Мыйзам 23:1—25
23 Жыныстык мүчөсү кесилгенби же тукум бездери жанчылганбы, айтор, бычылган эркек* Жахабанын элинин мүчөсү боло албайт.+
2 Никесиз төрөлгөн эркек да Жахабанын элинин мүчөсү боло албайт.+ Анын тукум-уругу эч качан* Жахабанын элинин мүчөсү боло албайт.
3 Амондун тукумдары да, Мааптын тукумдары да Жахабанын элинин мүчөсү боло албайт.+ Алардын урпактары да эч качан* Жахабанын элинин мүчөсү боло албайт.
4 Анткени Мисирден келатканыңарда, алар силерге жардам иретинде азык-түлүк, суу беришкен эмес.+ Кайра, силерди каргаш үчүн Месопотамиядагы Петордо жашаган Беордун уулу Биламды жалдашкан.+
5 Бирок Жахаба Кудайыңар Биламды уккусу келген эмес.+ Жахаба Кудайыңар силер үчүн анын каргышын батага айланткан,+ анткени Жахаба Кудайыңар силерди жакшы көрөт.+
6 Өмүрүңөр өткөнчө алардын гүлдөп-өсүп, бейкут жашашына жол бербегиле.+
7 Эдомдун тукумдарын жек көрбөгүлө, анткени алар боордошуңар болот.+
Мисирликтерди да жек көрбөгүлө, анткени алардын жеринде келгин болгонсуңар.+
8 Алардын үчүнчү муунундагы эркектери Жахабанын элинин мүчөсү боло алат.
9 Душманыңар менен согушуш үчүн бир жерге жайгашканда арамдалып калгандан сак болгула.+
10 Эгер араңардан кайсы бир эркек түн ичинде уругу агып, таза эмес болуп калса,+ конуштун сыртына чыксын, конушка кирбесин.
11 Ал кеч киргенде жуунсун, күн баткандан кийин болсо конушка кирсе болот.+
12 Конуштун сыртынан өзүнчө жер бөлүп коюп, ич бошоткону ошол жакка баргыла.
13 Куралдарыңардан тышкары күрөк ала жүргүлө. Конуштун сыртына чыкканда чуңкур казып отургула, анан заң-заараңарды көмүп койгула.
14 Анткени Жахаба Кудайыңар силерди куткарыш үчүн, душманыңарды колуңарга салып бериш үчүн конушуңарда жүрөт.+ Ошондуктан ал арам бир нерсе көрүп калып, силерди таштап кетпеши үчүн, конушуңар ыйык болсун.+
15 Кожоюнунан качып, силердикине келген кулду кайра кожоюнунун колуна салып бербегиле.
16 Ал араңарда, өзү тандаган, өзүнө жаккан шаарда жашай берсин. Ага жаман мамиле жасабагыла.+
17 Ысрайылдык кыздардын арасынан бир да кыз ибадаткана сойкусу* болбошу керек,+ ошондой эле ысрайылдык эркектердин арасынан бир да эркек ибадаткана сойкусу болбошу керек.+
18 Антты аткарыш үчүн Жахаба Кудайыңардын үйүнө сойку аялга же эркекке* төлөнгөн акыны алып кирбеш керек, анткени экөө тең Жахаба Кудайыңар үчүн жийиркеничтүү.
19 Ысрайылдыктардын эч кимисинен үстөк албагыла.+ Ага акча бересиңерби же азык-түлүкпү, эмне берсеңер да, үстөк албагыла.
20 Бөтөн жерликтен үстөк алсаңар болот,+ бирок ээлегени бараткан жерде Жахаба Кудайыңар бардык иш-аракетиңерге батасын бериши үчүн,+ ысрайылдыктардан үстөк талап кылбагыла.+
21 Жахаба Кудайыңарга ант берсеңер,+ кечиктирбей аткаргыла,+ анткени Жахаба Кудайыңар берген антыңарды аткарышыңарды талап кылат. Эгер аткарбасаңар, күнөөлүү болуп каласыңар.+
22 Ал эми ант бербесеңер, күнөөлүү болбойсуңар.+
23 Айткан сөзүңөрдүн баарын аткаргыла.+ Берген антыңар ыктыярдуу тартуу болуп эсептелет, ошон үчүн Жахаба Кудайыңарга берген антыңарды аткаргыла.+
24 Бирөөнүн жүзүмзарына кирсеңер, мөмөсүнөн каалашыңарча жегиле, бирок идишиңерге терип албагыла.+
25 Бирөөнүн эгин талаасына барсаңар, бышкан эгининен кол менен үзүп алсаңар болот, бирок орок менен орбогула.+
Шилтемелер
^ Сыягы, бул башка эркек менен жатуу сыяктуу ыпылас иш кылуу максатында атайлап жасалышы мүмкүн болчу.
^ Сөзмө-сөз: «атүгүл онунчу мууну да».
^ Сөзмө-сөз: «атүгүл онунчу мууну да».
^ Андай сойкулар жалган кудайларга сыйынганда сойкулук кылган эркектер же аялдар болушкан.
^ Сөзмө-сөз: «итке». Бузулган адамдарды ушинтип атап коюшчу.
