Марк 1:1—45
-
Чөмүлдүрүүчү Жакан элге эмне кылышы керектигин айта баштайт (1—8)
-
Иса чөмүлтүлөт (9—11)
-
Шайтан Исаны сынайт (12, 13)
-
Иса Галилеяда жакшы кабар жарыялай баштайт (14, 15)
-
Иса алгачкы шакирттерин чакырат (16—20)
-
Кишинин ичинен жинди кууп чыгат (21—28)
-
Капернаумдан көптөрдү айыктырат (29—34)
-
Ээн жерден Кудайдан тиленет (35—39)
-
Пес оорулууну айыктырат (40—45)
1 Кудайдын Уулу Иса Машаяк* жөнүндөгү жакшы кабардын башталышы.
2 Ышая пайгамбардын китебинде: «(Мына, мен сенден мурун кабарчымды жөнөтүп жатам, ал сага жол даярдайт.)*+
3 Ээн талаада бирөө: „Жахабага* жол даярдагыла! Анын жолдорун тегиздегиле“,— деп жар салып жүрөт»,— деп жазылган. +
4 Ошол сөздөргө ылайык, Чөмүлдүрүүчү Жакан чөлдүү аймакка* барып, элге күнөөлөрү кечирилиши үчүн өкүнүп, сууга чөмүлүшү* керектигин жар сала баштады.+
5 Ага бүт Жүйүт жеринде, Иерусалимде жашагандардын баары келип, күнөөлөрүн мойнуна алып жатышты. Жакан болсо аларды Иордан дарыясында чөмүлдүрдү.+
6 Ал төөнүн жүнүнөн кийим кийип, белине кайыш кур курчанып жүрчү,+ жегени жапайы аарынын балы менен чегиртке болчу.+
7 Жакан элге: «Артымда менден күчтүү бирөө келатат. Мен эңкейип, анын сандалынын боосун чечкенге да татыксызмын.+
8 Мен силерди сууга чөмүлттүм. Ал болсо силерди Кудайдын ыйык рухуна* чөмүлтөт»,+— деп жарыялап жүрдү.
9 Ошол күндөрдө Иса Галилеядагы Назарет шаарынан Жаканга барды. Жакан аны Иордан дарыясына чөмүлттү.+
10 Иса суудан чыгары менен асмандын ачылганын, Кудайдын ыйык рухунун көгүчкөндөй болуп ага түшүп келатканын көрдү.+
11 Анан асмандан: «Сен менин сүйүктүү Уулумсуң. Мен сага ыраазымын»,— деген үн угулду.+
12 Ошол замат Кудайдын ыйык руху Исага ээн талаага барганга түрткү берди.
13 Иса жапайы жаныбарлар жашаган ээн талаада 40 күн болду.+ Ошол жактан Шайтан аны сынады. Анан Исага периштелер кызмат кылышты.+
14 Жакан камакка алынгандан кийин, Иса Галилеяга барды да,+ Кудайдын жакшы кабарын жарыялай баштады.+
15 Ал элге: «Белгиленген убакыт келди. Кудайдын Падышалыгы жакындап калды. Күнөөлөрүңөр үчүн өкүнүп,+ жакшы кабарга* ишенгиле»,— деп айтып жүрдү.
16 Галилея деңизин* бойлоп баратып Иса деңизге тор салып жаткан+ Симон менен анын иниси Андрести+ көрдү. Алар балыкчылар эле.+
17 Иса экөөнө: «Менин артыман жүргүлө, мен силерди адам уулоочу кылам»,— деди.+
18 Алар ошол замат торлорун таштап, Исанын артынан жөнөштү*.+
19 Бир аз ары баскандан кийин Иса кайыкта торлорун оңдоп отурган ага-инилерди — Зебедейдин уулдары Жакып менен Жаканды — көрдү да,+
20 аларды ошол замат чакырды. Ошондо алар кайыкта отурган атасын жалданган жумушчулары менен калтырып, Исанын артынан жөнөштү.
21 Анан аны менен бирге Капернаумга кетишти.
Дем алыш күн* болору менен, Иса сыйынуу жайына* кирип, элди окута баштады.+
22 Эл анын кантип окутканына аябай таң калды, анткени ал диний мыйзамдарды окуткандардай* эмес, Кудай бийлик берген кишидей окутуп жатты.+
23 Ошол убакта сыйынуу жайында ичине жин кирип алган бир киши бар болчу.
