Марк 10:1—52
10 Иса ал жерден чыгып, Иордандын аркы өйүзүнө, Жүйүт жери менен чектешкен аймакка барды. Жанына кайрадан көп эл чогулду. Иса адатынча аларды окута баштады.+
2 Ошондо Фарисейлер келип, аны сынаш үчүн, эркек кишинин аялы менен ажырашканы мыйзамга ылайык келер-келбесин сурашты.+
3 Ал: «Муса силерге кандай буйрук берди эле?» — деп кайра өзүлөрүнө суроо берди.
4 Алар: «Муса эркек кишинин талак кат жазып, аялы менен ажырашса болорун айткан»,— дешти.+
5 Буга Иса: «Ал силерге ошол мыйзамды жүрөгүңөрдүн мерездигинен улам жазып калтырган.+
6 Бирок эң башында „Кудай адамдарды эркек-аял кылып жараткан.+
7 Ошондуктан эркек ата-энесин калтырып,+
8 аялы экөө бир бүтүн* болот“.+ Ошентип, эми алар эки бөлөк эмес, бир бүтүн.
9 Ошон үчүн Кудай кошконду* адам ажыратпасын»,— деди.+
10 Кайра үйгө келишкенде, шакирттер Исадан ошол жөнүндө сурай башташты.
11 Ал: «Аялы менен ажырашып*, башкага үйлөнгөн киши ойноштук кылып, биринчи аялына каршы иш кылган болот.+
12 Күйөөсү менен ажырашып, башкага турмушка чыккан аял да ойноштук кылган болот»,— деп айтты.+
13 Иса колун коюп, батасын бериши үчүн, эл ага кичинекей балдарын алып келе баштады. Бирок шакирттер аларды тыйып жатышты.+
14 Муну көргөндө ал ачууланып, шакирттерине: «Балдарды мага коё бергиле, аларга тоскоолдук кылбагыла, анткени Кудайдын Падышалыгынын баталарын ушуларга окшогондор алат.+
15 Силерге айтып коёюн, ким Кудайдын Падышалыгын кичинекей баладай болуп кабыл албаса, ал анын баталарын албайт*»,— деди.+
16 Анан балдарды кучагына алып, алардын үстүнө колун коюп, батасын бере баштады.+
17 Иса жолго чыкканда, жанына бир киши чуркап келди да, чөгөлөп: «Жакшы Устат*, түбөлүк өмүрдү мурасташ үчүн эмне кылышым керек?» — деп сурады.+
18 Иса ага: «Эмне үчүн мени жакшы дейсиң? Жакшы деп аталганга Кудайдан башка эч ким татыктуу эмес.+
19 Сен: „Киши өлтүрбөгүлө,+ ойноштук кылбагыла,+ уурдабагыла,+ жалган күбө болбогула,+ алдабагыла,+ ата-энеңерди сыйлагыла“,+— деген осуяттарды билесиң да»,— деп айтты.
20 Тиги киши: «Устат, мунун баарын бала кезимден бери аткарып келатам»,— деди.
21 Иса аны карап, жакшы көрүп кетти. Анан: «Аткарышың керек болгон дагы бир нерсе бар: бар да, колуңда болгон нерселерди сатып, түшкөн акчаны кедей-кембагалдарга таратып бер, ошондо асманда казынаң болот. Анан келип, менин жолдоочум бол»,— деп айтты.+
22 Муну укканда ал капаланып, көңүлү чөккөн бойдон кетип калды, анткени мал-мүлкү аябай көп эле.+
23 Иса тегерегин карап, шакирттерине: «Акчасы көптөрдүн Кудайдын Падышалыгына кириши* кандай кыйын!» — деди.+
24 Шакирттери анын айтканына таң калышты. Иса болсо кайрадан аларга: «Достор*, Кудайдын Падышалыгына кириш кандай кыйын!
25 Байдын Кудайдын Падышалыгына киргенине караганда төөнүн ийненин көзүнөн өткөнү оңоюраак»,— деди.+
26 Алар ого бетер таң калып, ага*: «Анда ким куткарыла алат?» — дешти.+
27 Иса аларды карап: «Бул адам баласынын колунан келбейт, ал эми Кудайдын колунан келбеген эч нерсе жок. Анткени Кудай баарын кыла алат»,— деди.+
28 Ошондо Петир ага: «Мына, биз баарын таштап, сени ээрчип жүрөбүз»,— деп айтты.+
29 Буга Иса: «Ишенип койгула, ким мен үчүн жана Кудайдын жакшы кабары үчүн үй-жайын, ага-инилерин же эже-карындаштарын, энесин же атасын, балдарын же жерин калтырса,+
30 ал азыр, ушул убакта, куугунтук+ менен катар 100 эсе көп үй-жайга, ага-иниге, эже-карындашка, энеге, балага жана жерге, ал эми келечектеги заманда* түбөлүк өмүргө ээ болот.
