Матай 7:1—29
7 Айыпталбашыңар үчүн* мындан ары эч кимди айыптабагыла*.+
2 Себеби башкаларды кандай айыптасаңар, өзүңөр да ошондой айыпталасыңар.+ Башкаларга кандай мамиле кылсаңар, силерге да ошондой мамиле кылышат*.+
3 Эмнеге өз көзүңдөгү дөңгөчтү көрбөйсүң да, башка бирөөнүн* көзүндөгү кыпынды көрөсүң?+
4 Өз көзүңдө дөңгөч турса, ага: „Кел, көзүңдөгү кыпынды алып салайын“,— деп кантип айтасың?
5 Эки жүздүү! Адегенде өз көзүңдөгү дөңгөчтү алып ташта, ошондо бирөөнүн көзүндөгү кыпынды кантип алып салса болорун көрөсүң.
6 Ыйык нерсени иттерге бербегиле, берметиңерди чочколордун алдына таштабагыла.+ Болбосо алар аны тебелеп-тепсеп салат да, кайра келип, өзүңөрдү качырат.
7 Кайра-кайра сурай бергиле, ошондо силерге берилет;+ издей бергиле, ошондо табасыңар; тыкылдата бергиле, ошондо эшик ачылат.+
8 Анткени ар бир сураган адам алат,+ издеген табат, тыкылдатканга эшик ачылат.
9 Араңардан ким, уулу нан сураса, таш берет?
10 Же балык сураса, жылан берет?
11 Эгер силер күнөөкөр пенде болуп туруп балдарыңарга жакшы белектерди бергенди билсеңер, анда асмандагы Атаңар өзүнөн сурагандарга жакшы нерселерди+ кантип бербей койсун?!+
12 Ошентип, башкалардын өзүңөргө кандай мамиле кылышын кааласаңар, силер да аларга бардык жагынан ошондой мамиле кылгыла.+ Муса аркылуу берилген Мыйзамдын да, пайгамбарлар айткан сөздөрдүн да маңызы ушунда.+
13 Тар дарбазадан киргиле,+ себеби чоң дарбаза менен кенен жол өлүмгө алып барат. Чоң дарбазадан киргендер көп.
14 Ал эми тар дарбаза менен кууш жол өмүргө алып барат. Аны тапкандар аз.+
15 Жалган пайгамбарлардан сак болгула.+ Алар силерге кой терисин жамынып келишет,+ бирок, чындыгында, алар — ач карышкырлар.+
16 Аларды иштеринен* билесиңер. Тикенектен жүзүм, коко тикенден анжир жыйнамак беле?+
17 Ошо сыяктуу эле, ар бир жакшы дарак жакшы жемиш берет, жаман дарак болсо жаман жемиш берет.+
18 Жакшы дарак жаман жемиш бербейт, ал эми жаман дарак жакшы жемиш бербейт.+
19 Жакшы жемиш бербеген ар бир дарак кыйылып, отко ыргытылат.+
20 Ошентип, андай жалган пайгамбарларды иштеринен билесиңер.+
21 Мага „Мырзам*, Мырзам“ деп кайрылгандардын баары эле асман Падышалыгынын баталарын ала бербейт*, асмандагы Атамдын эркин аткаргандар гана алат.+
22 Ошол күнү көптөр мага: „Мырзам, Мырзам,+ биз сенин атыңдан сүйлөбөдүк беле? Сенин атыңдан жиндерди* кууп чыгарбадык беле? Сенин атыңдан көптөгөн кереметтерди жасабадык беле?“ — деп айтышат.+
23 Ошондо аларга: „Мен силерди такыр тааныбайм*! Кеткиле жанымдан, ыймансыздык кылгандар!“ — деп айтам.+
24 Ушул сөздөрүмдү угуп, аткаргандардын баары үйүн аска таштын үстүнө курган акылдуу кишиге окшош.+
25 Шамал согуп, жамгыр төгүп, сел жүрүп, ал курган үйдү каптады. Бирок үй ураган жок, анткени аска таштын үстүнө курулган болчу.
26 Ал эми сөздөрүмдү угуп, аткарбагандардын баары үйүн кумдун үстүнө курган акылсыз кишиге окшош.+
27 Шамал согуп, жамгыр төгүп, сел жүрүп, ал курган үйдү каптады.+ Ошондо үй урап, таш-талканы чыгып калды».
28 Иса сөзүн аяктаганда, эл анын кантип окутканына аябай таң калды.+
29 Себеби ал диний мыйзамдарды окуткандардай эмес, Кудай бийлик берген адамдай окутту.+
Шилтемелер
^ Же: «сындабагыла».
^ Же: «Сынга алынбашыңар үчүн».
^ Сөзмө-сөз: «Кандай ченеп берсеңер, силерге да ошондой ченелип берилет».
^ Сөзмө-сөз: «бир тууганыңдын». Бул Кудайга чогуу сыйынып, бир динди туткан кишини билдирет.
^ Сөзмө-сөз: «жемиштеринен».
^ Сөзмө-сөз: «асман Падышалыгына кирбейт».
^ Б. а. Иса аларды эч качан жолдоочулары катары эсептеген эмес.
