Мыйзам 5:1—33
5 Анан Муса бүт ысрайыл элин чогултуп, мындай деди: «Оо, ысрайыл эли, мен бүгүн жарыялап жаткан көрсөтмөлөр менен мыйзамдарды ук. Аларды жакшылап билип алып, так аткар.
2 Жахаба Кудайыбыз Хорепте биз менен келишим түзгөн.+
3 Жахаба ал келишимди ата-бабаларыбыз менен эмес, бүгүн ушул жерде турган биз менен түзгөн.
4 Жахаба тоодо силер менен от ичинен бетме-бет сүйлөшкөн.+
5 Ошондо мен силерге Жахабанын сөзүн айтып туруш үчүн Жахаба менен силердин ортоңордо тургам.+ Анткени силер оттон коркуп, тоого чыккан эмессиңер.+ Ал мындай деген:
6 „Мен Жахабамын, силерди Мисирден, кул болуп жүргөн жерден, алып чыккан Кудайыңармын.+
7 Менден башка кудайларыңар болбосун.+
8 Асмандагы, жердеги же суудагы нерселердин сөлөкөтүн+ же түспөлүн жасабагыла*.
9 Аларга табынбагыла да, кызмат кылбагыла,+ анткени мен Жахаба Кудайыңармын, толук берилгендикти талап кылган Кудаймын.+ Мени жек көргөндөрдүн күнөөлөрүнүн кесепетин уулдарына, неберелери менен чөбөрөлөрүнө чейин тарттырам.+
10 Ал эми мени сүйгөндөрдүн, осуяттарымды сактагандардын миңинчи муунуна чейин сүйүүмө бөлөйм*.
11 Жахаба Кудайыңардын ысмын жөнү жок* атабагыла,+ анткени Жахаба анын ысмын жөнү жок атагандарды жазасыз калтырбайт.+
12 Жахаба Кудайыңар буйрук кылгандай, дем алыш күн* жөнүндөгү мыйзамды аткарып, ал күндү ыйык туткула.+
13 Ошондуктан алты күн иштеп, бардык иштериңерди кылгыла.+
14 Ал эми жетинчи күн — Жахаба Кудайыңарга арналган дем алыш күн.+ Өзүңөр да, уулуңар да, кызыңар да, кулуңар да, күңүңөр да, букаңар да, эшегиңер да, малыңар да, шаарларыңарда жашаган бөтөн жерлик да+ эч кандай иш кылбасын.+ Өзүңөр эс алгандай, кулуңар менен күңүңөр да эс алсын.+
15 Мисир жеринде кул болуп жүргөнүңөрдү, Жахаба Кудайыңардын силерди ал жактан кудуреттүү күчү менен алып чыкканын унутпагыла.+ Ошондуктан Жахаба Кудайыңар силерге дем алыш күн жөнүндөгү мыйзамды аткаргыла деп буйрук кылган.
16 Жахаба Кудайыңар бере турган жерде өмүрүңөр узун болуп, өркүндөп-өсүшүңөр үчүн*, Жахаба Кудайыңар буйрук кылгандай,+ ата-энеңерди сыйлагыла.+
17 Киши өлтүрбөгүлө.+
18 Ойноштук кылбагыла.+
19 Уурдабагыла.+
20 Бирөөгө каршы күбөгө өтүп, жалаа жаппагыла.+
21 Башка бирөөнүн аялына көз артпагыла.+ Ач көздүк кылып, бирөөнүн үйүнө, жерине, кулуна, күңүнө, букасына, эшегине же дагы башка нерсесине көз артпагыла“.+
22 Бул осуяттарды Жахаба тоодо бүт жамаатыңарга оттун, булуттун, коюу караңгылыктын+ ичинен катуу үн чыгара айткан. Аларга башка эч нерсе кошумчалаган эмес. Анан аларды эки таш лоокко жазып, мага берген.+
23 Бирок тоо күйүп жаткан маалда караңгылыктан чыккан үндү угарыңар менен,+ уруу башчыларыңар менен аксакалдарыңар мага келишкен.
24 Анан: „Жахаба Кудайыбыз бизге өзүнүн даңкы менен улуулугун көрсөттү, биз анын от ичинен чыккан үнүн уктук.+ Бүгүн Кудайдын адам менен сүйлөшөрүн, ошентсе да ал адамдын тирүү кала аларын билдик.+
25 Бирок өмүрүбүздү тобокелге салбай эле коёлу. Бул улуу от бизди жалмап салышы мүмкүн. Эгер Жахаба Кудайыбыздын үнүн дагы угуп тура берсек, сөзсүз өлөбүз.
26 Анткени адамдардын арасынан биздей болуп, от ичинен сүйлөгөн тирүү Кудайдын үнүн угуп, аман калган бирөө барбы?
27 Ошон үчүн сен барып, Жахаба Кудайыбыздын айткандарынын баарын ук да, кайра келип, Жахаба Кудайыбыз айткандын баарын бизге айтып бер, биз аткарабыз“,+— дегенсиңер.
28 Жахаба мага айткан ошол сөздөрүңөрдү уккан. Ошондо Жахаба мага: „Бул элдин сага эмне дегенин уктум. Алар айткандын баары жакшы.+
29 Бирок дайыма менден чындап коркуп,+ осуяттарымды аткарышса кана!+ Ошондо өзүлөрүнө да, балдарына да түбөлүккө жакшы болмок.+
30 Барып, аларга: “Чатырларыңарга кайткыла”,— деп айт.
31 Өзүң болсо менин жанымда кал. Мен сага аларга үйрөтүшүң керек болгон бүт осуяттарымды, көрсөтмөлөрүмдү, мыйзамдарымды айтам. Аларды мен берип жаткан жерде аткарышсын“,— деген.
32 Жахаба Кудайыңар кандай буйруса, баарын так ошондой аткаргыла.+ Түз жолдон оңго да, солго да бурулбагыла.+
33 Өлүп калбашыңар үчүн, ээлегени бараткан жерде узак жашап, өркүндөп-өсүшүңөр үчүн+ Жахаба Кудайыңар айткан жол менен жүргүлө.+
Шилтемелер
^ Б. а. жыгачтан, таштан, металлдан же чоподон жасабашы керек болчу.
^ Же: «жалган нерсеге байланыштырып; тийиштүү урмат көрсөтпөй».
^ Же: «өзүңөргө жакшы болушу үчүн».
