арамдап».
^ Же балким: «Жахабанын ыйык жайын».
^ Же: «ысрайыл элинин арасынан».
^ Же: «мыйзамдуу аялың».
^ Б. а. ыйык күчү. Сөзмө-сөз: «рухтун калдыгы».
^ Сөзмө-сөз: «Кудайдын тукуму».
^ Сөзмө-сөз: «рухуңарды».
^ Сөзмө-сөз: «кийимин зордук-зомбулук менен каптагандарды».
