Матай 13:1—58
-
ПАДЫШАЛЫККА ТИЕШЕЛҮҮ МИСАЛДАР (1—52)
-
Дыйкан (1—9)
-
Исанын мисал менен сүйлөгөнүнүн себеби (10—17)
-
Дыйкан жөнүндөгү мисалдын мааниси (18—23)
-
Буудай жана отоо чөп (24—30)
-
Сары кычы даны жана ачыткы (31—33)
-
Иса мисал менен сүйлөп, алдын ала айтылгандарды аткарган (34, 35)
-
Буудай жана отоо чөп жөнүндөгү мисалдын мааниси (36—43)
-
Жашырылган кенч жана кымбат баалуу бермет (44—46)
-
Тор (47—50)
-
Казынадагы жаңы жана эски нерселер (51, 52)
-
-
Иса өз жеринде урматталбайт (53—58)
13 Ошол күнү Иса үйдөн чыгып, деңиздин жээгине барып отурду.
2 Жанына калың эл чогулгандыктан, ал кайыкка түштү. Эл болсо жээкте турду.+
3 Иса аларга мындай мисалдарды келтирип,+ көп нерселерди айтып берди: «Дыйкан үрөн сепкени чыгат.+
4 Ал сээп жатканда, үрөндүн айрымдары жол боюна түшүп калат. Чымчыктар учуп келип, аларды жеп кетет.+
5 Кээ бирлери топурагы аз, таштак жерге түшөт. Ал жердин кыртышы жука болгондуктан, алар тез эле өнүп чыгат.+
6 Бирок терең тамыр албагандыктан, күн чыгып, ысыганда, куурап калат.
7 Башкалары тикенектин арасына түшөт. Анан тикенектер өсүп кетип, тигилер өспөй калат.+
8 Калган үрөндөр болсо жакшы жерге түшүп, бири 100 эсе, бири 60 эсе, дагы бири 30 эсе көп түшүм бере баштайт.+
9 Кулагы бар адам уксун».+
10 Ошондо шакирттери келип, Исадан: «Эмнеге аларга мисал менен сүйлөп жатасың?» — деп сурашты.+
11 Ал мындай деп жооп берди: «Силерге асман Падышалыгынын ыйык сырлары* ачылып берилди,+ аларга болсо ачылып берилген жок.
12 Себеби кимде бар болсо, ага дагы берилет, аныкы мол болот. Ал эми кимде жок болсо, андан өзүндө болгон нерсеси да тартылып алынат.+
13 Мына ошон үчүн аларга мисал менен сүйлөп жатам. Анткени алар карап турса да, көрүшпөйт, угуп турса да, угушпайт, айтылгандардын маңызын түшүнүшпөйт.+
14 Аларга байланыштуу Ышая пайгамбардын айткандары аткарылып жатат. Ал: „Силер угасыңар, бирок түшүнбөйсүңөр, карайсыңар, бирок көрбөйсүңөр.+
15 Анткени бул элдин жүрөгү таштай катуу болуп калган. Алар угушат, бирок жооп беришпейт. Көздөрүн жумуп алышкан, ошондуктан көздөрү көрбөйт, кулактары укпайт, айтылгандардын мааниси жүрөктөрүнө жетпейт. Алар мага кайрылып келишпейт, мен да аларды айыктырбайм“,— деген.+
16 Ал эми силер бактылуусуңар, себеби көзүңөр көрүп, кулагыңар угуп жатат.+
17 Силерге айтып коёюн, көптөгөн пайгамбарлар менен адил адамдар силер көрүп жатканды көргүсү келген, бирок көрүшкөн эмес;+ силер угуп жатканды уккусу келген, бирок угушкан эмес.
18 Эмесе, дыйкан жөнүндөгү мисалдын маанисин уккула.+
19 Ким Кудайдын Падышалыгы жөнүндөгү кабарды угуп, бирок маанисин түшүнбөсө, Шайтан*+ келип, жүрөгүнө себилгенди уурдап кетет. Бул үрөндүн жол боюна түшкөнүнө окшош.+
20 Ал эми үрөндүн таштак жерге түшкөнү Кудайдын Падышалыгы жөнүндөгү кабарды угар замат аны кубанып кабыл алган адамдын жагдайына окшош.+
21 Ал терең тамыр албагандыктан көпкө турбайт: ошол кабар үчүн кыйынчылыкка же куугунтукка дуушар болору менен ага ишенбей калат.
22 Үрөндүн тикенектин арасына түшкөнү кабарды укканы менен, бул дүйнөнүн түйшүгүнө малынып,+ алдама байлыкка* берилип кеткен адамдын жагдайына окшош. Ошол нерселер үрөндү басып салгандыктан, ал түшүм бербей калат.+
23 Үрөндүн жакшы жерге түшкөнү болсо кабарды угуп, маңызын түшүнгөн адамдын жагдайын билдирет. Андай адамдардын бири 100 эсе, бири 60 эсе, дагы бири 30 эсе көп түшүм берет».+
24 Иса дагы мындай мисал айтты: «Асман Падышалыгы талаасына жакшы үрөн сепкен кишиге окшош.
25 Баары уктап жатканда, душманы келип, буудайдын арасына отоо чөптүн уругун сээп кетет.
26 Буудай өнүп чыгып, баш алып калганда, отоо чөптөр да өсүп чыгат.
27 Ошондо ал кишинин кулдары келип, андан: „Кожоюн, талааңа жакшы үрөн септиң эле го. Анда бул отоо чөптөр кайдан пайда болду?“ — деп сурашат.
28 Ал: „Муну душман кылды“,+— деп жооп берет. Кулдары ага: „Барып, отоо чөптүн баарын жулуп салалыбы?“ — дешет.
