Матай 16:1—28
16 Магадандан фарисейлер менен садукейлер Исанын жанына келип, аны сынаш үчүн асмандан жышаан көрсөтүшүн суранышты.+
2 Иса: «Кеч киргенде, силер: „Асман кызарып турат, демек, эртең күн ачык болот“,— дейсиңер.
3 Эртең менен болсо: „Бүгүн күн суук болуп, жаан жаайт экен, себеби асман кызарганы менен, түнөрүп турат“,— деп айтасыңар. Асманды карап, аба ырайын биле аласыңар да, азыр болуп жаткан нерселердин маанисин* түшүнө албайсыңарбы?
4 Кудайдан баш тартып кеткен* бул ыймансыз муун дайыма эле жышаан* көрсөт деп талап кыла берет, бирок ага Жунустукунан+ башка жышаан көрсөтүлбөйт»,+— деди. Анан алардын жанынан кетти.
5 Шакирттери кайык менен аркы өйүзгө өтүштү. Алар нан алганды унутуп калышкан эле.+
6 Иса аларга: «Байкагыла! Фарисейлер менен садукейлердин ачыткысынан сак болгула»,— деди.+
7 Ошондо алар: «Нан албай калганыбыз үчүн ушинтип айтты окшойт»,— деп өз ара сүйлөшө башташты.
8 Муну билип, Иса: «Ишеними алсыздар, эмнеге нан албай калганыңар жөнүндө сүйлөшүп жатасыңар?
9 Дагы деле түшүнө элексиңерби? 5 000 кишини беш нан менен тойгузганымды, артканын чогултканда канча чоң себет болгонун унутуп койдуңарбы?+
10 Же 4 000 кишини жети нан менен тойгузганым, артканын чогултканда канча чоң себет болгону эсиңерден чыгып кеттиби?+
11 Силерге нан жөнүндө айткан жокмун, ошону түшүнгөн жоксуңарбы? Фарисейлер менен садукейлердин ачыткысынан сак болгула»,— деди.+
12 Ошондо шакирттери анын камырга кошчу ачыткыдан эмес, фарисейлер менен садукейлердин окуусунан сактаныш керектиги жөнүндө айтканын түшүнүштү.
13 Иса Филип Кесариясынын аймагына келгенде шакирттеринен: «Эл адам Уулун ким деп эсептейт?» — деп сурады.+
14 Алар: «Айрымдар Чөмүлдүрүүчү Жакан,+ башкалары Илияс,+ дагы бирөөлөрү Жеремия же пайгамбарлардын бири деп айтып жүрүшөт»,— дешти.
15 Иса: «Силерчи? Силер мени ким деп эсептейсиңер?» — деп сурады.
16 Симон Петир: «Сен Машаяксың,+ тирүү Кудайдын Уулусуң»,+— деп жооп берди.
17 Ошондо Иса ага: «Жунустун уулу Симон, сен бактылуусуң, анткени муну адам баласынын эмес, асмандагы Атамдын жардамы менен түшүндүң.+
18 Дагы айтарым, сен Петирсиң*,+ ушул аска таштын+ үстүнө жыйналышымды курам, ага өлүмдүн күчү жетпейт*.
19 Сага асман Падышалыгынын ачкычтарын берем. Кудай асманда эмнени туура деп тапса, сен да жерде ошону туура деп табасың, эмнени туура эмес деп тапса, сен да ошону туура эмес деп табасың*»,— деди.
20 Анан шакирттерине анын Машаяк экенин эч кимге айтпашы керектигин катуу эскертти.+
21 Ошол убактан тартып Иса шакирттерине өзүнүн Иерусалимге барышы керектигин, аксакалдардан, жогорку дин кызматчылар менен диний мыйзамдарды окуткандардан көп кордук көрөрүн жана өлтүрүлүп, үчүнчү күнү тирилерин түшүндүрө баштады.+
22 Ошондо Петир аны четке алып чыгып: «Мырзам, антип айтпачы!* Мындай нерсе эч качан башыңа түшпөсүн»,— деп каршы боло баштады.+
23 Иса андан тескери бурулуп: «Кет жанымдан*, Шайтан! Сен мага тоскоол болуп жатасың, анткени Кудайга эмес, адамдарга жаккандай ой жүгүртүп жатасың*»,— деди.+
24 Анан Иса шакирттерине: «Ким менин жолдоочум болгусу келсе, өзүнөн баш тартып, жаза устунун* көтөрүп, дайыма менин жолумду жолдосун.+
25 Анткени ким жанын сактап калгысы келсе, андан айрылат, ал эми ким мен үчүн жанынан айрылса, аны сактап калат*.+
26 Адам бүт дүйнөгө ээ болуп, бирок жанынан айрылса, анда ага эмне пайда?+ Адам өз жаны үчүн эмне бере алат?+
27 Себеби адам Уулу периштелеринин коштоосунда Атасынын даңкы менен келет. Ошондо ар бир адамга жүрүм-турумуна жараша тиешесин* берет.+
28 Ишенип койгула, бул жерде тургандардын айрымдары адам Уулунун падыша катары келатканын көрмөйүнчө өлүшпөйт»,— деп айтты.+
Шилтемелер
^ Же: «убакытка байланышкан жышаандарды».
^ Сөзмө-сөз: «Ойноштук кылган».
^ Же: «далил катары керемет».
^ Грек тилинен которулганда бул ысым «аска таш» дегенди билдирет.
^ Сөзмө-сөз: «Жерде эмнени байласаң, ал асманда ага чейин эле байланган болот; жерде эмнени чечсең, ал асманда ага чейин эле чечилген болот».
^ Сөзмө-сөз: «өзүңдү ая!»
^ Же: «сенин оюң Кудайдыкындай эмес, адамдыкындай».
^ Сөзмө-сөз: «Артыма тур».
^ Мындай устун кимдир бирөөнү жазага тартыш үчүн колдонулчу. Бирок бул жерде, сыягы, Исанын жолдоочулары кабыла турган кыйынчылыктарга, сыноолорго карата айтылган. Сөздүктү кара.
^ Же: «кайра жашайт».
^ Же: «сыйлыгын».
