Марк 16:1—8
-
Исанын тирилиши (1—8)
16 Дем алыш күн+ өткөндөн кийин, магдалалык Мариям, Жакыптын энеси Мариям+ жана Саломе Исанын денесине сыйпаш үчүн жыпар жыттуу заттарды сатып алышты.+
2 Анан жуманын биринчи күнү* эртең менен эрте, күн чыкканда, мүрзөгө келишти.+
3 Алар: «Мүрзөнүн оозундагы ташты ким жылдырып берет?» — деп өз ара сүйлөшүп келатышкан эле.
4 Бирок келип карашса, таш ордунан жылдырылып, мүрзөнүн оозу ачык экен. Таш болсо аябай чоң эле.+
5 Мүрзөнүн ичине киргенде, оң тарапта узун ак кийим кийген жигиттин отурганын көрүп, аң-таң болуп туруп калышты.
6 Ал болсо аялдарга: «Таң калбагыла.+ Силердин устунга кадалган назареттик Исаны издеп жүргөнүңөрдү билем. Ал тирилди,+ бул жерде жок. Мына анын жаткан жери.+
7 Баргыла да, анын шакирттери менен Петирге: „Ал Галилеяга силерден мурун барат,+ өзү айткандай, аны ошол жерден көрөсүңөр“,— деп айткыла»,— деди.+
8 Аялдар мүрзөдөн чыгып, коркконунан калтырап, бир чети, аябай толкунданып, чуркап жөнөштү. Алар коркконунан эч кимге эч нерсе айтышкан жок*.+
Шилтемелер
^ Бул күн азыркы боюнча жекшемби күн. Жүйүттөр үчүн жуманын биринчи күнү болгон.
^ Ыйык Китептин алгачкы беделдүү кол жазмаларына ылайык, Марк жазган Инжил 8-аяттагы ушул сөздөр менен аяктайт. А3 тиркемесин кара.
