Марк 12:1—44
12 Иса аларга мындай мисал келтирди: «Бир киши жүзүм отургузат да,+ жүзүмзарын айландыра тосуп коёт. Анын ичине жүзүм сыга турган жай казып, мунара салат.+ Анан жүзүмзарын багбандарга ижарага берип, өзү башка өлкөгө кетет.+
2 Түшүм жыйнай турган убак келгенде, ал жүзүмзарынын түшүмүнөн өз үлүшүн алыш үчүн багбандарга кулун жөнөтөт.
3 Бирок алар аны кармап алышат да, сабап, куру кол кетирип жиберишет.
4 Жүзүмзардын ээси дагы бир кулун жөнөтөт. Алар анын башын жарып, кордошот.+
5 Ал дагы башкасын жөнөтөт. Багбандар аны өлтүрүп салышат. Дагы көптөгөн кулдарын жөнөтөт, бирок тигилер кээ бирин сабап, кээ бирлерин өлтүрүп салышат.
6 Жүзүмзардын ээсинин жакшы көргөн уулу бар эле.+ „Уулумду сыйлашар“ — деп, акырында аны жөнөтөт.
7 Бирок багбандар бири-бирине: „Бул мурасчы да!+ Жүргүлө, өлтүрүп салалы, ошондо мурасы биздики болуп калат“,— дешет.
8 Анан аны кармап алып, өлтүрүшөт да, жүзүмзардын сыртына сүйрөп чыгарып салышат.+
9 Эми жүзүмзардын ээси эмне кылат? Ал барып, багбандарды өлтүрүп, жүзүмзарын башкаларга ижарага берет.+
10 Ыйык Жазмадан: „Куруучулар жаратпай койгон таш бурчка коюла турган негизги таш болуп калды.+
11 Муну Жахаба кылды. Бул биз үчүн керемет“,— деген сөздөрдү эч качан окуган эмес белеңер?»+
12 Ошондо Исанын душмандары анын бул мисалды өздөрүнө карата айтканын түшүнүп, аны кантип колго түшүрүштүн жолун издей башташты. Бирок элден корккондуктан кетип калышты.+
13 Андан кийин, Исаны сөзүнөн кармаш үчүн, ага кээ бир фарисейлер менен Ироддун таламдаштарын жиберишти.+
14 Алар келип: «Устат, сенин дайыма чындыкты айтарыңды билебиз. Эч кимге жагынбайсың, анткени адамдын ээлеген абалына карабайсың. Кудайдын жолу жөнүндө үйрөткөндөрүңдүн баары туура экенин да билебиз. Айтчы, падышага* киши башына төлөнчү салыкты төлөгөн туурабы же туура эмеспи?
15 Аны төлөшүбүз керекпи же жокпу?» — дешти. Алардын эки жүздүүлөнүп жатканын билип, Иса: «Мени эмнеге сынап жатасыңар? Мага тыйын* алып келип көрсөткүлөчү»,— деди.
16 Ага бир тыйынды алып келишти. Иса: «Бул жерде кимдин сүрөтү тартылып, кимдин аты жазылып турат?» — деп сурады. Алар: «Падышанын»,— дешти.
17 Ошондо ал: «Анда падышага тиешелүүнү падышага,+ Кудайга тиешелүүнү Кудайга бергиле»,— деди.+ Алар анын айтканына аябай таң калышты.
18 Андан кийин өлгөндөрдүн тирилерине ишенбеген садукейлер келип,+ Исадан:+
19 «Устат, Муса эгер кимдир бирөө бала көрбөй өтүп кетсе, аялын бир тууганы алып, анын тукумун улашы керектигин жазган болчу.+
20 Жети бир тууган бар эле. Биринчиси аял алып, тукумсуз өтүп кетти.
21 Анын аялын экинчиси алды, бирок ал да, андан кийин үчүнчүсү да тукумсуз өттү.
22 Ошентип, жетөө тең артында тукум калтырган жок. Акырында аял да көз жумду.
23 Өлгөндөр тирилгенде, ал кимисинин аялы болот? Анткени аны жетөө тең алышкан болчу»,— деп сурашты.
