Матай 6:1—34
6 Адил иштерди башкаларга көрүнүш үчүн эле+ кылгандан сак болгула. Болбосо асмандагы Атаңардан сыйлык албайсыңар.
2 Ошондуктан кайыр-садага берип жатканыңда элге жарыялаба*. Башкалар мактап-даңктасын деп, сыйынуу жайлары менен көчөлөрдө кайыр-садагасын жар салган эки жүздүүлөрдөй болбо. Силерге айтып коёюн, алар алчу сыйлыгын толук алышты.
3 Кайыр-садага бергениңде, оң колуңдун эмне кылып жатканын сол колуң билбесин.
4 Кайыр-садагаңды көрсөтпөй бер, ошондо көрүнбөгөн жайдан баарын көрүп турган Атаңдан сыйлык аласың.+
5 Кудайдан тиленгениңерде да эки жүздүүлөрдөй болбогула,+ себеби алар башкаларга көрүнүш үчүн сыйынуу жайларында, чоң көчөлөрдүн кесилишинде туруп алып тиленгенди жакшы көрүшөт.+ Ишенип койгула, алар өз сыйлыгын толук алышты.
6 Сен болсо тиленерде өз бөлмөңө кирип, эшигин жап да, көрүнбөгөн жайдагы Атаңан тилен.+ Ошондо көрүнбөгөн жайдан баарын көрүп турган Атаңдан сыйлык аласың.
7 Бирок тиленгенде башка адамдардай* болуп окшош эле нерселерди кайталай бербе, себеби алар көп сөз айтканда Кудай угат деп ойлошот.
8 Силер алардай болбогула, анткени асмандагы Атаңар эмнеге муктаж экениңерди сурай элегиңерде эле билет.+
9 Ошондуктан мындай деп тиленгиле:+
„Асмандагы Атабыз, ысмың+ ыйык тутулсун*.+
10 Падышалыгың+ келсин. Асмандагыдай эле, жерде да+ сенин эркиң+ аткарылсын.
11 Бүгүнкү күнгө керектүү ырыскыбызды* бере көр.+
12 Биз башкалардын күнөөлөрүн* кечиргендей эле, биздин да күнөөлөрүбүздү кечире көр.+
13 Ошондой эле азгырылышыбызга жол бере көрбө,+ Шайтандан* сактай көр“.+
14 Эгерде башкалардын күнөөлөрүн кечирсеңер, асмандагы Атаңар да силерди кечирет.+
15 Эгер алардын күнөөлөрүн кечирбесеңер, Атаңар да силердин күнөөлөрүңөрдү кечирбейт.+
16 Орозо кармаганыңарда+ эки жүздүүлөргө окшоп кабак бүркөгөнүңөрдү койгула. Себеби алар, орозо кармап жатканын башкалар көрсүн деп, өздөрүн байкуш кылып көрсөтүшөт.+ Ишенип койгула, алар өз сыйлыгын толук алышты.
17 Сен болсо орозо кармаганыңда башыңды жыпар жыттуу май менен майлап, бетиңди жуу.
18 Ошондо орозо кармап жатканыңды адамдар эмес, көрүнбөгөн жайдагы Атаң гана көрөт. Анан көрүнбөгөн жайдан баарын көрүп турган Атаңдан сыйлык аласың.
19 Жер үстүнө байлык жыйнаганыңарды токтоткула.+ Жерде аны күбө жейт, дат басат, уурулар кирип, уурдап кетет.
20 Андан көрө, байлыкты асманга топтогула.+ Ал жакта аны күбө жебейт, дат баспайт,+ уурулар кирип, уурдап кетпейт.
21 Байлыгыңар кайсы жерде болсо, жүрөгүңөр да ошол жерде болот.
22 Дененин чырагы — көз.+ Эгер көзүң бир эле нерсеге багытталса*, бүт денең жарык болот.
23 Эгер көзүң жаман нерсеге багытталса*,+ бүт денең караңгы болот. Сендеги жарык, чынында, караңгылык болсо, анда ал кандай гана коюу караңгылык!
24 Эч ким эки мырзага кул боло албайт, анткени бирин жек көрүп, экинчисин жакшы көрөт+ же бирине берилип кызмат кылып, экинчисин баркка албайт. Бир эле учурда Кудайга да, байлыкка да кул боло албайсыңар.+
25 Ошондуктан силерге айтарым, эмне жеп, эмне ичериңерди ойлоп жаныңар үчүн, эмне киериңерди ойлоп денеңер үчүн+ сарсанаа боло бербегиле*.+ Тамакка караганда жан*, кийимге караганда дене кымбат эмеспи?!+
26 Көктө учкан канаттууларды карагылачы:+ алар эгин экпейт, оруп-жыйбайт, кампага да жыйнабайт, ошентсе да асмандагы Атаңар аларды азыктандырат. Силер алардан алда канча баалуу эмессиңерби?!
27 Тынчсызданып жатып кимиңер өмүрүңөрдү бир азга* болсо да узарта аласыңар?+
28 Кийимди ойлоп эмнеге тынчсызданасыңар? Талаада өскөн лилия гүлдөрүн карагылачы: алар эмгектенбейт, жип ийрибейт.
29 Бирок силерге айтып коёюн, атүгүл Сулайман+ да, канчалык атак-даңктуу болбосун, алардын бириндей да кийинген эмес.
30 Бүгүн талаада өсүп, эртең мешке ыргытыла турган чөптү Кудай ушундай кийиндирсе, силерди кантип кийиндирбей койсун, ишеними алсыздар?
31 Ошондуктан „эмне жейбиз?“, „эмне ичебиз?“ же „эмне киебиз?“+ деп эч качан санаа тартпагыла.+
32 Башка элдер* ушунун баарын ойлоп, түйшүк тартышат. Ал эми силердин мунун бардыгына муктаж экениңерди асмандагы Атаңар билет.
33 Мындан ары да Кудайдын Падышалыгын жана Кудай туура деп эсептеген нерселерди* биринчи орунга койгула, ошондо силерге ушунун баары берилет.+
34 Ошон үчүн эч качан эртеңки күндү ойлоп тынчсызданбагыла,+ себеби эртеңки күндүн өз түйшүгү бар. Ар бир күндүн өз түйшүгү өзүнө жетиштүү.
Шилтемелер
^ Сөзмө-сөз: «сурнай тартпа».
^ Сөзмө-сөз: «элдердей».
^ Же: «урматталсын; даңкталсын».
^ Сөзмө-сөз: «наныбызды».
^ Сөзмө-сөз: «карыздарын».
^ Сөзмө-сөз: «кара өзгөйдөн».
^ Сөзмө-сөз: «жөнөкөй болсо».
^ Же: «ач көз болсо». Башкача айтканда, ар кайсы нерсеге багытталса. Сөзмө-сөз: «жаман болсо».
^ Же: «өмүр».
^ Же: «тынчсызданганыңарды токтоткула».
^ Сөзмө-сөз: «бир чыканакка».
^ Б. а. Кудайга сыйынбаган адамдар.
^ Же: «Кудайдын адилдигин».
