Матай 22:1—46
22 Иса алар менен дагы сүйлөшүп, мындай мисалдарды келтирди:
2 «Асман Падышалыгы уулунун үйлөнүү тоюн+ өткөргөн падышага окшош.
3 Ал кулдарын тойго келе тургандарды чакырганы жөнөтөт, бирок тигилердин келгиси келбей коёт.+
4 Ошондо ал дагы башка кулдарын жиберип, чакырылгандарга: „Дасторконумду белендеп, букаларымды, бордолгон малымдын баарын союп, бүт баарын даярдап койдум. Тойго келгиле“,— деп айттырат.
5 Бирок тигилер муну баалабай, бири талаасына, экинчиси соода иштери менен кетип калат.+
6 Калгандары болсо кулдарды кармап алып, кордоп, өлтүрүп салышат.
7 Буга падышанын каары кайнап, аскерлерин жиберет. Алар ошол киши өлтүргүчтөрдү өлтүрүп, шаарын өрттөп салышат.+
8 Анан падыша кулдарына: „Тойго бардык даярдыктар көрүлдү, бирок чакырылгандар татыксыз болуп калышты.+
9 Ошон үчүн шаардын чоң көчөлөрүнө чыгып, жолуккандардын баарын тойго чакыргыла“,+— дейт.
10 Кулдар көчөлөргө чыгып, жолуккандардын баарын: жаманын да, жакшысын да чогултушат. Ошентип, той өткөрүлчү жер конокко* толот.
11 Падыша меймандарды көргөнү кирип, тойго ылайыксыз кийимчен келген бирөөнү байкайт.
12 Анан андан: „Эй, дос, бул жерге алдагыдай кийим менен кантип кирдиң?“ — деп сурайт. Ал унчукпайт.
13 Ошондо падыша кызматчыларына: „Мунун колу-бутун байлап, сыртка, караңгылыкка ыргытып жибергиле. Ал жакта ыйлап, тишин кычыратат*“,— дейт.
14 Демек, чакырылгандар көп, бирок тандалгандар аз».
15 Ошондо фарисейлер кетип, Исаны сөзүнөн кармаш үчүн өз ара кеңешишти.+
16 Анан ага өздөрүнүн шакирттери менен Ироддун таламдаштарын+ жөнөтүштү. Алар барып: «Устат, сенин дайыма чындыкты айтарыңды, Кудайдын жолу жөнүндө үйрөткөндөрүңдүн баары туура экенин билебиз. Эч кимге да жагынбайсың, анткени адамдын ээлеген абалына карабайсың.
17 Ошондуктан, оюңду айтчы, падышага* киши башына төлөнчү салыкты төлөгөн туурабы же туура эмеспи?» — дешти.
18 Иса алардын арам оюн билип: «Мени эмнеге сынап жатасыңар, эки жүздүүлөр?
19 Салыкка төлөнчү тыйынды көрсөткүлөчү»,— деди. Ошондо ага бир тыйынды* көрсөтүштү.
20 Иса: «Бул жерде кимдин сүрөтү тартылып, кимдин аты жазылып турат?» — деп сурады.
21 Алар: «Падышанын»,— дешти. Ошондо Иса: «Анда падышага тиешелүүнү падышага, Кудайга тиешелүүнү Кудайга бергиле»,— деди.+
22 Муну укканда алар таң калышты. Анан ал жерден кетип калышты.
23 Өлгөндөрдүн тирилерине ишенбеген садукейлер+ ошол күнү Исага келип:+
24 «Устат, Муса: „Эгерде кимдир бирөө бала көрбөй өтүп кетсе, аялын бир тууганы алып, анын тукумун уласын“,— деген болчу.+
25 Арабызда жети бир тууган бар эле. Биринчиси үйлөнүп, тукум калтырбай өтүп кетти. Анын аялын экинчиси алды.
26 Бирок ал да, андан кийин үчүнчүсү да, ошентип, жетөө тең бала көрбөй өтүп кетишти.
27 Акырында аял да көз жумду.
28 Өлгөндөр тирилгенде, ал жети бир туугандын кимисинин аялы болот? Анткени аны баары алышкан болчу»,— деп сурашты.
29 Иса аларга: «Силер Ыйык Жазманы да, Кудайдын кудурети канчалык күчтүү экенин да билбей адашып жүрөсүңөр.+
30 Анткени өлгөндөр тирилгенде аял алышпайт, күйөөгө чыгышпайт. Алар асмандагы периштелердей болушат.+
31 Ал эми өлгөндөрдүн тирилерине байланыштуу Кудайдын силерге эмне деп айтканын окуган эмес белеңер?
32 Кудай: „Мен Ыбрайымдын Кудайымын, Ыскактын Кудайымын, Жакыптын Кудайымын“,— деген.+ Ал — өлгөндөрдүн эмес, тирүүлөрдүн Кудайы»,— деп жооп берди.+
33 Муну уккан эл анын кантип окутканына таң калды.+
34 Исанын садукейлерди сөзгө жыкканын укканда фарисейлер чогулуп алып, ага келишти.
35 Анан алардын арасынан Мусанын Мыйзамын кыйын билген бирөө Исаны сынап:
36 «Устат, Мыйзамдагы осуяттардын эң маанилүүсү кайсы?» — деп сурады.+
37 Ал: «„Жахаба Кудайыңарды бүт жүрөгүңөр менен, бүт жаныңар менен, бүт акылыңар менен сүйгүлө“.+
38 Бул — биринчи жана эң маанилүү осуят.
39 Экинчиси ушуга эле окшош: „Башканы өзүңөрдү сүйгөндөй сүйгүлө“.+
40 Бүт Мыйзам да, пайгамбарлардын айткандары да ушул эки осуятка негизделет»,+— деди.
41 Фарисейлер чогуу турганда, Иса алардан:+
42 «Машаяк жөнүндө эмне деп ойлойсуңар? Ал кимдин тукуму?» — деп сурады. Алар: «Дөөтүнүн»,— дешти.+
43 Ошондо Иса: «Анда эмне үчүн Дөөтү ыйык рухтун таасири менен+ аны „Мырзам“ деген?
44 Ал: „Жахаба менин Мырзама: “Душмандарыңды бут алдыңа жыгып бергенимче, оң жагымда отур”,— деди“,+— дебеди беле.
45 Эгерде Дөөтү Машаякты „Мырзам“ деп жатса, анда ал кантип Дөөтүнүн тукуму болсун?» — деп сурады.+
46 Буга эч ким эч нерсе деп жооп бере алган жок. Ошол күндөн тартып ага суроо бергенге эч ким даабай калды.
Шилтемелер
^ Же: «дасторкон тегеректей жамбаштап жаткандарга».
^ Бул ачууланууну, үмүтсүздүктү билдирет.
^ Же: «императорго»; грекче кесар (Цезарь).
^ Сөзмө-сөз: «динар». Римдиктердин күмүш тыйыны.
