Матай 25:1—46
25 Асман Падышалыгын чырактарын көтөрүп,+ үйлөнө турган жигитти+ тосуп чыккан 10 кызга салыштырса болот.
2 Алардын бешөө акылсыз, бешөө акылдуу эле.+
3 Акылсыздары чырактарын алганы менен, май албай чыгышат.
4 Ал эми акылдуулары чырактары менен кошо идиштерине май куя чыгышат.
5 Үйлөнө турган жигит кармалып жаткандыктан, алардын баары үргүлөп, уктап калышат.
6 Түн ортосунда: „Жигит келатат! Тосуп чыккыла!“ — деген кыйкырык угулат.
7 Ошондо кыздардын баары туруп, чырактарын даярдашат.+
8 Акылсыздары акылдууларына: „Майыңардан бир аз бергилечи, чырактарыбыз өчкөнү жатат“,— дешет.
9 Акылдуулары болсо: „Бизге да, силерге да жетпей калып жүрбөсүн. Андан көрө, май саткандарга барып, сатып албайсыңарбы“,— деп жооп беришет.
10 Тигилер май сатып алганы кеткенде, жигит келип калат. Ошондо даяр турган кыздар аны менен бирге үйлөнүү тою+ өткөн үйгө киришет, анан эшик жабылат.
11 Андан кийин берки кыздар келип: „Мырзам, мырзам, эшикти ачып койчу!“ — дешет.+
12 Ал болсо: „Мен силерди тааныбайм“,— деп жооп берет.
13 Ошондуктан сергек болгула,+ себеби ал күндү да, саатын* да билбейсиңер.+
14 Асман Падышалыгын башка өлкөгө кетерде кулдарын чакырып, аларга өзүнүн акча-каражатын тапшырган кишиге салыштырса болот.+
15 Ал ар биринин жөндөмдүүлүгүнө жараша бирөөнө беш талант*, экинчисине эки талант*, үчүнчүсүнө бир талант* күмүш акча берип, жолго чыгат.
16 Беш талант алган кул дароо барып, аны айландырып, дагы беш талант табат.
17 Эки талант алганы дагы эки талант табат.
18 Ал эми бир талант алган кулу барып, кожоюнунун күмүш акчасын жерге көмүп коёт.
19 Бир топ убакыт өткөндөн кийин, кожоюну келип, кулдары менен эсептешет.+
20 Беш талант алган кул дагы беш талант алып келип: „Мырзам, сиз мага беш талант берген болчусуз, мына, мен дагы беш талант таптым“,— дейт.+
21 Кожоюну ага: „Жарайсың, сен ишенимдүү, жакшы кулсуң! Кичинекей нерседе ишенимдүү болгонуң үчүн, сага чоң нерсени тапшырам.+ Мырзаңдын кубанычына ортоктош бол“,+— деп айтат.
22 Андан кийин эки талант алганы келип: „Мырзам, сиз мага эки талант берген болчусуз, мына, мен дагы эки талант таптым“,— дейт.+
23 Кожоюну ага: „Жарайсың, сен ишенимдүү, жакшы кулсуң! Кичинекей нерседе ишенимдүү болгонуң үчүн, сага чоң нерсени тапшырам. Мырзаңдын кубанычына ортоктош бол“,— деп айтат.
24 Акырында бир талант алган кул келип: „Мырзам, мен сиздин сеппеген жерден жыйнап, сапырбаган жерден эгин чогулткан катаал киши экениңизди билем.+
25 Ошон үчүн коркконуман барып, берген талантыңызды көмүп койгом. Мына, ошол талантыңызды алыңыз“,— дейт.
26 Ошондо кожоюну: „Оңбогон жалкоо кул десе, сеппеген жерден жыйнап, сапырбаган жерден эгин чогултарымды билсең,
27 анда эмнеге талантымды акча айландыра тургандарга берген жоксуң? Кайтып келгенимде кирешеси менен албайт белем.