31 Биринчилердин көптөрү акыркы, ал эми акыркылар биринчи болот»,— деди.+
32 Алар Иерусалимди көздөй жол тартышты. Иса алдыда бара жатты. Шакирттери таң калып, алардын артындагылар болсо коркуп баратышты. Иса кайрадан 12 шакиртин өзүнчө бөлүп алып, аларга өзүн эмнелер күтүп турганын айта баштады.+
33 Ал: «Мына, биз Иерусалимге баратабыз. Ал жерден адам Уулун жогорку дин кызматчылар менен диний мыйзамдарды окуткандардын колуна салып беришет. Алар болсо ага өлүм өкүмүн чыгарып, башка элден болгон адамдарга өткөрүп беришет.
34 Алар ага түкүрүшөт, аны шылдыңдашат, сабашат, анан өлтүрүшөт. Бирок ал үчүнчү күнү* тирилет»,— деди.+
35 Зебедейдин эки уулу Жакып менен Жакан+ Исанын жанына барып: «Устат, бир өтүнүчүбүз бар, орундатып берчи»,— дешти.+
36 Ал: «Эмне өтүнүчүңөр бар? Эмне кылып берейин?» — деп сурады.
37 Алар: «Даңкка бөлөнгөнүңдө, бирибизди оң жагыңа, экинчибизди сол жагыңа отургузчу»,— дешти.+
38 Иса: «Эмне сурап жатканыңарды өзүңөр билбейсиңер. Мен ичип жаткан чөйчөктөн* иче аласыңарбы же мен башымдан кечирип жаткан нерсени башыңардан кечире аласыңарбы?*» — деп сурады.+
39 Алар: «Ооба»,— дешти. Ошондо Иса: «Мен ичип жаткан чөйчөктөн ичип, мен башымдан кечирип жаткан нерсени башыңардан кечиресиңер.+
40 Бирок оң жагым менен сол жагыма кимдердин отурарын мен чечпейм. Ал орундар кимдерге даярдалса, ошолор отурат»,— деди.
41 Муну укканда берки 10 шакирт Жакып менен Жаканга ачууланышты.+
42 Иса аларды чакырып алып: «Башкаруучу деп эсептелгендердин элге үстөмдүк кыларын, аттуу-баштуулардын элдин үстүнөн бийлик жүргүзөрүн билесиңер.+
43 Бирок силердин араңарда андай болбосун. Араңардан ким улук болгусу келсе, ал силерге кызматчы болсун.+
44 Араңардан ким биринчи болгусу келсе, ал баарыңарга кул болсун.
45 Анткени адам Уулу да өзүнө кызмат кылдырыш үчүн эмес, кайра өзү кызмат кылып,+ көптөр үчүн өз өмүрүн кун* катары бериш үчүн келген»,— деди.+
46 Анан Иса менен шакирттери Жерихого барышты. Кийин ал шаардан көп эл менен чыгып баратышканда, жол боюнда Тимейдин уулу Бартимей деген сокур кайырчы отурган эле.+
47 Назареттик Исанын өтүп баратканын укканда ал: «Дөөтүнүн Уулу+ Иса, мага кайрымдуулук кыла көр!» — деп кыйкыра баштады.+
48 Көптөр аны тыя баштады. Ал болсо: «Дөөтүнүн Уулу, мага кайрымдуулук кыла көр!» — деп ого бетер катуу кыйкыра берди.
49 Иса токтоп: «Бери чакыргыла»,— деди. Ошондо сокур кишиге: «Ордуңан тур, коркпо, сени чакырып жатат»,— дешти.
50 Ал сырт кийимин чечип ыргытты да, ордунан секирип туруп, Исага барды.
51 Иса андан: «Эмне кылып берейин?» — деп сурады. Сокур киши: «Устат*, көзүм көрсүнчү»,— деди.
52 Иса ага: «Бара бер. Сени ишенимиң айыктырды»,— деп айтты.+ Ошол замат анын көзү көрүп калды.+ Анан ал Исанын артынан жөнөдү.
Шилтемелер
^ Сөзмө-сөз: «бир дене».
^ Сөзмө-сөз: «бир моюнтурукка кошконду».
^ Ушул жана кийинки аятта жыныстык адеп-ахлаксыздыктан башка себеп менен ажырашуу жөнүндө сөз жүрүп жатат. Кара: Матай 19:9.
^ Сөзмө-сөз: «ага кирбейт».
^ Сыягы, бул сөздөрдү жагыныш үчүн наам катары колдонгон. Диний устаттарга кайрылганда ушу сыяктуу наамдар колдонулчу.
^ Же: «асман Падышалыгынын баталарын алышы».
^ Сөзмө-сөз: «Балдар».
^ Же балким: «бири-бирине».
^ Сөзмө-сөз: «үч күндөн кийин».
^ Сөзмө-сөз: «мен чөмүлө турган чөмүлтүлүү менен чөмүлө аласыңарбы?»
^ Бул жерде «чөйчөк» деген сөз Кудайдын эрки боюнча Исанын Кудайга акарат кылды деп ак жерден айыпталып өлтүрүлөрүн билдирет.
^ Сөзмө-сөз: «Раббуни».
