Матай 3:1—17
3 Кийинчерээк Чөмүлдүрүүчү Жакан+ Жүйүт жериндеги чөлдүү аймакка* барып, Кудайдын кабарын айта баштады.+
2 Ал: «Өкүнгүлө, анткени асман Падышалыгы* жакындап калды»,+— деп айтып жүрдү.
3 Ышая пайгамбар аркылуу Жакан жөнүндө:+ «Ээн талаада бирөө: „Жахабага жол даярдагыла! Анын жолдорун тегиздегиле“,— деп жар салып жүрөт»,— деп айтылган болчу.+
4 Жакан төөнүн жүнүнөн кийим кийип, белине кайыш кур курчанып жүрчү.+ Ал жапайы аарынын балы менен чегиртке жечү.+
5 Ага Иерусалимде, бүт Жүйүт жеринде, Иордан дарыясынын чет-жакасында жашагандар келип,+
6 күнөөлөрүн мойнуна алып жатышты. Жакан болсо аларды Иордан дарыясында чөмүлдүрдү*.+
7 Жакан көп фарисейлер* менен садукейлердин*+ эл чөмүлтүлүп* жаткан жерге келатканын көрүп, аларга: «Уулуу жыландын* тукумдары,+ Кудайдын жазасынан качып кутула аласыңар деп силерге ким айтты?!+
8 Өкүнгөнүңөрдү иш жүзүндө көрсөткүлө*.
9 „Биздин атабыз — Ыбрайым“,— деп ойлобогула.+ Силерге айтып коёюн, зарыл болсо, Кудай Ыбрайымга мына бул таштардан да балдарды жаратып бере алат.
10 Дарактардын түбүндө балта жатат. Ошондуктан жакшы жемиш бербеген ар бир дарак кыйылып, отко ыргытылат.+
11 Өкүнгөнүңөр үчүн мен силерди сууга чөмүлдүрүп жатам.+ Бирок артымдан келе жаткан бирөө менден улук, мен анын сандалын чечкенге да татыксызмын.+ Ал силерди Кудайдын ыйык рухуна+ жана отко чөмүлдүрөт*.+
12 Колундагы эгин сапыра турган күрөгү менен кырманын бүт тазалап, буудайын кампага жыйнайт, топонун болсо өчпөс отко ыргытат»,— деди.+
13 Ошол кезде Иса чөмүлтүлүш үчүн Галилеядан Иордан дарыясына, Жаканга келди.+
14 Бирок Жакан: «Мага келгениң кандай? Мен сени эмес, сен мени чөмүлтүшүң керек да!» — деп, аны токтотконго аракет кылды.
15 Иса ага: «Мага тоскоолдук кылба, себеби Кудай буйрук кылган нерселердин* баарын ушинтип аткарышыбыз керек»,— деди. Ошондо Жакан макул болуп, аны чөмүлдүрдү.
16 Иса чөмүлөрү менен суудан чыкты. Ошол учурда асман ачылып,+ Жакан Кудайдын ыйык рухунун көгүчкөндөй болуп Исага түшүп келатканын көрдү.+
17 Анан асмандан:+ «Бул — менин сүйүктүү Уулум,+ мен Уулума ыраазымын»,+— деген үн угулду.
Шилтемелер
^ Бул эли аз, иштетилбеген жерди билдирет. Андай жерде бак-дарактар, суу башка жактарга салыштырмалуу аз болчу.
^ Же: «Кудайдын Падышалыгы». Б. а. Кудайдын башкаруусу же өкмөтү.
^ Чаар жылан.
^ Сөзмө-сөз: «өкүнүүгө ылайык келген жемиштерди бергиле».
^ Б. а. кимдир бирөөнү Кудайдын ыйык күчү менен майлайт, ал эми кимдир бирөөнү от менен жок кылат.
^ Же: «адил иштердин».