24 Иса аларга: «Силер Ыйык Жазманы да, Кудайдын кудурети канчалык күчтүү экенин да билбей адашып жүргөн жоксуңарбы?+
25 Анткени өлгөндөр тирилгенде аял алышпайт, күйөөгө чыгышпайт. Алар асмандагы периштелердей болушат.+
26 Ал эми өлгөндөрдүн тирилерине байланыштуу Мусанын китебиндеги тикенектүү бадал жөнүндө жазылгандардан окуган эмес белеңер? Ал жерде Кудай Мусага: „Мен Ыбрайымдын Кудайымын, Ыскактын Кудайымын, Жакыптын Кудайымын“,— деген эмес беле?+
27 Ал — өлгөндөрдүн эмес, тирүүлөрдүн Кудайы. Силер катуу жаңылып жатасыңар»,— деди.+
28 Диний мыйзамдарды окуткан бир киши ал жерге келип, ошол талаш-тартышты, Исанын тигилерге жакшы жооп бергенин укканда андан: «Осуяттардын эң биринчиси* кайсы?» — деп сурады.+
29 Иса: «Биринчиси бул: „Ук, ысрайыл эли, Кудайыбыз Жахаба — жалгыз Жахаба.
30 Жахаба Кудайыңарды бүт жүрөгүңөр менен, бүт жаныңар менен, бүт акылыңар менен, бүт күчүңөр менен сүйгүлө“.+
31 Экинчиси бул: „Башканы өзүңөрдү сүйгөндөй сүйгүлө“.+ Булардан маанилүү башка осуят жок»,— деп жооп берди.
32 Ошондо ал Исага: «Устат, сен туура айттың. „Ал жалгыз, андан башка Кудай жок“.+
33 Аны бүт жүрөгүң, бүт түшүнүгүң, бүт күчүң менен сүйүү, башканы өзүңдү сүйгөндөй сүйүү бүтүндөй өрттөлчү курмандыктар* менен башка курмандыктардын баарынан маанилүү»,— деп айтты.+
34 Иса анын жакшы жооп бергенин көрүп: «Сен Кудайдын Падышалыгынан алыс эмес экенсиң»,— деди. Ошондон кийин ага суроо бергенге эч ким даай алган жок.+
35 Иса ибадатканада элди окутуп жатып: «Эмне үчүн диний мыйзамдарды окуткандар Машаякты Дөөтүнүн тукуму дешет?+
36 Кудайдын ыйык рухунун таасири менен+ Дөөтү өзү: „Жахаба менин Мырзама: “Душмандарыңды бут алдыңа жыгып бергенимче, оң жагымда отур”,— деди“,— дебеди беле.+
37 Дөөтү өзү Машаякты „Мырзам“ деп жатса, анда ал кантип Дөөтүнүн тукуму болсун?» — деди.+
Көп эл аны берилип укту.
38 Ал аларды андан ары окутуп: «Диний мыйзамдарды окуткандардан сак болгула. Алар узун кийим кийип жүргөндү, базар аянттарында башкалардын урмат көрсөтүп саламдашканын,+
39 сыйынуу жайларында алдыңкы* орундарда отурганды, тойлордо төрдөн орун алганды жакшы көрүшөт.+
40 Жесирлердин мал-мүлкүн талап-тоношот, элге көрүнүш үчүн Кудайдан узакка тиленишет. Ошон үчүн аларга алда канча катуу өкүм чыгарылат»,— деди.
41 Анан ал казына идиштери*+ көрүнгүдөй жерден орун алып, элдин аларга акча салганын байкап отурду. Көп байлар көптөн акча салып жатышты.+
42 Ошондо бир жарды жесир аял келип, наркы өтө төмөн эки кичинекей тыйын* салды.+
43 Иса шакирттерин жанына чакырып: «Силерге айтып коёюн, бул жарды жесир аял казына идиштерине акча салгандардын баарынан көп салды.+
44 Анткени бардыгы өздөрүнөн артканды салышты, ал эми бул аял өзү муктаж болуп турса да, колунда болгондун баарын, эмнеси болсо, ошонун баарын салды»,— деди.+
Шилтемелер
^ Же: «императорго»; грекче кесар (Цезарь).
^ Сөзмө-сөз: «динар». Римдиктердин күмүш тыйыны. Б14 тиркемесин кара.
^ Же: «эң маанилүүсү».
^ Же: «эң жакшы».
^ Б. а. тартуу салынган кутулар. Сыягы, алар ар кандай формада болгон. Айрымдары сурнай сыяктуу келип, үстүндө кичинекей тешиги болгон.
^ Сөзмө-сөз: «эки лепта». Эки лепта — болжол менен 10 мүнөттүк жумуш үчүн төлөнгөн акы. Б14 тиркемесин кара.
