Накыл сөздөр 4:1—27
4 Балдарым, атаңардын акыл-насаатына кулак салгыла;+Акылдуу болуш үчүн* бүт дитиңерди койгула,
2 Себеби силерге жакшы таалим берем;Мен берген билимди* четке какпагыла.+
3 Мен атамдын ишеничтүү уулу болчумун,+Энемдин жанындай жакшы көргөн баласы элем.+
4 Атам мага таалим берип, мындай деген: «Сөздөрүмдү жүрөгүңдө бекем сакта.+
Осуяттарымды аткарып, узак жаша.+
5 Акылмандыкка, түшүнүккө умтул.+
Айткандарымды унутпа, алардан четтебе.
6 Акылмандыкты четке какпа, ошондо ал сени сактайт.
Аны жакшы көр, ошондо ал сени коргойт.
7 Акылмандык — адам үчүн эң маанилүү нерсе,+ ошон үчүн ага умтул,Башка нерселер менен бирге түшүнүккө да ээ бол.+
8 Акылмандыкты жогору баала, ошондо ал зоболоңду көтөрөт.+
Аны кучагыңа алсаң, даңкыңды чыгарат.+
9 Ал башыңа кооз гүлчамбар кийгизет;Көз жоосун алган таажы кийгизип, көркүңдү ачат».
10 Кулак сал, уулум, айткандарымды кабыл ал.
Ошондо узак өмүр сүрөсүң.+
11 Сага акылмандыктын жолунда жүргөндү үйрөтөм,+Сени чынчылдыктын жолунда жетектеп жүрөм.+
12 Басканда бутуң эч нерсеге мүдүрүлбөйт,Чуркаганда чалынбайсың.
13 Акыл-насаатты бекем карма, коё бербе.+
Аны сакта, анткени ал — сенин өмүрүң.+
14 Ыймансыздардын жолуна түшпө,Кыянатчылдардын жолунда жүрбө.+
15 Алардын жолунан оолак бол, ал жол менен баспа;+Андан бурулуп*, кыя өт.+
16 Анткени алар жамандык кылмайынча уктай алышпайт,Кимдир бирөөнү кыйратмайынча кирпик кагышпайт.
17 Себеби ыймансыздык алардын жеген нанындай,Зордук-зомбулук ичкен шарабындай*.
18 Ал эми адилдердин жолу таңкы жарыктай,Ал чак түш болгонго чейин уламдан-улам жарык боло берет.+
19 Ыймансыздардын жолу капкараңгы;Алар эмнеге чалынганын билишпейт.
20 Уулум, сөздөрүмө кулак сал,Айткандарымды кунт коюп ук.
21 Аларды унутпа,Жүрөгүңдүн түпкүрүндө сакта.+
22 Анткени аларды кабыл алгандар өмүр сүрөт,+Алты саны аман болуп, дени сак жүрөт.
23 Сакташ керек болгондордун баарынан жүрөгүңдү сакта,+Анткени андан өмүрүң көз каранды*.
24 Эч качан жалган сөз айтпа,+Эч кимди алдап-адаштырба.
25 Көзүң түз карасын,Көз карашың* алдыңа багытталсын.+
26 Баса турган жолуңду түздөп-тазала*,+Ошондо жолуң коопсуз болот.
27 Оңго да, солго да бурулба.+
Жамандыктан алыс бол.
Шилтемелер
^ Же: «Түшүнүккө ээ болуш үчүн».
^ Же: «Мыйзамымды».
^ Же: «айланып».
^ Же: «Алар ыймансыздыктын, зордук-зомбулуктун аркасы менен ичип-жешет».
^ Сөзмө-сөз: «өмүр булактары чыгат».
^ Же: «Жаркыраган көздөрүң».
^ Же балким: «жакшылап ойлон».
