Марк 4:1—41
-
ПАДЫШАЛЫККА БАЙЛАНЫШТУУ МИСАЛДАР (1—34)
-
Дыйкан (1—9)
-
Исанын мисал менен сүйлөгөнүнүн себеби (10—12)
-
Дыйкан жөнүндөгү мисалдын мааниси (13—20)
-
Чыракты көмкөрүлгөн идиштин астына коюшпайт (21—23)
-
Өзүңөр өлчөгөн өлчөм менен өлчөп беришет (24, 25)
-
Үрөн өзү өнүп-өсө берет (26—29)
-
Сары кычы даны (30—32)
-
Иса көп мисалдарды колдонуп сүйлөчү (33, 34)
-
-
Иса шамалды токтотот (35—41)
4 Иса кайрадан деңиздин боюнда элди окута баштады. Жанына абдан көп эл чогулгандыктан, ал кайыкка түшүп, бир аз ары сүзүп барды. Эл болсо жээкте турду.+
2 Иса мисалдарды келтирип, аларга көп нерселерди айтып берди.+ Аларды окутуп жатып:+
3 «Кулак салгыла. Дыйкан үрөн сепкени чыгат.+
4 Ал сээп жатканда, үрөндүн айрымдары жол боюна түшүп калат. Чымчыктар учуп келип, аларды жеп кетет.
5 Кээ бирлери топурагы аз, таштак жерге түшөт. Ал жердин кыртышы жука болгондуктан, алар тез эле өнүп чыгат.+
6 Бирок терең тамыр албагандыктан, күн чыгып, ысыганда, куурап калат.
7 Башкалары тикенектин арасына түшөт. Анан тикенектер өсүп кетип, тигилер өспөй калат да, түшүм бербей калат.+
8 Калган үрөндөр болсо жакшы жерге түшүп, өсүп чыгат да, түшүм бере баштайт. Бири 30 эсе, бири 60 эсе, дагы бири 100 эсе көп түшүм берет»,— деди.+
9 Анан: «Кулагы бар адам уксун»,— деп кошумчалады.+
10 Иса жалгыз калганда, 12 элчиси менен башка шакирттери андан айткан мисалдарынын мааниси жөнүндө сурай башташты.+
11 Ал: «Силерге Кудайдын Падышалыгынын ыйык сыры* ачылып берилди,+ башкалар үчүн болсо уккандарынын баары мисал бойдон калат.+
12 Алар карап турса да, көрбөшү үчүн, угуп турса да, айтылгандардын маңызын түшүнбөшү үчүн, Кудайга эч качан кайрылып келбеши үчүн, күнөөлөрү кечирилбеши үчүн ушундай болуп жатат»,— деп жооп берди.+
13 Анан мындай деди: «Бул мисалды түшүнбөй жатсаңар, анда калгандарын кантип түшүнөсүңөр?
14 Дыйкан Кудайдын сөзүн себет.+
15 Кээ бир адамдар жол боюна түшкөн үрөнгө окшош: алар Кудайдын сөзүн угары менен, Шайтан келип,+ жүрөктөрүнө себилген сөздү алып кетет.+
16 Ал эми кээ бирөөлөр таштак жерге түшкөн үрөнгө окшош: андай адамдар Кудайдын сөзүн угар замат аны кубанып кабыл алышат.+
17 Терең тамыр албаса да, алар кайсы бир убакытка чейин өсө беришет. Бирок Кудайдын сөзү үчүн кыйынчылыкка же куугунтукка дуушар болору менен ага ишенбей калышат.
18 Дагы башкалары тикенектин арасына түшкөн үрөнгө окшош: алар Кудайдын сөзүн угушат,+
19 бирок бул дүйнөнүн түйшүгүнө малынып,+ жүрөктөрүн алдама байлык*+ менен башка каалоолор ээлеп алып,+ Кудайдын сөзүн басып салат да, сөз түшүм бербей калат.
20 Айрымдар болсо жакшы жерге түшкөн үрөнгө окшош: алар Кудайдын сөзүн угуп, чын дилден кабыл алышат да, 30, 60, 100 эсе көп түшүм беришет».+
21 Иса сөзүн улап: «Чыракты көмкөрүлгөн идиштин* же керебеттин астына коюшабы? Аны чыракпаяга коюшат эмеспи.+
22 Ачылбай кала турган жашыруун эч нерсе жок; бек катылган нерсе да убагы келгенде ачыкка чыгат.+
23 Кулагы бар адам уксун»,— деди.+
24 Андан ары: «Угуп жаткан нерселериңерге көңүл бургула.+ Башкаларга кандай өлчөм менен өлчөп берсеңер, алар да силерге ошондой өлчөм менен өлчөп беришет, атүгүл үстүнө кошуп беришет.
25 Анткени кимде бар болсо, ага дагы берилет,+ ал эми кимде жок болсо, андан өзүндө болгон нерсеси да тартылып алынат»,— деди.+
26 Иса сөзүн улап: «Кудайдын Падышалыгын буга салыштырса болот: бир киши жерге үрөн себет.
27 Ал түнкүсүн уктайт, күндүзү турат, үрөн болсо өнүп-өсө берет. Сепкен киши анын кантип өсүп жатканын билбейт.
28 Жер өзү акырындык менен түшүм берет: адегенде үрөн өнүп, сабактары пайда болот, анан баш алып, данга толот.
29 Эгин бышып, оруп-жыя турган маал келери менен, жер ээси орок салат»,— деди.
30 Анан: «Кудайдын Падышалыгын эмнеге салыштырсак болот же кандай мисал менен түшүндүрсөк болот?
31 Ал сары кычы данына* окшош. Себилгенде ал жер бетиндеги уруктардын ичинен эң кичинекейи болсо да,+
32 өсүп чыкканда бакча өсүмдүктөрүнүн баарынан чоң болуп, бутактарын кенен жаят. Анын көлөкөсүнө чымчыктар корголойт»,— деди.
33 Иса Кудайдын сөзүн ушу сыяктуу көп мисалдар менен түшүндүрүп,+ эл канча түшүнө алса, ошончо сүйлөдү.
34 Ал мисалсыз сүйлөчү эмес, шакирттерине болсо бардыгын өзүнчө түшүндүрүп берчү.+
35 Ошол күнү кечинде ал шакирттерине: «Аркы өйүзгө өтөлү»,— деди.+
36 Элди тараткандан кийин алар Иса менен кайыкка отуруп, сүзүп кетишти. Жанында башка кайыктар да бар эле.+
37 Бир убакта аябай катуу шамал көтөрүлүп, кайыкты толкун ургандыктан, ичи сууга толоюн деп калды.+
38 Иса кайыктын арт жагында жаздык жазданып уктап жаткан эле. Шакирттери аны ойготуп: «Устат, чөгүп кетсек деле, сага баары бирби?» — дешти.
39 Ал ордунан туруп, шамалды тыйды да, деңизге: «Басыл! Тынчы!» — деди.+ Ошондо шамал токтоп, айлана тыптынч болуп калды.
40 Анан ал шакирттеринен: «Эмнеге мынча корктуңар? Дагы деле ишене элексиңерби?» — деп сурады.
41 Алар болсо аябай коркуп, бири-бирине: «Шамал менен деңизди да баш ийдирген бул ким өзү?» — деп жатышты.+
Шилтемелер
^ Сөзмө-сөз: «байлыктын арбап ала турган күчү».
^ Же: «өлчөгүч себеттин».
^ Байыркы Палестинадагы үрөндөрдүн эң кичинекейи. Өсүп чыкканда бутактанып, 4 метрге жетет.
