Насаатчы 8:1—17
8 Акылман адамга ким тең келе алат? Көйгөйдү кантип чечишти ким билет?* Адамдын акылмандыгы жүзүнөн көрүнүп турат, анын каардуу жүзүн жайдары кылат.
2 Айтарым бул: «Кудайга берген антың үчүн+ падышанын буйруктарын аткар.+
3 Падышанын алдынан кеткенге шашпа.+ Эч бир жаман ишке да аралашпа.+ Себеби падыша каалаганын кыла алат.
4 Анткени анын сөзү — мыйзам.+ Ага: „Эмне кылып жатасың?“ — деп ким айта алат?»
5 Осуятты аткарган зыян тартпайт;+ акылдуу киши ар бир ишти качан жана кантип кылышты билет.+
6 Адам баласынын кыйынчылыгы аябай көп, ошон үчүн бардык нерсени өз убагында, туура жол менен чечиш керек.+
7 Алдыда эмне болорун эч ким билбесе, анда анын кантип болорун ким айта алмак эле?
8 Бир да адам өмүр демине бийлик кыла албайт, ошондуктан өлө турган күнүнө да бийлик кыла албайт.+ Согуш маалында эч бир жоокер бошотулуп, үйүнө жиберилбегендей эле, ыймансыздар да жаман иштеринин кесепетинен качып кутула алышпайт*.
9 Мен ушунун баарын көрдүм, күн астында жасалып келген ар кандай ишке байкоо салып, адамдын адамга бийлик кылышы зыян гана алып келерин түшүндүм.+
10 Ошондой эле ыйык жайга* келип-кетип жүргөн ыймансыздардын көмүлгөнүн көрдүм. Алар өздөрү жаман иштерди кылып жүргөн шаарда бат эле унутулуп калышты.+ Бул да маңызсыздык.
11 Жаман иши үчүн дароо жазаланбагандыктан+ адам баласы жамандык кылгандан коркпой калат.+
12 Күнөөкөр жүз жолу жамандык кылганына карабай узак жашаса да, чыныгы Кудайдан корккондордун акыры жакшылык көрөрүн билем, анткени алар андан коркушат.+
13 Ал эми ыймансыз киши жакшылык көрбөйт,+ көлөкө сымал жок болуп кете турган күндөрүн узарта албайт,+ себеби ал Кудайдан коркпойт.
14 Жер үстүндө мындай да кейиштүү нерсе* бар: адил адамдарга алар жаман иштерди кылгандай мамиле кылынып жатат,+ ал эми ыймансыздарга алар адил иштерди кылгандай мамиле кылынып жатат.+ Мен муну да маңызсыздык дедим.
15 Ошондуктан башкаларга кубанып жашагыла деп айттым,+ себеби күн астында адамдын ичип-жеп, кубанганынан өтөрү жок экен. Ал күн астында чыныгы Кудайдан алган өмүрүндө жан үрөп иштеши, ошол эле учурда кубанычка бөлөнүшү керек экен.+
16 Ошондуктан мен акылмандыкка ээ болгонго, жер үстүндө жасалып жаткан бардык иштерди түшүнгөнгө+ күндүзү да, түнкүсүн да уйку көрбөй аракет кылдым*.
17 Анан чыныгы Кудайдын бардык иштери жөнүндө ой жүгүртүп, адам баласынын күн астында жасалып жаткан иштерди толук түшүнө албасын баамдадым.+ Канчалык аракет кылышпасын, аларды түшүнө алышпайт. Атүгүл өздөрүн абдан акылдуу деп эсептеп, түшүнө алабыз дешкен күндө да толук түшүнө алышпайт.+
Шилтемелер
^ Же: «Кайсы бир нерсенин маанисин ким түшүндүрүп бере алат?»
^ Же балким: «ыймансыздарды ыймансыздыгы куткара албайт».
^ Сыягы, Иерусалим менен ал жактагы ибадаткананы билдирет.
^ Же: «убаракерчилик».
^ Же балким: «адамдар күндүзү да, түнкүсүн да уйку көрбөй жасап жаткан бардык иштерди түшүнгөнгө аракет кылдым».