24 Ал: «Назареттик Иса, бул жакка эмнеге келдиң?+ Бизди жок кылганы келдиңби? Сенин ким экениңди билем: сен ыйыксың, сени Кудай жиберген»,— деп кыйкыра баштады.+
25 Бирок Иса жинди тыйып: «Үнүңдү бас да, бул кишинин ичинен чыгып кет!» — деп айтты.
26 Ошондо жин тиги кишинин дене боюн карыштыра калчылдатып, болгон күчү менен кыйкырды да, ичинен чыгып кетти.
27 Баарынын үрөйү учуп: «Бул эмнеси, ыя? Бул башкача окутат экен! Мунун жиндерге да буйрук бергенге бийлиги бар экен. Алар болсо буга баш ийип жатышат»,— деп өз ара сүйлөшө башташты.
28 Ошентип, Иса тууралуу уу-дуу кептер Галилеянын туш тарабына чагылгандай тез тарап кетти.
29 Сыйынуу жайынан чыгар замат Иса, Жакып, Жакан, Симон, Андрес болуп Симон менен Андрестин үйүнө барышты.+
30 Симондун кайненесинин+ эти ысып, ооруп жаткан эле. Муну дароо Исага айтышты.
31 Ошондо Иса аялдын жанына барып, колунан кармап тургузду. Аял оорусунан айыгып, аларга тамак-аш жасай баштады.
32 Күн батып, кеч киргенде, эл Исага бардык оорулууларды, жин оорусу барларды да алып келе баштады.+
33 Ошентип, эшиктин алдына шаардагылардын баары чогулуп калды.
34 Иса ар кандай оорудан кыйналган далай кишилерди айыктырды,+ көптөрдүн ичинен жиндерди кууп чыгарды. Бирок Иса жиндерге ал жөнүндө айтканга тыюу салды, анткени алар анын Машаяк экенин* билишчү.
35 Иса жарык кире электе туруп, ээн жерге барды да, Кудайдан тилене баштады.+
36 Ал ортодо Симон менен жанындагылар аны издеп чыгышты.
37 Тапкандан кийин ага: «Сени баары издеп жүрөт»,— дешти.
38 Бирок Иса: «Башка жактарга, жакын жердеги шаарчаларга да баралы. Мен ошол жактагыларга да жакшы кабарды айтышым керек, себеби ошон үчүн келгем»,— деди.+
39 Ошентип, ал бүт Галилеяны аралап, сыйынуу жайларында жакшы кабарды айтып, жиндерди кууп чыгарып жүрдү.+
40 Бир күнү ага пес оорулуу бирөө келип, алдына чөгөлөп: «Эгер кааласаң эле мени айыктыра аласың*»,— деп жалбара айтты.+
41 Ошондо Исанын боору ооруп, ага колун тийгизди да: «Каалайм! Айык»,— деди.+
42 Тиги киши ошол замат пес оорусунан айыгып, таза болуп калды.
43 Ал киши кетерде, Иса ага катуу эскертип:
44 «Эч кимге эч нерсе айтпа. Баргын да, дин кызматчыга* көрүн. Дин кызматчылар чындап эле айыкканыңды көрүшү үчүн, Муса айткан+ нерселерди алып бар»,— деди.+
45 Бирок Исанын жанынан кеткенден кийин ал киши болгон окуяны элдин баарына айтып, бардык жерде жарыялай баштады. Ошон үчүн Иса шаарга ачык кире албай, ээн жерлерде жүрдү. Ошондо да ага эл туш тараптан келип жатты.+
Шилтемелер
^ Кашаадагы текст Малаки 3:1ден алынган.
^ Бул эли аз, иштетилбеген жерди билдирет. Андай жерде бак-дарактар, суу башка жактарга салыштырмалуу аз болчу.
^ Б. а. ыйык күчүнө.
^ Чындыгында, көл болгон. Ыйык Китепте ал Генисарет көлү, Галилея деңизи жана Тиберия деңизи деп да аталат.
^ Бул жерде «Исанын артынан жөнөө» деген сөз айкашы анын жолдоочусу болуу дегенди билдирет.
^ Же балким: «анын ким экенин».
^ Же: «таза кыла аласың».
