Мыйзам 11:1—32
11 Жахаба Кудайыңарды сүйгүлө,+ анын алдындагы милдеттериңерди, анын көрсөтмөлөрү менен мыйзамдарын, осуяттарын дайыма аткаргыла.
2 Өзүңөр көрүп тургандай, мен бүгүн балдарыңарга эмес, силерге кайрылып жатам. Анткени балдарыңар Жахаба Кудайыңардын кантип тарбиялай турганын,+ анын улуулугун,+ кудуреттүү күчүн+ көрүшкөн эмес.
3 Алар Кудайдын Мисир падышасы фараон менен анын бүт жерине кандай кереметтерди көрсөтүп, кандай иштерди жасаганын,+
4 Мисирдин аскерлери, аттары менен согуш арабалары артыңардан кууп келатканда, Жахаба аларды Кызыл деңизге чөктүрүп, биротоло кырып жок кылганын көрүшкөн эмес.+
5 Бул жерге жеткениңерче чөлдө силерге кантип кам көрүп келгенин,
6 жер ачылып, бүт ысрайыл элинин көзүнчө Рубейиндин тукумдарынан болгон Элиаптын уулдары Датан менен Абырамды үйүндөгүлөрү, чатырлары, жанындагы адамдары, малы менен кошо жутуп кеткенин көрүшкөн эмес.+
7 Силер болсо Жахабанын ошол улуу иштеринин баарын өз көзүңөр менен көргөнсүңөр.
8 Мен бүгүн буйрук кылган осуяттардын баарын аткаргыла, ошондо күчтүү болосуңар, дарыянын аркы өйүзүнө өтүп, ошол жерди ээлейсиңер,
9 Жахаба ата-бабаларыңар менен алардын тукумдарына берем деп убада кылган жерде,+ сүт менен бал аккан жерде,+ узак жашайсыңар.+
10 Ээлегени бараткан жериңер силер чыккан Мисир жериндей эмес. Ал жакта силер үрөн сепкен жериңерди бакча сугаргандай сугарып*, оор эмгектенчүсүңөр.
11 Ал эми азыр ээлегени бараткан жериңер — тоолуу, өрөөндүү,+ жамгыр менен сугарылган,+
12 Жахаба Кудайыңар өзү кам көргөн жер. Жахаба Кудайыңар ал жерге жылдын башынан аягына чейин көз салып турат.
13 Эгер мен бүгүн буйрук кылган осуяттарды кылдат аткарсаңар, Жахаба Кудайыңарды сүйсөңөр, ага бүт жүрөгүңөр, бүт жаныңар менен кызмат кылсаңар,+
14 ал* жериңерге күзгү, жазгы жамгырды өз убагында жаадырат. Ошондо даныңар, жаңы шарабыңар, майыңар болот.+
15 Ал малыңар үчүн талаага чөп өстүрөт, өзүңөр да тойгончо ичип-жейсиңер.+
16 Сак болгула, азгырылып, түз жолдон чыгып кетпегиле, башка кудайларга таазим кылып, аларга сыйынып кетпегиле.+
17 Болбосо Жахаба силерге каарданып, асманды жаап коёт. Ошондо жамгыр жаабай,+ жер түшүм бербей калат, Жахаба берген жакшы жерден бат эле жок болосуңар.+
18 Бул сөздөрүмдү жан-дилиңерге сиңирип, көкүрөгүңөргө түйүп алгыла. Эстеп жүрүшүңөр үчүн алар колуңарга байланган белгидей, чекеңерге таңылган таңуудай болсун.+
19 Аларды балдарыңарга үйдө отурганда да, жолдо баратканда да, жатканда да, турганда да үйрөткүлө.+
20 Ошондой эле аларды эшигиңердин кашектерине, шаарыңардын дарбазаларына жазып койгула.
21 Ошондо асман жердин үстүндө канча убакыт турса, өзүңөр да, балдарыңар да Жахаба ата-бабаларыңарга берем деп убада кылган жерде+ ошончо убакыт өмүр сүрөсүңөр.+
22 Эгер мен берип жаткан осуяттарды кылдат аткарсаңар, Жахаба Кудайыңарды сүйсөңөр,+ дайыма анын жолунда жүрүп, андан эч алыстабасаңар,+
23 Жахаба бул элдердин баарын силердин алдыңардан кууп чыгат.+ Силер өзүңөрдөн алда канча күчтүү, алда канча көп элдердин жерин басып аласыңар.+
24 Бутуңар баскан жердин баары силердики болот.+ Чек араңар чөлдөн Лебанонго чейин, Эфрат дарыясынан батыштагы деңизге* чейин болот.+
25 Силерге эч ким туруштук бере албайт.+ Жахаба Кудайыңар, өзү убада кылгандай, бутуңар баскан жердеги элдердин баарын силерден коркуп, үрөйү уча тургандай кылат.+
26 Бүгүн силерге бата менен каргышты сунуш кылам, экөөнүн бирин тандап алгыла:+
27 эгер Жахаба Кудайыңардын мен бүгүн силерге буйрук кылган осуяттарын аткарсаңар, бата аласыңар.+
28 Ал эми Жахаба Кудайыңардын осуяттарын аткарбай,+ мен бүгүн көрсөткөн жолдон четтеп, өзүңөр билбеген кудайларга сыйынып кетсеңер, каргышка каласыңар.
29 Жахаба Кудайыңар силерди ээлегени бараткан жериңерге алып барганда, Гаризим тоосунда бата бергиле, ал эми Эбал тоосунда+ каргыш айткыла.
30 Ал тоолор Иордандын батыш тарабындагы өйүзүндө, Арабада жашаган канаандыктардын жеринде, Гилгалдын тушунда, Моредеги чоң дарактардын* жанында.+
31 Силер Жахаба Кудайыңар берип жаткан жерди ээлеш үчүн Иордандын аркы өйүзүнө өткөнү жатасыңар.+ Ал жерди ээлеп, ошол жакта жашай баштаганыңарда
32 бүгүн мен силерге айткан көрсөтмөлөр менен мыйзамдардын баарын кылдат аткаргыла.+
Шилтемелер
^ Сөзмө-сөз: «бутуңар менен сугарып». Суу дөңгөлөгүн бут менен кыймылга келтирүү же бут менен жер тээп арык казуу сыяктуу иштерди билдириши мүмкүн.
^ Сөзмө-сөз: «мен». Кудайды билдирет. Бул кийинки аятка да тиешелүү.
^ Б. а. Улуу деңизге (Жер Ортолук деңиз).
^ Же балким: «Моренин чоң дарактарынын».
