Марк 15:1—47
15 Таң атары менен, Жогорку соттун бүт мүчөлөрү: жогорку дин кызматчылар, аксакалдар, диний мыйзамдарды окуткандар кеңешме өткөрүштү. Анан Исаны байлап, алып кетишти да, башкаруучу Пилатка өткөрүп беришти.+
2 Пилат андан: «Сен жүйүттөрдүн Падышасысыңбы?» — деп сурады.+ Иса: «Муну өзүң билесиң да*»,— деп жооп берди.+
3 Жогорку дин кызматчылар болсо ага көп айып тагышты.
4 Пилат Исага кайрадан кайрылып: «Эмне, айтар сөзүң жокпу?+ Сага канча айып коюп жатышканын уккан жоксуңбу?!» — деди.+
5 Бирок ал башка эч нерсе деп жооп берген жок. Пилат буга аябай таң калды.+
6 Куткарылуу майрамы болгон сайын, Пилат түрмөдө отургандардын ичинен эл сураган бирөөнү бошотуп берчү.+
7 Ошол убакта түрмөдө Бараба деген киши жана козголоң учурунда аны менен чогуу киши өлтүргөн бир нече адам отурган.
8 Эл келип, Пилаттан адаттагысындай түрмөдөгүлөрдүн бирин бошотуп беришин сурана баштады.
9 Пилат алардан: «Жүйүттөрдүн Падышасын бошотуп беришимди каалайсыңарбы?» — деп сурады.+
10 Анткени жогорку дин кызматчылардын аны көрө албастыктан улам кармап келишкенин билчү.+
11 Жогорку дин кызматчылар болсо элди Исанын ордуна Барабаны сураганга үгүттөп коюшкан эле.+
12 Пилат кайрадан: «Анда силер жүйүттөрдүн Падышасы деп атаган кишини эмне кылайын?» — деп сурады.+
13 Алар: «Устунга* када!» — деп дагы кыйкырышты.+
14 Пилат болсо: «Эмнеге? Ал эмне жамандык кылды?» — деди. Бирок тигилер: «Устунга када!» — деп ого бетер катуу кыйкырып киришти.+
15 Ошондо Пилат аларга жагыныш үчүн Барабаны бошотуп берди. Исаны болсо сабаткандан кийин+ устунга кадап өлтүрүш үчүн жоокерлерге тапшырды.+
16 Жоокерлер аны башкаруучунун ак сарайындагы короого алып барып, ал жерге аскер бөлүгүнүн баарын чогултушту.+
17 Алар Исанын үстүнө кызгылт көк кийим, башына болсо тикенектен таажы өрүп кийгизишти.
18 Анан: «Амансызбы, жүйүттөрдүн Падышасы!» — деп кыйкыра башташты.+
19 Ошондой эле камыш таяк менен башка уруп, ага түкүрүп, алдына чөгөлөп, таазим кылып жатышты.
20 Мазактап бүтүшкөндөн кийин үстүндөгү кызгылт көк кийимди чечип, өзүнүн сырт кийимин кийгизишти да, устунга кадаш үчүн алып кетишти.+
21 Жолдон айыл жактан келаткан киреналык бир кишиге, Искендер менен Руфустун атасы Симонго, Исанын жаза устунун көтөртүп коюшту.+
22 Ошентип, Исаны Голгота деген жерге алып барышты. Бул сөз «баш сөөк» дегенди билдирет.+
23 Ал жерден ага мирра* кошулган шарап беришти,+ бирок ал ичпей койду.
24 Андан кийин аны устунга кадашты да, кимисине кайсы бөлүгү тиерин чечиш үчүн өкчөмө таш ыргытып, сырт кийимин бөлүп алышты.+
25 Аны эртең мененки тогуздарда* устунга кадашты.
26 Анан кандай айып тагылганын көрсөтүш үчүн баш жагына «Жүйүттөрдүн Падышасы» деген жазууну илип коюшту.+
27 Иса менен кошо эки каракчыны да устунга кадашты: бирин оң жагына, экинчисин сол жагына кадашты.+
28 *——
29 Ары-бери өткөндөр аны кордоп, баштарын чайкай:+ «Эй, ибадаткананы талкалап, кайра үч күндө тургузуп койчу киши,+
30 жаза устунунан түшүп, өзүңдү куткарбайсыңбы!» — деп жатышты.