29 Ал: „Жөн койгула. Отоо чөптү жулам деп, буудайды кошо жулуп албагыла.
30 Орок маалына чейин экөө тең өсө берсин. Орок маалы келгенде, орокчуларга: “Адегенде отоо чөптөрдү жулгула да, боо-боо кылып байлап, өрттөп салгыла. Андан кийин барып, буудайды кампама жыйнагыла”,+— деп айтам“,— дейт».
31 Иса дагы мындай мисал айтты: «Асман Падышалыгы талаага себилген сары кычы данына* окшош.+
32 Ал уруктардын ичинен эң кичинекейи болгону менен, өсүп чыкканда бакча өсүмдүктөрүнүн баарынан чоң болуп, даракка айланат. Чымчыктар учуп келип, анын бутактарына корголойт».
33 Ал: «Асман Падышалыгы аялдар үч чоң табак унга кошуп, бүт камырды ачыткан ачыткыга окшош»,— деп да мисал келтирди.+
34 Булардын баарын Иса элге мисал менен айтты. Ал мисалсыз сүйлөчү эмес.+
35 Бул бир пайгамбар аркылуу: «Мен мисал менен сүйлөйм. Тээ башынан бери* жашыруун болуп келген нерселерди жарыялайм»,— деп айтылган сөздөр аткарылышы үчүн болду.+
36 Элди таратып жибергенден кийин Иса үйгө кирди. Ошондо шакирттери жанына келип: «Бизге талаадагы отоо чөптөр жөнүндөгү мисалды түшүндүрүп берчи»,— дешти.
37 Ал мындай деди: «Жакшы үрөн сепкен киши — бул адам Уулу.
38 Талаа — дүйнө.+ Жакшы үрөндөр — Падышалыктын уулдары*, ал эми отоо чөптөр — Ибилистин* уулдары.+
39 Отоо чөптөрдү сепкен душман — Ибилис. Орок маалы — бул замандын акыркы күндөрү, орокчулар болсо периштелер.
40 Отоо чөптөрдү жулуп, өрттөп жиберишкендей эле, бул замандын акыркы күндөрүндө да ушундай болот.+
41 Адам Уулу периштелерин жиберет. Алар анын Падышалыгынан мыйзамсыз иш кылгандар менен күнөөгө түрткөндөрдүн баарын чогултуп,
42 күйүп турган мешке ыргытышат.+ Ал жакта алар ыйлап, тишин кычыратышат*.
43 Ошол убакта адил адамдар асмандагы Атасынын Падышалыгында күн сыяктуу жаркырашат.+ Кулагы бар адам уксун.
44 Асман Падышалыгы талаада жашырылган кенчке окшош. Бир киши аны таап алып, кайра катып коёт. Анан кубанган бойдон барып, колунда болгондун баарын сатат да, ошол талааны сатып алат.+
45 Асман Падышалыгы жер кезген соодагер издеген кымбат баалуу берметке да окшош.
46 Ошондой кымбат баалуу берметти тапкан соң соодагер барып, бардык нерсесин сатат да, аны сатып алат.+
47 Асман Падышалыгы деңизге салынган жана ар кандай балык түшкөн торго да окшош.
48 Тор балыкка толгондо, аны жээкке тартып чыгарышат да, отуруп алып, жакшыларын+ идиштерге салышат, жараксыздарын+ болсо ыргытып жиберишет.
49 Бул замандын акыркы күндөрүндө да ушундай болот: периштелер келип, жаман адамдарды адил адамдардан бөлүшөт да,
50 күйүп турган мешке ыргытышат. Ал жакта алар ыйлап, тишин кычыратышат».
51 Анан Иса шакирттеринен: «Бул айтылгандардын маанисин түшүндүңөрбү?» — деп сурады. Алар: «Ооба»,— деп жооп беришти.
52 Иса аларга: «Анда асман Падышалыгы жөнүндө билим алган ар бир окутуучу казынасынан жаңыны да, эскини да алып чыккан үй ээсине окшош экенин билип койгула»,— деди.
53 Ушул мисалдарды айтып бүткөндөн кийин Иса ал жерден кетти.
54 Өз жерине келип,+ сыйынуу жайында элди окута баштады. Алар таң калып: «Мындай акылмандыкты бул кайдан алган? Мындай кереметтерди кантип жасап жатат?+
55 Бул жыгач устанын эле уулу эмеспи?+ Энесинин аты Мариям да. Жакып, Жусуп, Симон, Жүйүттөр инилери эмеспи?+
56 Карындаштары деле арабызда жүрбөйбү. Анда мындай акыл менен жөндөмдү бул каяктан алган?» — деп жатышты.+
57 Ошентип, алар Исага ишенгиси келген жок.+ Ал болсо: «Пайгамбар бардык жерде урматталат. Аны өз жеринде, өз үйүндө гана урматташпайт»,— деп айтты.+
58 Алар ишенбегендиктен, Иса ал жерде кереметтерди көп жасаган жок.
Шилтемелер
^ Сөзмө-сөз: «кара өзгөй».
^ Сөзмө-сөз: «байлыктын арбап ала турган күчүнө».
^ Байыркы Палестинадагы уруктун эң кичинекейи. Өсүп чыкканда бутактанып, 4 метрге жетет.
^ Же балким: «Адамзат дүйнөсү жаралгандан бери». Бул Адам ата менен Обо эненин балдары төрөлө баштаган убакты билдирет.
^ Же: «Кудайдын Падышалыгына кире тургандар».
^ Сөзмө-сөз: «кара өзгөйдүн».
^ Бул ачууланууну, үмүтсүздүктү билдирет.