28 Мунун колунан талантты алып, 10 таланты бар кулга бергиле.+
29 Анткени кимде бар болсо, ага дагы берилет, аныкы мол болот. Ал эми кимде жок болсо, андан өзүндө болгон нерсеси да тартылып алынат.+
30 Пайда-батасы жок бул кулду сыртка, караңгылыкка ыргытып жибергиле. Ал ошол жакта ыйлап, тишин кычыратат“,— дейт.
31 Адам Уулу+ өзүнүн даңкы менен, бүт периштелери менен келип,+ даңктуу тактысына отурат.
32 Ошондо анын алдына бүт элдер чогултулат. Ал, койчу койлорду эчкилерден бөлгөндөй, адамдарды экиге бөлөт.
33 Койлорду+ оң жагына, эчкилерди сол жагына топтойт.+
34 Анан Падыша оң жагындагыларга: „Атамдан бата алгандар, келгиле, адамзат дүйнөсү жаралгандан* бери силер үчүн даярдалган Падышалыкты мурастагыла.
35 Себеби ачка болгонумда, тамак бергенсиңер. Суусаганымда, суусунумду кандыргансыңар. Жолоочу болуп жүргөнүмдө, жылуу тосуп алып, үйүңөргө киргизгенсиңер.+
36 Жылаңач калганымда, кийинткенсиңер.+ Ооруганымда, карагансыңар. Түрмөдө отурганымда, келип тургансыңар“,+— дейт.
37 Ошондо адил адамдар андан: „Мырзам, качан сиздин ачка болгонуңузду көрүп, тамак бердик эле? Качан суусаганыңызды көрүп, суусунуңузду кандырдык эле?+
38 Качан жолоочу болуп жүргөнүңүздү көрүп, жылуу тосуп алып, үйүбүзгө киргиздик эле же жылаңач экениңизди көрүп, кийинттик эле?
39 Качан ооруганыңызды же түрмөдө отурганыңызды көрүп, сизге бардык эле?“ — деп сурашат.
40 Падыша аларга: „Силерге айтып коёюн, буларды менин эң төмөн деп эсептелген бир туугандарымдын бирине кылганыңар — мага кылганыңар“,+— деп жооп берет.
41 Анан сол жагындагыларга: „Каргышка калгандар, кеткиле жанымдан!+ Ибилис менен анын жин-перилерине+ даярдалган түбөлүк отко* түшкүлө.+
42 Себеби ачка болгонумда, силер эч нерсе берген эмессиңер. Суусаганымда, суусунумду кандырган эмессиңер.
43 Жолоочу болуп жүргөнүмдө, үйүңөргө киргизген эмессиңер. Жылаңач калганымда, кийинткен эмессиңер. Ооруганымда да, түрмөдө отурганымда да, мага кам көргөн эмессиңер“,— дейт.
44 Ошондо алар: „Мырзам, качан сиздин ачка болгонуңузду же суусаганыңызды, жолоочу болуп жүргөнүңүздү же жылаңач калганыңызды, ооруганыңызды же түрмөдө отурганыңызды көрүп, сизге жардам бербей койдук эле?“ — деп сурашат.
45 Падыша аларга: „Силерге айтып коёюн, буларды менин эң төмөн деп эсептелген бир туугандарымдын бирине кылбаганыңар — мага кылбаганыңар“,+— деп жооп берет.
46 Ошентип, алар түбөлүккө жок кылынат,+ ал эми адил адамдар түбөлүк өмүр сүрүшөт».+
Шилтемелер
^ Сыягы, Иса келе турган убак жөнүндө айтылып жатат.
^ 102 кг. Бул жерде гректер колдонгон талант, башкача айтканда, салмак жана акча бирдиги жөнүндө айтылып жатат. Б14 тиркемесин кара.
^ 20,4 кг.
^ 40,8 кг.
^ Бул Адам ата менен Обо эненин балдары төрөлө баштаган убакты билдирет.