31 Жогорку дин кызматчылар менен диний мыйзамдарды окуткандар да аны шылдыңдап, бири-бирине: «Башкаларды куткарып, өзүн куткара албай калдыбы?!+
32 Кана, Ысрайылдын Падышасы Машаяк азыр жаза устунунан түшсүнчү. Түшкөнүн көрүп, ага ишенип калалы»,— деп жатышты.+ Аны атүгүл жанында кадалып турган каракчылар да мазактап жатышты.+
33 Түшкү он экилерде* бүт аймакты караңгылык каптап, үчтөргө* чейин караңгы болуп турду.+
34 Саат үчтөрдө Иса: «Эли, Эли, лама сабактани?» — деп кыйкырды. Которгондо бул сөздөр: «Кудайым, Кудайым, мени эмнеге таштап койдуң?» — дегенди билдирет.+
35 Муну ошол жерде тургандардын айрымдары угуп: «Уксаңар, Илиясты чакырып жатат»,— дешти.
36 Ошондо бирөө чуркап барып, соргучту кычкыл шарапка малды да, таяктын учуна илди. Анан аны Исага ичириш үчүн берип жатып:+ «Жөн койсоңор, көрөлү да, Илияс келип, аны устундан түшүрөр бекен»,— деди.
37 Иса болсо катуу кыйкырды да, жан берди*.+
38 Ошондо ыйык жайдын* көшөгөсү+ үстүнөн астына чейин айрылып, экиге бөлүнүп калды.+
39 Исанын маңдайында турган жүз башы эмнелер болгонун, анын кантип өлгөнүн көргөндө: «Бул киши, чын эле, Кудайдын Уулу болгон экен»,— деди.+
40 Ал жерде ушунун баарын алыстан карап турган аялдар да бар эле. Алардын арасында магдалалык Мариям, кичүү* Жакып менен Жосенин энеси Мариям жана Саломе бар болчу.+
41 Иса Галилеяда жүргөндө, алар аны коштоп, ага кызмат кылып жүрүшчү.+ Алардан сырткары, Иса менен бирге Иерусалимге келген дагы башка көптөгөн аялдар бар эле.
42 Кеч кирип бараткан болчу. Дем алыш күнгө даярдык көрө турган күн эле.
43 Ошон үчүн Кеңештин* кадыр-барктуу мүчөсү, Кудайдын Падышалыгын күтүп жүргөндөрдүн бири ариматаялык Жусуп кайраттанып, Пилатка барды да, Исанын сөөгүн сурады.+
44 Пилат анын бат эле өлүп калганына таң калып, жүз башыны чакырып, Исанын чын эле өлгөн-өлбөгөнүн тактады.
45 Андан сурап билгенден кийин Жусупка сөөктү алып кеткенге уруксат берди.
46 Жусуп сапаттуу зыгыр кездеме сатып алып, Исанын сөөгүн устундан түшүрдү да, кепиндеп, асканын боорундагы оюлуп жасалган мүрзөгө койду.+ Анан таш тоголотуп келип, мүрзөнүн оозун жапты.+
47 Магдалалык Мариям менен Жосенин энеси Мариям болсо анын кайсы жерге коюлганын карап турушту.+
Шилтемелер
^ Бул ырастоону билдирген сөз айкашы.
^ Мас кылуучу зат.
^ Сөзмө-сөз: «үчүнчү саатта». Күн чыккандан тартып эсептегенде.
^ Бул аят Ыйык Китептин айрым котормолорунда бар болсо да, грек тилиндеги байыркы негизги кол жазмаларда кездешпейт. А3 тиркемесин кара.
^ Сөзмө-сөз: «Алтынчы саатта».
^ Сөзмө-сөз: «тогузунчу саатка».
^ Же: «акыркы демин чыгарды».
^ Же: «кичине».
